3
Sa Dion Waa ni faasiuabu, nia faarongo talo sulia Kraes
(Matiu 3:1-12; Maak 1:1-8; Dion 1:19-28)
1-2 Si baea nia God 'e dao sia sa Dion 'alakwa sa Sakaraea lao fera kwasi loko. 'Ana kada nai, sa Taebirias nia gwaungai 'ana fera baita 'i Rom tiifau ka dao naa 'ana taafuli fa ngali ma lima fa ngali sarenga nia ki. Aia, ma sa Bontias Baelat nia ka 'inito fua bali lolofaa 'i Diudia, sa Herod ka 'inito fua bali lolofaa 'i Galilii, sa Filib toolana sa Herod lau guu, ka 'inito fua roo brofens neki 'Iturea fai Trakonaetis, sa Lisanias ka 'inito fua 'Abilini brofens. Aia, ma sa 'Anas fai sa Kaeafas daru ka foa ni gwau fua fera 'i Durusalem. 3 Ma 'i seeri, sa Dion ka liufia lao bali fera nai tiifau ninimana kafo 'i Diodan, ka faarongoa toae ki ka 'urii, “Kamolu molu ka bulasi manataa tiifau faasia abulo ta'aa laa kamolu ki uri daka faasiuabu kamolu uri God ka manata luke kamolu faasia abulo ta'aa laa kamolu ki.” 4 'I seeri guu, si baee ne sa 'Aesaea na waa brofet, 'e kekeda ka saea mai 'i nao, ka mamana naa, ne nia bae 'urii, ✡'Aesaea 40:3-5
“Tii waa, nia 'ai fua toae ki lao fera kwasi ka bae 'urii,
‘Molu kwaia taale fua Aofia kai dao mai!
Molu 'olosi diana 'ana taale nai maasi nia! 5 Molu anomia kula kilukilue ki,
molu ka 'eli neneba 'ana kula 'obarusua ki ma labusue ki fai gwa tolo ki.
Molu ka 'olosia taale 'e'eo ki, molu ka saungai dodoloa 'ana kula kwarua ki. 6 Na toae ki tiifau kera dai suana God nia 'e faamauri kera.’ ”
7 Sa Dion ka bae 'urii fuana toaa 'oro ne da lea ki mai siana uri daka siuabu ki 'ada, “Kamolu na birangamolu 'e ilingia birangana baekwa 'i tolo ka sui naa! Sa tii gu 'ana ne saea fuamolu, sae sa lea nao molu si luka boroi 'ana abulo ta'aa laa kamolu ki lea molu siuabu naa molu ka tala gu 'amolu faasia kwakwaea nee God 'e 'ita ka alua ka tio naa? 8 Kaa nia diana, kamolu lea kau molu ka too 'ana tooe ne nia faatainia kamolu abulo ka sui naa faasia abulo ta'aa lae kamolu ki! Ka nao molu si manata lau 'urii, ‘Kameli nee na toaa 'ana kwalafaa sa 'Abraham 'ua gu ne! Nia 'afitai fua God ka kwae kameli!’ Tasi doo lau guu nau ku faarongo diana 'ani kamolu ai 'e 'urii, lea sae God 'e dooria kai ngalia tai maefau 'ana maefau nee 'i seki fua saungai lada 'ana kwalafaa falu sa 'Abraham, nia nao si 'afitai guu fuana uri ili lana! 9 'Ana kada nai boroi 'ana nai, God nia kwaimaakwalii sui naa fua fale lana kwakwaee nai, mala 'ana ta waa bae nia dau 'ana batau ka kwaimaakwalii sui naa uri taba lana 'ai. Ma 'ai neki sui guu kera nao dasi fungu nia kai tabada 'i saegano.”
10 'Uri nai guu na konia nai ki daka ledi sa Dion daka 'urii, “Nee wala, ma tee ne meli kai ilia uri ka faatainia ne kameli abulo ka sui naa faasia abulo ta'aa lae kameli ki?”
11 Nia luuda ka bae 'urii, “Lea 'oe too 'ana roo si ofi, 'oko falea ruana kula fua ai siofaa ne nao gu 'ana tasi ofi. Ma lea 'oe too asi fange, 'oko faa 'ana ai ne fiolo mae gu 'ana.”
