145
Dii táakilɛna a maakɛna yãnzi
Dii táaki kɛ̀ Dauda lɛ̀.
1 Mɛ́ n táaki lɛ́, ma Luda ma Kína,
mɛ́gↄ̃ n tↄ́ bↄↄ gurↄ píngi.
2 Mɛ́gↄ̃ n sáabu kpaa lán guu e dↄↄ nà,
mɛ́gↄ̃ n táaki lɛɛ yãana sai.
3 Dii bíta, à kà wà à táaki lɛ́,
à bítakɛ lɛ́ vĩro.
4 Kpàɛnↄ é n yãkɛnanↄ sáabu kpá Wurenↄnɛ,
aↄ̃é n yãbitakɛnanↄ kpàakpa kɛ.
5 Aↄ̃é n maakɛ bíta gakuide yã o,
mɛ́ n yãbↄnsaɛkɛnanↄ laasuu lɛ́.
6 Aↄ̃é n yãkɛna naaside gbãa yã o,
mɛ́ n bítakɛɛ tↄ̃kɛ̃ńnɛ.
7 Aↄ̃é n maakɛ bíta baaru kpá,
aↄ̃é guda kɛ n yãzɛdekɛnanↄ yãnzi.
8 Dii sùu vĩ kↄ̃n wɛ̃ndaao,
è pↄ fɛ̃ kpaaro, à gbɛ̃kɛɛ vĩ bíta.
9 Dii è à maaa kɛ baade pínginɛ,
è a pↄ́ kɛ̀ à kɛ̀nↄ wɛ̃nda gwa ń píngi.
10 Pↄ́ kɛ̀ ń kɛ̀nↄ é n sáabu kpá ń píngi,
n yãmarinↄ é n tↄ́ sɛ́ lezĩ, Dii.
11 Aↄ̃é n kpata gakui gari kɛ,
aↄ̃é n iko gbãa yã o,
12 lɛ gbɛ̃ píngi n yãbitakɛnanↄ dↄ̃
kↄ̃n n kpata maa gakuide yão.
13 N kpata nɛ́ kpata yãanasaimɛ,
nɛ́gↄ̃ dɛ kí ũ ai wa boriia.
Dii náanɛ vĩ yã kɛ̀ à ò píngi musu,
à sùu vĩ kↄ̃n pↄ́ kɛ̀ à kɛ̀nↄ ń píngi.
14 Dii è gbɛ̃ kɛ̀ aↄ̃ↄe lɛɛɛnↄ kũ,
è gbɛ̃ kɛ̀ nawɛ̃a tↄ̃̀ḿmanↄ fɛɛ.
15 Pↄ́ píngi wɛ́ɛ dↄnzi,
nɛɛ̀ pↄ́blee kpáḿma à gurↄↄa.
16 Nɛɛ̀ ↄ porońnɛ pↄ́ mↄ́ḿma,
nɛɛ̀ pↄ́ píngi pↄyezi bↄkↄ̃tɛnɛ.
17 Dii yãkɛnanↄↄ maa píngi,
à gbɛ̃kɛɛ vĩ a yã píngi kɛna guu.
18 Dii kĩi kↄ̃n a sìsirinↄ ń píngi,
gbɛ̃ kɛ̀ aↄ̃è à sísi kↄ̃n yãpuraaonↄ.
19 È a vĩakɛrinↄ pↄyezi bↄkↄ̃tɛńnɛ,
è ń wiipɛna ma à ń mì sí.
20 Dii è gbɛ̃ kɛ̀ aↄ̃ↄ yeaziinↄ dãkpa ń píngi,
mↄde eé zaakɛrinↄ kaatɛ.
21 Dii táakilɛna égↄ̃ da ma lɛ́n,
pↄ́ píngi gↄ̃ à tↄ́ kɛ̀ kú adona bↄↄ gurↄ píngi.