Luda yã takada kↄ̃n Bokobaru yão YAASINƆ 14

14

1 Nↄgbɛ̃ ↄ̃ndↄ̃dee è ua káɛ,

à faasaidee sↄ̃ è ua fãakↄ̃a.

2 Gbɛ̃ kɛ̀ è yã kɛ a zɛ́a Dii vĩa vĩ,

gbɛ̃ kɛ̀ è zɛ́ sɛ́ súusuroo sↄ̃ è kya kán.

3 Faasaide lɛ́n à gbɛ̃bↄ ũ,

ↄ̃ndↄ̃dee yã'ona è à bↄ.

4 Tó zù kuuro, pↄ́ble gbà ègↄ̃ da korimɛ,

wè àre bíta e kↄ̃n zùnↄ gbãaao.

5 Sèeda yãpuradee è ɛgɛɛ toro,

sèeda ɛgɛde yã ègↄ̃ mↄnafiki vĩ.

6 Fabori è kpáɛ kɛ ↄ̃ndↄ̃ↄzi à korazi,

yãdↄ̃na aaga làakarideenɛ.

7 Ǹ kɛ̃ yↄ̃nkↄↄa zã̀azã,

zaakɛ nɛ́ dↄ̃na earo.

8 Ɔ̃ndↄ̃ↄ è tó làakaridee laasuu lɛ́ a zɛ́a,

yↄ̃nkↄↄ faasaikɛɛ è à sãsã.

9 Faasaideenↄ è kya ká taari kúɛkɛnan,

gbɛ̃ maaanↄ ègↄ̃ nna kↄ̃o.

10 Baade a zĩnda yã'ↄ̃amma dↄ̃,

gbɛ̃ pↄnnaa ègↄ̃ dɛ gbɛ̃ pãnde pↄ́ ũro.

11 Gbɛ̃ zaaanↄ ua é mì dɛ,

gbɛ̃ maaanↄ bɛ é ↄ tá.

12 Zɛ́ ke kuu è kɛ gbɛ̃nↄnɛ maa,

mↄde à mìdɛkii nɛ́ gaamɛ.

13 Baa yáadↄna guu nↄ̀sɛ è yaka,

pↄnnaa kuu kɛ̀ è mì dɛ kↄ̃n pↄsiaao.

14 Bↄrukpɛɛde yãkɛna è wí à musu,

gbɛ̃ maaa è a yãkɛna gbɛ̀ e.

15 Laasuusaidee è yã píngi símɛ,

làakaridee è yã náanɛ kɛ laasuulɛna sairo.

16 Ɔ̃ndↄ̃dee ègↄ̃ zaakɛna vĩa vĩ è pãnɛ,

yↄ̃nkↄↄ è náanɛ kpá a zĩndaa ègↄ̃ wãna.

17 Pↄfɛ̃ri è yã futaa kɛ,

mↄnafikidee è zangu i a zĩndanɛ.

18 Ɔ̃ndↄ̃saideenↄ è gↄ̃ faa sai,

làakarideenↄ è dↄ̃na kú fùra ũ.

19 Gbɛ̃ zaaanↄ é mì siɛ gbɛ̃ maaanↄnɛ,

zaakɛrinↄ é kúɛ nↄ̀sɛpuradeenↄ kpɛɛlɛa.

20 Takaasidee, baa à gbɛ̃daaa è zan,

mↄde auzikide gbɛ̃nnanↄ ègↄ̃ pari.

21 Kyakana n gbɛ̃daaan nɛ́ durummɛ.

Aubarikadeen gbɛ̃ kɛ̀ è wɛ̃nda dↄ̃ takaasideenↄnɛ ũ.

22 Zaalɛkpakↄ̃sↄ̃rinↄ sãsãnaroo?

Maawaariparinↄↄ sùu vĩ kↄ̃n náanɛo.

23 Mɛ̀kpana zĩia ègↄ̃ àre vĩ,

yãbↄɛna pãa è mↄ́ kɛ̃sãnao.

24 Ɔ̃ndↄ̃deenↄ auzikimɛ ń fùra ũ,

yↄ̃nkↄↄnↄ faasaikɛɛ è mↄ́ kↄ̃n faasaiyão.

25 Sèeda yãpuradee è gbɛ̃ mì sí,

mↄde sèeda ɛgɛdee yã mↄnafiki vĩ.

26 Vĩakɛna Diinɛ nɛ́ gbãa'eki náanɛdeemɛ,

à dɛ mìsikii ũ à nɛ́nↄnɛ.

27 Vĩakɛna Diinɛ nɛ́ íbↄki wɛ̃̀ndideemɛ,

è tó wà bↄ ga bàn.

28 Tó kína gbɛ̃nↄↄ pari, ègↄ̃ gakui vĩ,

bùsugbɛ̃saikɛɛ nɛ́ kpatableri mↄ́nzimɛ.

29 Gbɛ̃ kɛ̀ è pↄ fɛ̃ kpaaro wɛ́ɛ kɛ̃na,

pↄfɛ̃ri è a futakɛɛ sɛ́ lezĩ.

30 Làakarikpaɛna nɛ́ mɛ̀ aafiamɛ,

zangu è mɛ̀kɛkpɛtɛ kpáńzi.

31 Wɛ̃ndade wɛ́ɛtãmmari è à Kɛ̀ri kpɛ bↄ,

takaaside wɛ́ɛgwari è à Kɛ̀ri kpe da.

32 Tó kisia gɛ̃̀ zaakɛrizi, è à nɛmɛ,

baa tó gbɛ̃ maaa gà, à utɛkii vĩ.

33 Ɔ̃ndↄ̃ↄ è vɛ̃ɛkii e làakaridee nↄ̀sɛn,

mↄde wè e yↄ̃nkↄↄaro.

34 Yãzɛdee è bùsu sɛ́ lezĩ,

durun sↄ̃ è wí da gbɛ̃nↄa, baa démɛ.

35 Zↄ̀bleri làakaride yã è ká kínanɛ,

mↄde è a pↄfɛ̃ bↄbↄ à wídammaria.