1 Nakǝnya paɗ hwanmancha, pathlǝ fǝr shemeɗ somsomǝn, yahwisǝ kǝnuni tǝ ɓahsǝndǝwa. 2 Shinuniwa fari natuni nga fa tǝrmbandǝwa, limfichǝ kuni paɗ shekɗang fichǝ kuni kǝ fa kuwur ɗǝhhachi nguchit shishingchengnandǝsi. 3 Kǝthlǝm ndǝkǝn yahkǝsi kǝ sǝnuniwa nifǝsǝ na shunda hur Shemeɗa Fara na ndatwa: "Yǝso nga'ǝn nakǝnwa" paɗ nifǝsǝ na ndatwa: "Yǝso Lǝmwandǝ nakǝn." Manga nakna hur Shemeɗ Chiɗchiɗ wa.

4 Nakǝnya fǝrtǝsǝ somǝn somǝn, Shemeɗ ǝrtǝ la fǝrkǝ kanda. 5 Mbachǝsi somǝn somǝn i sǝt torcha, chika kichu Lǝmwandǝ ǝrta. 6 Torchǝsi somǝn somǝn, chika kichu kǝmka Farǝ ǝrtǝ la fǝrkǝ tori nat chikawuna sǝta.

7 Chikawuni fǝra Farǝ mba ɓata Shemeɗa kǝthlǝm kǝ kǝsangka chikawunsi. 8 Yuna fǝrang fichǝ Shemeɗ mbǝr shunda, tǝpaɗ yuna Shemeɗ shuwun sǝn'ǝna, natyu tǝ mbǝɗa Shemeɗ ǝrta. 9 Yuna i fǝrkit tǝ mbǝɗa Shemeɗ ǝrta, yuna i kǝnandǝ nofcha ɗi tǝ mbǝɗa Shemeɗini ǝrtǝyu. 10 Yuna fǝrangndǝ alchit sǝt ǝnat pǝɗandǝ nifǝfa, yunǝ i mbu icha Fara le na sǝt kǝmban, yuna i mbǝla sakandǝ shemeɗchǝhi, yuna i sǝn hanshuwunchǝ somǝn somǝn, yunǝ paɗ mbǝla sǝn i nat hanshuwunchi somsomǝnna mbuta. 11 Ichini natyu tora Shemeɗ ǝrtǝ la sǝk kanda, le la sakangnga chikawun nda i yahtǝn.

12 Nda i nat fat ǝrta njarǝchi'en terchin, chikama sokkǝn njarǝchi'en terchin, nakndǝ kǝ fat ǝrta, nak Kǝrǝsti kichuyu. 13 Sangfichi baptisma kǝm nattǝm tǝ Shemeɗ ǝrta kǝ hur fat ǝrta, ndu Yahudawecha, punofcha, ndu mafecha, ndu fichile thlǝk inchengnandaɗi, nattǝm ɗǝfkǝ fichǝkǝm kǝsǝma hur Shemeɗ ǝrta.

14 Fatkǝn nga tahsang fichǝ tǝ njarǝ ǝrtǝwa, paɗ njarǝchǝkǝn terchin. 15 Mana sara ndatwa: "Njang nga har nakiwa, makichu nga naki fa fatwa." Mbutǝ kichu ngu ɗǝfndǝ kǝ sakndǝhi tǝ njarǝchikǝnna fatkǝnwa. 16 Ma na thlǝmata ndatwa: "Kǝthlǝm njang nga hwanitǝwa, makichu nga naki fa fatwa." Mbutǝ kichu ngu ɗǝfndǝ kǝ sakndǝhi tǝ njarǝchikǝnna fatkǝnwa. 17 Ma fatkǝn nat kǝ hwanita, nakficha la sǝkmbǝt tǝ mi? Ma fatkǝn nat kǝ thlǝmata, nakficha la sa mbǝt tǝ mi? 18 Kittǝkǝn Farǝ tahsang njarǝcha hur fata, chikayeni nda i yahtǝn kǝ nandǝsi. 19 Ma nak fatkǝn nat kǝ njarǝchǝ ǝrta, nak fatkǝna natwa kǝni? 20 Nda i natǝn, njarǝchǝ terchin chika kichu fat ǝrta.

21 Hwanitǝ ngu ndanda harwa, "Kǝmiwu'ǝntǝsǝwa." Ndu inda kǝ ndangka harchǝwa, "Kǝmiwu'ǝntǝkuniwa." 22 A mbandǝ somǝn, njarǝchi fafat la kǝlandǝ fichǝwa nda nga kwaakwa'a ndǝwa, kandang naka kechikǝn, 23 Njarǝchi fafat la kǝlandǝ fichǝ nda nga ǝnnakndǝwa, kandang la mwanandani kaǝn. Njarǝchi kamuchiksi kǝ nafichiyu, la kǝlak fichasa kanda, 24 njarǝchi'engnǝm nak ndiichinyu, nga ma safichǝ ǝn kandǝwa. Humang Farǝ njarǝcha fata, nda i ngǝrandǝn njarǝchi farawuchit fichi mwanda, sokkǝn tǝ mwanda fa. 25 Sǝkǝn iniyu kǝthlǝm mǝni saktǝhisa hur fatwa, njarǝchikǝn kǝ la tǝrndǝwa nakndǝ nat keeke. 26 Ma njarǝsǝ ǝrtǝ naka ɓahta, nat ndǝ nanda nata hur ɓahta, ma njarǝsǝ ǝrtǝ fǝrandǝ fichǝ mwanda, nat njarǝchikǝn kǝ mbǝnndǝ fata.

27 Nakǝnya kunang naka fata Kǝrǝsti, chikawun ǝrta hurnuni nakǝn kǝ njarǝchi'en. 28 A kǝtǝn mwanandǝ Fara hertǝ nofchǝhar, saǝn funa tǝrkakǝn kǝ Fathlǝncha, chapatǝkǝn Tapǝnecha, mǝkkatǝkǝn fa sakaɗaɗi, funǝ fa sǝt ǝnat pǝɗandǝ nifǝfa, funǝ fa kǝnandǝ nofchaɗi, funǝ fa kǝsanda nofchǝsi, funǝ fa kǝlandǝ tora nofcha paɗ funǝ fa shundǝ tǝ hanshuwunchǝ somsomǝn. 29 Nat fatǝrmbakǝn fathlǝnchǝwa? Nat fatǝrmbakǝn tapǝnechǝwa? Nat fatǝrmbakǝn fa sakandaɗaɗiwa? Nat fatǝrmbakǝn fa sǝt ǝnat pǝɗandǝ nofchǝfǝwa? 30 Nat fatǝrmbakǝn fa mbǝs fǝr kǝnandǝ nofchandǝwa? Nat fatǝrmbakǝn fa shundǝ tǝ hanshuwunchǝ somsomǝnwa? Nat fatǝrmbakǝn fa mbu sakǝt i shuwuntǝ fichǝ tǝ hanshuwunchǝ somsomǝnwa? 31 Paɗ kam fǝrtǝ somsomǝn tǝ rahta fichile nak ka mwanchin.

Ni cheɗa mbanda kuni le sherkǝ nat tǝ ndata.