12 'I seeri, na toaa nai da kai konia malefo 'ana takis ki, kera da lea lau gu mai uri sa Dion ka faasiuabu kera, dao daka ledi 'urii 'ani nia, “Wala waa ni toolangaidoo 'ae, ma kameli mone? Tee ne meli kai ilia uri ka faatainia ne kameli meli lukasia naa abulo ta'aa laa kameli ki?”
13 Sa Dion nia luuda lau guu ka bae 'urii, “Lea kau molu ka konia gu 'amolu malefo 'o'olo nee 'ua guu 'ana takis. Nao molu si gani si 'idu lau 'i fafona.”
14 Sui lau guu tai toaa ni omee ki ne kera lea lau gu mai uri siuabu lae, dao daka ledia lau guu sa Dion daka 'urii, “Ma kameli mone? Tee ne kameli kai ilia uri ka faatainia ne meli luka naa 'ana abulo ta'aa laa kameli ki?”
Sa Dion 'e luu kera ka bae 'urii, “Lea kau nao molu si sasi naunau lau 'ana ngali lana si doo ta waa, ka nao molu si suke gu 'amolu faafi waa ki uri ngali lana si doo kera ki. Manatamolu ka toli 'ana fai si fofolia kamolu ki.”
15 Na toaa nai ki sui guu kera da maasia gu 'ada dao lana mai na Kraes nai kai dao mai uri faamauri lana toaa nia ki. 'Uri nai kera ka manata 'urii, “Alamia sa Dion na Kraes bae na 'oto nee?” 16 'Uri nai guu sa Dion ka bae na 'urii fuada, “Nau nee, na kafo gu 'ana ne nau ku faasiuabu kamolu ai; ma na waa ne nia kai dao mai buriku nee nia 'inito tasa ka talu nau fatai ma na butu nia ki boroi, nau kusi alamia guu luke lada fasi 'aena. Ni nia waa nai ne kai faasiuabu kamolu 'ana Anoedoo Abu ma 'ana ere. 17 Ma nia kai dao mai fua sangita lana toae ki tiifau, mala waa ni sangitadoo ne kai sangitaa saena wiiti fasi 'e'eforana doe 'i fafona kwaitao ni sangitadooa nia. Ma ka konia migana dooe ka taingai 'e'ete ai lao beu ni taingai fanga laa nia, sui ma kafi ngalia 'e'eforana doe fua suungi lana lao ere ne saru ka totoo firi si mae.”
18 Sa Dion ka faarongoa konia nai ki 'ana si baea ni kwaiarei 'oro ki uri kera ka abulo faasia si birangaa kera ki, ma ka faarongo kera naa 'ana si faarongoa diana nee. 19 Nia ka ngatafia sa Herod waa ne 'inito fua brofens nai, sulia nia sa Herod 'e adea lau gu 'ana baraa nia ni Herodias na 'afe nia sa Filib, na toolana lau gu 'ana. Ma sa Herod nia ka ilia tai doo ta'aa 'oro ki lau. 20 Ma ka fafonaa lau doo neki nia ilia ka ta'aa, nia saea fua toa ni rao nia ki kera daka alua sa Dion lao lookafo.
Sa Disas, kera faasiuabu nia
(Matiu 3:13-17; Maak 1:9-11)
21 'Ana kada bae sa Dion nao si nii 'ua lao lookafo, nia faasiuabua toaa 'oro, ma ka faasiuabua lau guu sa Disas. Kada sa Disas nia lea mai, ma sa Dion ka faasiuabu nia, sa Disas ka foa. Kada nia foa 'uri nai, salo ka 'ifi, 22 ma na Anoedoo Abu nia ka koso mai faafi nia mala 'ana tafa bole. Ma tii si lingee baea ka talo mai faasia 'i langi ka 'urii, “'Oe 'alakwa nau naa ne 'oe tii fa wela 'autania nau ne ku liosau 'ani 'oe. Manata laku 'e ele 'asia naa sulia 'oe.”✡Dionisis 22:2; Sam 2:7; 'Aesaea 42:1
Isifutae sulia kwalafaa ne lea mai lea ka dao 'ana sa Disas
(Matiu 1:1-17)
23 Kada sa Disas nia safalia raoa nia, nia 'e baita mai ka dao naa 'ana olu akwala fa ngali fono ki. Ma toae ki sui gu 'ana kera ka manata 'ada sae sa nia na 'alakwa sa Diosef gu 'ana.
