45
Kína nↄsɛna lɛ̀
Yenzi lɛ̀ kɛ̀ Kora boriinↄↄ dà.
1 Yã nnaa e pipii ma swɛ̃̀ guu,
lán mɛ́ɛ lɛ̀ kɛ̀kii daa kínanɛ nà.
Ma lɛ́ nna lán takadakɛ̃ri lákɛ̃bↄ bà.
2 N maakɛɛ dɛ gbɛ̃ píngila,
n lɛ́gbɛ ègↄ̃ nna,
aubarika kɛ̀ Ludaa dànguu yãana vĩro.
3 N zĩ̀kari pãsĩ, ǹ n fɛ̃ɛdaa sɛ́ ǹ logo
n kíkɛgakui sèeda ũ.
4 Ǹ di sↄ̃a ǹ gá zĩ̀ ble n gakuikɛɛ guu
yãpura kↄ̃n nↄ̀sɛdooo kↄ̃n yãzɛdeeo yãnzi,
ǹ yã naasideenↄ kɛ kↄ̃n n ↄplaa gbãaao.
5 Kí, n kànↄ lɛ́ sↄ̃ntɛ,
è gɛ̃ à n ibɛɛnↄ swɛ̃̀ zↄ̃,
boriinↄ è lɛ́ɛ n gbá saɛ.
6 Luda, nɛ́gↄ̃ vɛ̃ɛna kpatan gurↄ píngi,
nɛ́gↄ̃ n kíkɛgo kũna yãzɛdee ũ.
7 Ń ye yãmaakɛnazi, n za yãzaakɛnan.
Beee yãnzi Luda, n Luda, n ka kpatan,
à pↄnnaa pìsimma dɛ n gbɛ̃nↄla.
8 Lí'ↄ gũ nnannaa pìsi n pↄ́kãsãanↄa,
mↄrↄ'ↄ è n pↄↄ kɛ nna
n kpɛ́ kɛ̀ wà kɛ̀kɛ kↄ̃n wesaswaao guu.
9 Kí nɛ́nↄgbɛ̃nↄↄ kú n nↄ yenzideenↄ tɛ́,
n nↄ dufu kú n ↄplaazi,
à Ofi bùsu vura zãblebↄnↄ dana.
10 Nɛ́nↄkparɛ, ǹ swã kpá ǹ ma!
N de bɛ kↄ̃n n gbɛ̃nↄ yã tón dↄnnɛ aɛro.
11 N nↄmaakɛɛ e kí mɛ̀ lugaa,
ǹ mì siɛnɛ, zaakɛ n diin à ũ.
12 Tayadeenↄ é mↄ́ wà gba dannɛ,
auzikideenↄ é n wɛ́ɛ wɛtɛ.
13 Kí nɛ́nↄkparɛ vɛ̃ɛna kpɛ́nɛ guu kↄ̃n gakuio,
wà ↄzĩi kɛ̀ à pↄ́kãsãanↄa kↄ̃n vura bào.
14 Wèe suuo kínɛ
kↄ̃n à pↄ́kãsã wɛ̃zãdeenↄo dana.
Nɛ́nↄkparɛ zɛnnɛrinↄↄ tɛ́zi,
aↄ̃ↄe suuo à kiia.
15 Wèe gɛ̃ɛńyo kíbɛ,
wèe pↄnnaa kɛɛ kↄ̃n gudakɛnao.
16 N nɛ́gↄ̃gbɛ̃nↄ é gↄ̃ n denↄ gɛ̃ɛ ũ,
nɛ́ ń diɛdiɛ kínanↄ ũ anduna guu píngi.
17 Mɛ́ tó n tↄ́ gↄ̃ dↄ gbɛ̃nↄn yãana sai,
boriinↄ égↄ̃ n sáabu kpaa gurↄ píngi.