116
Gbɛ̃ kɛ̀ bↄ̀ gaa lɛ́zĩ Dii sáabukpana
1 Má ye Diizi, zaakɛ à ma yã mà,
à ma wiipɛnaazii mà.
2 Mɛ́gↄ̃ à sisii ai ma wɛ̃̀ndi lɛ́n,
kɛ̀ à swã kpàmazi yãnzi.
3 Ga bà fĩ̀kãmazi yã,
mira wãwãa tↄ̃̀ma,
wɛ́ɛtãmma kↄ̃n pↄsiaao dàmala.
4 Ben ma Dii sìsi ma bè:
Dii, n yã nna, ǹ ma mì sí.
5 Dii sùu vĩ bensↄ̃ à maa,
wa Ludaa wɛ̃nda vĩ.
6 Dii è gbãasaideenↄ dãkpa,
kɛ̀ ma busa, à ma mì sì.
7 Ma swɛ̃̀, ǹ kɛkɛ ǹ kpáɛ,
zaakɛ Dii yã maaa kɛ̀nnɛ.
8 Dii, n ma bↄ gaa lɛ́zĩ,
n wɛ́ɛ'i gògomɛ, nɛ́ɛ tó ma gɛ̃̀n síro,
9 lɛ màgↄ̃ tɛ́ n aɛ gbɛ̃ bɛ̃ɛnↄ kukiia kɛ̀.
10 Baa kɛ̀ nawɛ̃a tↄ̃̀ma ma gↄ̃ búgubugu,
má kpɛ́ à náanɛ vĩ, ben ma yã ò.
11 Ma bídi kɛ̀ ma bè:
Gbɛ̃ píngi nɛ́ ɛgɛdeenↄmɛ.
12 Bↄ́n mɛ́ fĩa boo Diinɛ
à maaa kɛ̀ à kɛ̀mɛɛ musu píngii?
13 Mɛ́ Dii mìsina togo sɛ́ musu,
mɛ́ à sísio.
14 Mɛ́ lù kɛ̀ má sɛ̀ Diinɛnↄ papa
à gbɛ̃nↄ wáa ń píngi.
15 Dii yãmarinↄ gana bɛ̀ɛ vĩnɛ.
16 Dii, n yã nna, n zↄ̀blerin ma ũ,
nↄgbɛ̃ kɛ̀ à dↄ̀nzi nɛ́n ma ũ,
n ma bↄ bàn.
17 Mɛ́ kɛnnakↄ̃o saa omma,
mɛ́ n sísio, Dii.
18 Mɛ́ lù kɛ̀ má sɛ̀ Diinɛnↄ papa
à gbɛ̃nↄ wáa ń píngi
19 à kpɛ́ ua Yerusalɛmu guu.
Aleluya!