Luda yã takada kↄ̃n Bokobaru yão SAAMUNƆ 142

142

Aduakɛna gbɛ̀wɛɛn

Dauda aduakɛna gurↄↄ kɛ̀ à kú gbɛ̀wɛɛn.

1 Mɛ́ɛ ↄ́ gbãaa dↄↄ Diinɛ,

mɛ́ɛ wɛ̃nda wii pɛɛ Diizi.

2 Mɛ́ɛ ma yã'ↄ̃amma bↄɛɛnɛ,

mɛ́ɛ ma nawɛ̃akɛna tↄ̃kɛ̃ɛnɛ.

3 Tó ma nↄ̀sɛ yàka búgubugu,

ḿbe nɛɛ̀gↄ̃ ma tá kɛ̀sɛ dↄ̃.

Wà takutɛɛ kpàkpamɛ ma zɛ́n.

4 Ǹ wɛ́ɛ sɛ́ ǹ ma ↄplaa gwa,

gbɛ̃ke è ma yã daro.

Má nakii vĩ dↄro,

gbɛ̃ke è ma aafia gbekaro.

5 Dii, mɛ́ɛ wii pɛɛnzi ma bè:

Ḿbe ma utɛkii ũ,

ḿbe ma baka ũ andunan.

6 Ǹ swã kpá ma wiipɛnazi,

zaakɛ ma gↄ̃ múkumukumɛ.

Ǹ ma sí gbɛ̃ kɛ̀ aↄ̃ↄe pɛɛɛmaziinↄa,

zaakɛ aↄ̃ gbãaa dɛmala.

7 Ǹ ma bↄ kagurakɛna kɛ̀kiin,

lɛ mà n tↄ́ bↄ,

gbasa gbɛ̃ maaanↄ ligamazi

kɛ̀ n yã maaa kɛ̀mɛ yãnzi.