80
Isarailinↄ suna ń gwena ziia aduakɛna
Asafa lɛ̀.
1 Ǹ swã kpá, Isarailinↄ Dↄn'aɛde,
mmↄn kɛ̀ nɛɛ̀ Yusufu boriinↄ dã lán sãa bà.
Ǹ bↄ ǹ mↄ́, mmↄn kɛ̀ ń vɛ̃ɛna kɛrubunↄ dagura,
2 ǹ dↄ Ɛflaimu boriinↄnɛ aɛ
kↄ̃n Bɛyãmi boriinↄ kↄ̃n Manase boriinↄ.
Ǹ fɛɛ kↄ̃n n gbãaao, ǹ mↄ́ ǹ wa mì sí!
3 Luda, ǹ tó wà ɛara wà su wa gwena ziin,
ǹ uu werewa, ǹ wa mì sí.
4 Dii Luda Zĩ̀kpɛde,
nɛ́ fɛ̃ ǹ gí n gbɛ̃nↄ aduakɛna sízi ai bↄrɛmɛ?
5 N wɛ́ɛ'i dↄ̀ńnɛ ń pↄ́mina ũ,
n ń wɛ́ɛ'i yↄ̃̀ńnɛ à pↄ́ pà, aↄ̃ↄ mì.
6 Ń tò wa gↄ̃ fabona pↄ́ ũ wa saɛdeenↄnɛ,
wa ibɛɛnↄↄ e wa lalandi kɛɛ.
7 Luda Zĩ̀kpɛde, ǹ tó wà su wa gwena ziia,
ǹ uu werewa ǹ wà mì sí.
8 N geepi lí wùrɛ Igipiti,
n pɛ boriinↄa, ben ń lí pì pɛ̀ aↄ̃ gbɛ̀n.
9 N guu kɛ̀kɛnɛ à kãsãa pɛ̀ɛ,
ben à ↄ tà à guu sì.
10 À ↄra dà kpiiinↄla,
à gã̀nↄ dɛ sida lí bítanↄla.
11 À ↄ tà à kà ai ísia lɛ́a,
à ↄnɛnↄ kà ai Yuflatizi.
12 Bↄ́yãnzin n à kara gbòrozi
lɛ gbɛ̃ kɛ̀ aↄ̃ↄe gɛ̃tɛɛnↄ gↄ̃ ↄ maɛɛ à nɛ́zi?
13 Kyàkpanↄ è lɛ́ kázi wà bi,
nↄ̀bↄsɛ̃tɛnↄ è mↄ́ wà à lá ble.
14 N yã nna! Luda Zĩ̀kpɛde, ǹ ɛara ǹ aɛ dↄwa!
Zaa musu ǹ wɛ́ɛ kpáɛ ǹ gwa!
Ǹ làakari dↄ geepi lí kɛ̀a,
15 borii kɛ̀ ń pɛ̀ n zĩndaa,
nɛ́ kɛ̀ ń sì n pↄ́ ũu pì.
16 Wà n geepi lí pì zↄ̃̀, wà tɛ́ sↄ̃̀a,
n wɛ́ɛ tɛ̃aa pìtiḿma, ben aↄ̃ↄe kaatɛɛ.
17 Ǹ ↄ kúɛ gbɛ̃ kɛ̀ kú n ↄplaazia,
gbɛ̃ntee nɛ́ kɛ̀ ń sɛ̀ n pↄ́ ũu pì,
18 wé kɛ̃mma dↄro.
Ǹ wa kuuna kɛkɛ ǹ kɛwe, wé n sísi.
19 Dii Luda Zĩ̀kpɛde,
ǹ tó wà su wa gwena ziia,
ǹ uu werewa ǹ wa mì sí.