1 Toaa kwaimani diana nau ki 'ae, nao molu si faamamanea bae lana wane sui gwana ne da saea kera too 'ana Anoedoo Abu. Molu ilitoda ki sui guu uri molu ka dao toi kera da too mamana guu 'ana Anoedoo Abu God ma nao ka nao guu. Molu ade 'uri nai, suli na brofet susuke 'oro ki da lea sui na kau laona molaagali. 2 Aia, si doo ne faatainia 'e'ete lana waa ne too 'ana Anoedoo Abu God fai waa ne nao, ne 'urii: Waa ne nia saea sa Disas Kraes nia lea mai ma ka liaewane, waa nai ne nia too 'ana Anoedoo nia God. 3 Ma waa ne nia tofea si doo nai sulia sa Disas, waa nai 'e nao si too 'ana anoedoo ne lea mai faasia God. Na anoedoo ne nia too ai 'e lea mai faasia na malimae nia sa Disas Kraes. Kamolu molu rongo naa bae nia kai dao mai, ma sui nia 'e nii naa laona molaagali.

4 Kamolu wela nau ki, kamolu ne toaa nia God ma molu ka siitasa naa faafia brofet susuke nai ki, suli na Anoedoo Abu God ne too 'ani kamolu 'e tetede tasa ka talua sa Saetan ne nii 'ana toaa ta'aa nee laona molaagali. 5 Ma na brofet susuke nai ki, kera toaa fasi molaagali ma daka bae lau gu sulia si manata lae wane 'ana molaagali ma na wane 'ana molaagali ki lau gu daka ade suli kera. 6 Ma ni kolu toaa nia God ki 'ana ne. Nia 'uri nai, waa ne nia saitomana God, nia 'ana ne roo suli kolu. Ma tii ne nia nao lau waa God, nia 'afitai ka roo suli kolu. Si doo nai gu ne adea kolu ka saitomana 'e'ete lana Anoedoo Abu mamane ma na anoedoo susuke.

7 Toaa kwaimani nau ki 'ae, kolu ka liosau 'ani kolu kwailiu, suli na liosaue nia lea mai faasia God. Ma tii ne faatainia liosaue, nia futa 'ana God ma ka saitomana God. 8 Ma tii ne nao si faatainia liosaue, nia nao si saitomana God, suli God gwana ne liosaue. 9 Ma God, faatai lana 'ana liosaue fuakolu nia 'urii: God nia falea mai tii fa 'Alakwa 'autania nia fua laona molaagali, uri kolu ka mauri 'i nunufana. 10 Aia, na liosaua mamana nee nia 'urii: Kolu nao ne kolu liosau 'ana God 'i nao, God 'ana ne liosau 'ani kolu 'i nao, ma ka falea mai tii fa 'Alakwa 'autania nia mala 'ana afuafua*Afuafua uri God ka ngalia ma ka manata lukea abulo ta'aa laa kolu ki ma ka kwaimani fai kolu. uri ngali lana abulo ta'aa laa kolu ki.

11 Toaa kwaimani diana nau ki 'ae, God nia liosau 'asia naa 'ani kolu nai. Nia 'uri nai, kolu ka faatainia lau guu liosaue fuakolu kwailiu. 12 God ne ta waa nao si suana 'ua. Ma sui lea kolu faatainia liosaue fuakolu kwailiu, God nia tiidooa fai kolu, ma na liosaua nia 'ani kolu ka fono.

13 Ni kolu saitomana kolu 'ado kwaimani fai God ma nia ka 'ado kwaimani fai kolu, suli ne nia falea Anoedoo Abu nia fuakolu. 14 Ma ni kameli meli suana ne God na Maa nia falea mai 'Alakwa nia uri faamauri lana toaa ki sui lao molaagali, ma meli bae folaa sulia si doo nai fua toae ki sui. 15 Tii ne nia bae folaa ka saea sa Disas nia 'Alakwa God, waa nai nia too kwaimani fai God, ma God ka too kwaimani lau guu fai nia. 16 Ma ni kolu saitomana ma kolu ka faamamanea liosaua ne God nia faatainia fuakolu.

God, nia gwana ne liosaue. Tii ne nia too 'ana liosaue, waa nai ne nia tiidooa fai God ma God ka tiidooa fai nia. 17 Lea sa kolu liosau mamana 'ana toae ki, na mauria kolu ki lao molaagali nia mala lau guu na mauria sa Disas Kraes. Lea nia 'uri nai, kolu 'afitai kolu ka mau 'afa dani 'ana kwai ketoi lae. 18 Tii ne nia too 'ana liosaue, nia 'afitai ka mau. Aia, ma na liosaua ne nia 'e fono nia ne taga 'ana maungi lana kwakwaea God. Ma sui, tii ne nao si faatainia liosaue, nia ne kai mau, suli nia maungia kwakwaea nia God. Tii ne nia mau 'ana God 'uri nai, nia faatainia liosaua nia nao si fono.

19 Kolu liosau 'ana God suli nia liosau 'ani kolu 'i nao. 20 Lea ta waa nia saea nia liosau 'ana God ma sui ka too ta'aa gwana fai toolana, nia waa ni suke lae gwana. Nia 'uri nai, suli lea waa nao si liosau guu 'ana toolana ne nia suana, nia 'afitai 'asia naa ka liosau 'ana God ne nia nao si suana guu. 21 Ma na baea fifii ne God falea fuakolu nia 'urii: Tii ne nia liosau 'ana God, nia ka liosau lau guu 'ana toolana.