1 Dii, ǹ ma sí gbɛ̃ zaaanↄa,

ǹ ma dãkpa gbɛ̃ pãsĩnↄ yãnzi.

2 Aↄ̃è yã zaaa laasuu lɛ́ ń swɛ̃̀ guu,

swèen aↄ̃ègↄ̃ wɛtɛɛ gurↄ píngi.

3 Aↄ̃è ń lɛ́ kɛkɛ lán mlɛ̃̀ bà,

aↄ̃ lɛ́gbɛ nɛ́ pitigoo sɛwɛɛmɛ.

4 Dii, ǹton tó gbɛ̃ zaaanↄ ↄ namaro,

ǹ ma sí gbɛ̃ pãsĩnↄa,

aↄ̃è lɛ́ kpakↄ̃sↄ̃ lɛ wà ma pãɛ.

5 Wadadeenↄ wɛ̀ɛ yↄ̃̀mɛ,

aↄ̃ takutɛɛ kpàkpamɛ,

aↄ̃ bà kpàmɛ zɛ́n.

6 Dii, ma bènnɛ: Ma Ludan n ũ,

ǹ swã kpá ma wɛ̃nda wiiizi, Dii.

7 Dii Luda, ma mìsiri gbãaa,

mmↄn kɛ̀ nɛɛ̀ ↄ kúmala zĩ̀lan,

8 ǹton tó gbɛ̃ zaaanↄ ń pↄyezi zɛ́ ero,

Dii, ǹton tó aↄ̃ lɛ́kpakↄ̃sↄ̃na kↄ̃ sɛ́ro.

9 Gbɛ̃ kɛ̀ aↄ̃ↄ ligamaziinↄ,

yã zaaa kɛ̀ aↄ̃ↄe ma kpákpaao wí ń musu.

10 Tɛ́yↄ̃ wãaa kúḿma, wà ń zu tɛ́n,

aↄ̃ si wɛ̀ɛ kɛ̀ aↄ̃é bↄnloo guu.

11 Ǹton tó gbɛ̃yakarinↄ zɛkii e anduna guuro,

ǹ tó kisira gↄ̃ gbɛ̃ pãsĩnↄ wɛɛ zɛna sai.

12 Má dↄ̃ kɛ̀ Dii è yã nnaa kpá wɛ̃ndadeenↄa,

è yã kɛkɛ takaasideenↄnɛ a zɛ́a.

13 Yãpura, gbɛ̃ maaanↄ é n tↄ́ bↄ,

nↄ̀sɛpuradeenↄ égↄ̃ kú n aɛzĩ.