Ma sui sa Diosef nia na 'alakwa sa Hilae 'ana ne.
24 Sa Hilae 'alakwa sa Matat,
sa Matat 'alakwa sa Lifae,
sa Lifae 'alakwa sa Melkae,
sa Melkae 'alakwa sa Danae,
sa Danae 'alakwa sa Diosef.
25 Sa Diosef 'alakwa sa Matataeas,
sa Matataeas 'alakwa sa 'Emos,
sa 'Emos 'alakwa sa Neham,
sa Neham 'alakwa sa 'Eslae,
sa 'Eslae 'alakwa sa Nagai.
26 Sa Nagai 'alakwa sa Meata,
sa Meata 'alakwa sa Matataeas,
sa Matataeas 'alakwa sa Semein,
sa Semein 'alakwa sa Diosek,
sa Diosek 'alakwa sa Dioda.
27 Sa Dioda 'alakwa sa Dioanan,
sa Dioanan 'alakwa sa Risa,
sa Risa 'alakwa sa Serababel,
sa Serababel 'alakwa sa Sialtiel,
sa Sialtiel 'alakwa sa Nirae.
28 Sa Nirae 'alakwa sa Melkae,
sa Melkae 'alakwa sa 'Adae,
sa 'Adae 'alakwa sa Kosam,
sa Kosam 'alakwa sa 'Elmadam,
sa 'Elmadam 'alakwa sa 'Ere.
29 Sa 'Ere 'alakwa sa Diosua,
sa Diosua 'alakwa sa 'Eliesa,
sa 'Eliesa 'alakwa sa Diorim,
sa Diorim 'alakwa sa Matat,
sa Matat 'alakwa sa Lifae.
30 Sa Lifae 'alakwa sa Simion,
sa Simion 'alakwa sa Diuda,
sa Diuda 'alakwa sa Diosef,
sa Diosef 'alakwa sa Dionam,
sa Dionam 'alakwa sa 'Elaeakim.
31 Sa 'Elaeakim 'alakwa sa Milia,
sa Milia 'alakwa sa Mena,
sa Mena 'alakwa sa Matata,
sa Matata 'alakwa sa Neetan,
sa Neetan wela sa Defet waa 'inito bae 'Israel.
32 Sa Defet 'alakwa sa Deesii,
sa Deesii 'alakwa sa 'Obet,
sa 'Obet 'alakwa sa Boas,
sa Boas 'alakwa sa Salamon,
sa Salamon 'alakwa sa Naason.
33 Sa Naason 'alakwa sa 'Aminadab,
sa 'Aminadab 'alakwa sa 'Adamin,
sa 'Adamin 'alakwa sa 'Arani,
sa 'Arani 'alakwa sa Hesron,
sa Hesron 'alakwa sa Beres,
sa Beres 'alakwa sa Diuda.
34 Sa Diuda 'alakwa sa Diakab,
sa Diakab 'alakwa sa 'Aesak,
sa 'Aesak 'alakwa sa 'Abraham,
sa 'Abraham 'alakwa sa Tira,
sa Tira 'alakwa sa Naho.
35 Sa Naho 'alakwa sa Sirag,
sa Sirag 'alakwa sa Riu,
sa Riu 'alakwa sa Beleg,
sa Beleg 'alakwa sa 'Eba,
sa 'Eba 'alakwa sa Sela.
36 Sa Sela 'alakwa sa Keenan,
sa Keenan 'alakwa sa 'Afaksad,
sa 'Afaksad 'alakwa sa Sem,
sa Sem 'alakwa sa Noa,
sa Noa 'alakwa sa Lameki.
37 Sa Lameki 'alakwa sa Metusalaa,
sa Metusalaa 'alakwa sa 'Enok,
sa 'Enok 'alakwa sa Dioret,
sa Dioret 'alakwa sa Mahelalel,
sa Mahelalel 'alakwa sa Keenan.
38 Sa Keenan 'alakwa sa 'Enos,
sa 'Enos 'alakwa sa Seti,
sa Seti 'alakwa sa 'Adam,
sa 'Adam 'alakwa nia God.