Luda yã takada kↄ̃n Bokobaru yão ZIA YÃ 18

Babilↄnu lɛɛna

1 Beee gbɛra ma malaika pãnde è bↄna ludambɛ. À iko bíta vĩ, à gakui anduna pù. 2 À wii gbãaa lɛ̀ à bè:

Babilↄnu lɛ̀ɛ, wɛ́tɛda tↄ́dee pì lɛ̀ɛ.

À gↄ̃̀ zĩnnↄ kúkii ũ, tãa bori píngi tò ũ,

bãa kɛ̀ wè ń tɛ̃̀ bo wà zańgunↄ bɛɛ ũ.

3 Zaakɛ bori píngi à pãpãkɛna wɛ̃ɛ

kɛ̀ è mↄ́ Luda pↄfɛ̃o mì.

Anduna kínanↄ pãpãa kɛ̀o,

ben anduna laatarinↄ kɛ̀ auzikideenↄ ũ

à nnamana bíta guu.

4 Ben ma kòto pãnde mà bↄna ludambɛ à bè:

À bↄɛ à guu ma gbɛ̃nↄ,

lɛ a ↄↄ tóngↄ̃ kú à durunnↄ guu

yã kɛ̀ weé mↄ́nɛnↄ tón a lero yãnzi.

5 Zaakɛ à durunnↄ gbã̀ à zↄ̃̀ ludambɛɛa,

ben à dàkɛnanↄ dↄ̀ Ludan.

6 À fĩa bonɛ yã kɛ̀ à kɛ̀ńnɛa,

à kɛnɛ à yãkɛnaa lɛo plaa.

À pↄfɛ̃ wɛ̃ kánɛ a togoon

dɛ pↄ́ kɛ̀ à kàńnɛla lɛo plaa.

7 À wãwã kↄ̃n wɛ̃ndaao kpázi,

lán à tↄ́ kɛ̀ nnamana guu lɛ́n nà.

Zaakɛ è be a swɛ̃̀ guu,

kínan a ũ vɛ̃ɛna a kìtaa,

gyaanↄ takaasideen a ũro,

é sósobi kɛ zikiro.

8 Beee yãnzi kisia kɛ̀kiinↄ é à le gurↄ dozi,

gagyã kↄ̃n wɛ̃ndaao kↄ̃n nↄaao.

Tɛ́ bé eé à kpáta,

zaakɛ Dii Luda à yãkpaɛkɛri gbãa.

9 Anduna kína kɛ̀ aↄ̃ pãpãa kɛ̀o aↄ̃ nnaa màonↄ, tó aↄ̃ à tɛ́kũna luguu è, aↄ̃é ↄ́ↄ dↄ aↄ̃é kpãngeda kɛ. 10 Aↄ̃é zɛ kãa vĩa guu wãwãa kɛ̀ wà kpàzi yãnzi aↄ̃ be:

Wãiyoo, wãiyoo, wɛ́tɛda bíta!

Wɛ́tɛda ikode Babilↄnu!

Yã mↄ̀ à vɛ̃̀ɛmma gurↄ do gↄ̃ↄↄ́?

11 Anduna laatarinↄ é ↄ́ↄ dↄ se, aↄ̃é sósobi kɛnɛ, kɛ̀ gbɛ̃ke é ń laa kɛ̀kiinↄ lúḿma dↄro yãnzi: 12 Vura, kondogi, gbɛ̀ bɛ̀ɛdeenↄ, òsonↄ, bisa ↄↄdeenↄ, bisa tɛ̃a kↄ̃n à gaarura'ideenↄ, siliki, lí maa bori pínginↄ, pↄ́ kɛ̀ wè kɛ kↄ̃n wesaswaaonↄ kↄ̃n lí bɛ̀ɛdeenↄ kↄ̃n mↄ̀gotɛ̃nↄ kↄ̃n mↄ̀sinↄ kↄ̃n gbɛ̀ puraanↄ píngi, 13 lítɛɛ gũ nnannaanↄ, dò pↄ́nↄ, tuaetitinↄ, lí'ↄ gũ nnannaanↄ, geepiwɛ̃ɛ, nↄ́si, flawa, pↄ́wɛɛnↄ, zùnↄ, sãanↄ, sↄ̃nↄ kↄ̃n ń góronↄ, zↄ̀nↄ kↄ̃n gbɛ̃ntee wɛ̃̀ndinↄ. 14 Weé benɛ: Pↄ́ maaa kɛ̀ nɛɛ̀ à ni dɛɛnↄ yã̀amma píngi. N nnamana kↄ̃n n gakuio pìtingu píngi, nɛ́ e ziki dↄro.

