Kekeda Laa Totoonao Sa Bol Fua Konia Manata Mamana 'I Tesalonaeka
Tesalonaeka nia maefera lao bali lolofaa 'i Masedonia. Sa Bol ne nia lea ka dao 'i Tesalonaeka ka faarongoa toaa nai 'ana maefera baita nai 'ana Faarongoa Diana nee. Na toaa 'oro ne nao lau toaa Diu ki, kera daka manata mamana ma daka lea naa sulia toolangaidooa sa Bol nia toolangainia fuada. Ma sui nao si tau guu, tai toaa Diu ki daka manata ta'aa fua sa Bol, suli na toaa 'oro ki 'asia naa da fafurongo ma daka lea sulia si baea diana nai sa Bol nia bae sulia. 'Uri nai guu kera daka odua naa sa Bol uri ka lea na 'ana faasia maefera nai. 'I seeri, nia ka lea naa uri maefera satana 'i Beria ('Aks 17:1-15).
Tai toaa 'i Tesalonaeka ki lau guu daka lukasia naa raoa kera ki, suli da kwaifii 'ada sa na Aofia nia kai dao 'ali'ali gwana mai. Tai toaa lau daka manata 'abarua 'asia naa, sulia toaa kwaimani kera ki dai mae gwada 'i nao sui fatai dao lana mai sa Disas kafi fuli. 'Uri nai, lao buka nee sa Bol nia bae 'ana 'olosi lana manata laa kera nai ki sulia dao lana mai Kraes. Sa Bol ka saea 'ana fuada uri kera daka rao 'abarua 'ada 'ana raoa naisata 'ani kera ki fai si lioewane 'ana aroaroe, lelea ka dao 'ana si kada Kraes nia dao.
Na 'inifuui baee ki laona buka nee:
Sa Bol nia tangoa toaa 'i Tesalonaeka faafia manata mamana laa kera ma raoa diana kera ki 1:1—3:13
Toolangaidooa sulia na abulo laa ne faaelea God 4:1-12
Toolangaidooa sulia dao lana mai sa Disas Kraes 4:13—5:11
Toolangaidooa 'isi 5:12-28
1
1 Nau sa Bol ma sa Saelas ma sa Timotii ne meli kekeda kau fuamolu konia manata mamana ne molu tiidooa naa fai Maa kolu God ma fai na Aofia kolu sa Disas Kraes, ne molu nii 'i Tesalonaeka.
God ka ade diana ma ka falea 'ana aroaroa nia fuamolu sui.
Na manata mamana laa kera toaa 'i Tesalonaeka
2 'Ana si kada ki sui gwana ne meli foa ki fuamolu, kameli meli tangoa God fuamolu sui guu. 3 Lao foa laa kameli ki 'i naofana God ne kolu maa 'ani nia, kameli meli manata toi na raoa diana ne molu ilia nunufana manata mamana laa kamolu. Kameli meli ka manata toi lau guu na rao nonifii laa kamolu 'i nunufana liosaua ma na manata ngado laa kamolu maasia dao lana mai na Aofia kolu sa Disas Kraes.
4 Toaafuta 'ae, kamolu toaa ne God nia liosau 'ani kamolu, kameli meli saitomana ne God nia fili kamolu naa fuana 'i tala'ana. 5 Suli si kada kameli meli safali faarongo kamolu 'ana Faarongoa Diana nee, kameli nao meli si bae 'ana baea tatakwai gwana. Na rigitaa nia Anoedoo Abu 'ana bae meli bae ai fuamolu. Ma meli ka faatainia lau gu ne kameli meli faamamanea tiifau, ne na Faarongoa Diana nee nia doo mamane. Kamolu molu saitomana gwamolu bae meli faatainia birangaa diane tiifau fuamolu 'ana si kada bae meli too fai kamolu uri 'adomi lamolu lae. 6 Kamolu molu ade lau gu sulia birangaa ne meli faatainia mai siamolu, ne nia birangaa nia Aofia 'ua guu. Kamolu molu ngalia si baea nee meli faatalongainia ma molu ka ele sulia suli na Anoedoo Abu nia falea ele lae fuamolu sui boroi 'ana daka falea 'afitaia ki fuamolu uri maana ne molu manata mamana 'ana Kraes. 7 Si doo nai molu ilia nai ne adea molu ka faatainia birangaa diana nai fua toaa manata mamana nena sui guu 'i Masedonia ma 'i Gris uri kera daka lea lau gu sulia. 8 Suli ni kamolu 'i sena ne faarongoa diana nee sulia Aofia 'e talo kau faasi kamolu ma ka lea fua kule ki sui gwana, nao lau otona gwana lao bali lolofaa 'i Masedonia ma 'i Gris. Na ununua sulia manata mamana laa kamolu 'ana Aofia 'e talofia fere ki sui guu lea ka nao meli si faarongo kera boroi, kera da rongo ka sui naa. 9 Na toae ki sui gwana da unu talongainia ne kamolu molu ele sulia dao lameli kau siamolu. Ma kera daka unu lau gu sulia ne kamolu molu lukasia naa akalo 'e'ete baki molu foosida 'i nao, ma molu ka foosia naa God mamana nee nia mauri firi. 10 Ma kamolu ne molu ka maasia naa dao lana sa Disas 'Alakwa nia God faasi fera 'i salo. Nia tataea sa Disas faasia maea ma sa Disas ne nia faamauri kolu faasia kwakwaea baita ne God nia kai falea mai.