15 Laatari kɛ̀ aↄ̃ kɛ̀ auzikideenↄ ũ wɛ́tɛdaa pì gãzĩnↄ é zɛ kãa vĩa guu wãwãa kɛ̀ wà kpàzi yãnzi. Aↄ̃é ↄ́ↄ dↄ wà sósobi kɛ 16 aↄ̃ be:

Wãiyoo, wãiyoo wɛ́tɛda tↄ́de!

À táaru bisa yì yã

kↄ̃n bisa gaarura'ideeo kↄ̃n à wɛ́ɛ tɛ̃adeeo.

À zãblebↄ kɛ̀ wà pì kↄ̃n vuraonↄ dà yã

kↄ̃n gbɛ̀ bɛ̀ɛdeenↄ kↄ̃n òsonↄ.

17 À auziki píngi kàatɛ gurↄ do gↄ̃ↄ.

Góro'itɛ diinↄ kↄ̃n táa'orinↄ kↄ̃n góro gbɛ̃nↄ kↄ̃n gbɛ̃ kɛ̀ aↄ̃è zĩi kɛ ísiaalaanↄ é zɛ zã̀azã ń píngi. 18 Tó aↄ̃ wɛ́tɛdaa pì tɛ́kũna luguu è, aↄ̃é wii lɛ́ wà be: Wɛ́tɛda kee kuu yã kɛ̀ à bíta kà wɛ́tɛdaa kɛ̀kii ũro. 19 Aↄ̃é ↄ́ↄ dↄ aↄ̃é kpãngeda kɛ, aↄ̃é sósobi kɛ aↄ̃é wii lɛ́ wà be:

Wãiyoo, wãiyoo wɛ́tɛda tↄ́de!

Gbɛ̃ kɛ̀ aↄ̃ góro'itɛ vĩ ísiaalaanↄ píngi

kɛ̀ auzikideenↄ ũ wɛ́tɛdaa pì auziki kɛ̀ dìn sàabu,

ben à gↄ̃̀ bɛzĩ ũ gurↄ do gↄ̃ↄ.

20 À pↄnnaa kɛ à yã musu ludambɛdeenↄ kↄ̃n Luda gbɛ̃nↄ kↄ̃n à zĩ̀rinↄ kↄ̃n à annabinↄ, zaakɛ Luda bé à gɛ̃ɛ bòaare.

21 Ben malaika gbãadee gbɛ̀ kɛ̀ kà wísilↄgbɛ gbɛ̃̀ntɛ̃ ũu sɛ̀ à zù ísiaa guu à bè:

Lɛn weé wɛ́tɛda tↄ́de Babilↄnu zun lɛ kↄ̃n gbãaao,

weé wɛ́tɛdaa pì e ziki dↄro.

22 Weé mↄrↄ ke gã̀gã'ↄ

ke kure ke kãkãki'ↄ ma n guu ziki dↄro.

Weé ↄzĩkɛri ke e n guu ziki dↄro.

Weé wísilↄgbɛ kĩi ma n guu ziki dↄro.

23 Weé fitia gupuraa e n guu ziki dↄro.

Weé nↄsɛkĩi ma n guu ziki dↄro.

N laatarinↄ nɛ́ anduna gbɛ̃nsinↄmɛ yã,

n pↄ́ dà bori píngia n ń mì lìɛ.

24 Wà annabinↄ kↄ̃n Luda gbɛ̃nↄ aru è à guu kↄ̃n gbɛ̃ kɛ̀ wà ń dɛ́dɛ anduna guunↄ ń píngi.