1 Nakǝnya, hwanmancha, ni kuɗkanda kuni kwescha shuni ɓassandi kuniyu, le thlǝtuni thlartuni ɗarkǝn. 2 Tǝ mbǝɗa kwescha shuwunkǝn hǝrǝktuni, ma kisshuni shunihar mbwa'andǝ kuni kwaakwaa. Manga kichuuwa fǝrkit engnuni mere.

3 I kamkǝsi sǝnandi kunisi, ndǝkǝn naka i thlǝta, ndatwa: "Kǝrǝsti mǝrkǝnaɗi kǝthlǝm ɓǝɓichitfechengnǝm, nda i natna hur yarat laulawata Farǝ le mbutǝn, 4 ndatwa thloha ficha, farǝ mun mǝkkatǝkǝn thla'aficha, nda i natna hur yarat laulawatkǝn, 5 cheɗaɗǝ fat'ena Kefas kana fichile kumngǝrǝnsǝ chapyu. 6 Kana cheɗa fat'ena hwanmancha fichile sheranga aru ɗurman (500) a farǝ ǝrta, mweefunǝsi tǝ shisshingtafa, chikama sokkǝn funa mirnda. 7 Kana cheɗa fat'ena Yakubu, tǝ tahhǝt fathlǝnchǝkǝn nat. 8 A mweshitkǝn nat, cheɗikǝn fata, nda le ngǝttǝ ficha a fari kamuchiksǝ.

9 Kǝthlǝm njang naka mweshitmiya fathlǝncha, kamuchiksǝ kǝ afichǝwa lǝthlǝnda, kǝthlǝm fǝraɗi ɓahta fa tǝrmbanda Fara. 10 Tǝ mbǝɗa kafata Fara nati kǝ i natiya, kafat'en kǝ mbǝɗengna nga merewa. Shiɗi tor sheraɗi chikawuna hurnanda, chikama sokkǝn nga njangwa, kafaɗi Farǝ nak tǝ njiyu. 11 Ndu njang ndu kaɗang, ɓasskani kichuyu, tǝ kichuyu paɗ fǝrtuni kit.

12 Ma ficha ɓassǝ thlata Kǝrǝsti a hur mǝmatcha, mǝsǝk la ndat funengnuniwa thlata mǝmatchǝsǝwa? 13 Ma nga thlata mǝmatchǝsǝwa, sokkǝn chika Kǝrǝsti thla'awu fichǝwa. 14 Ma thlaawu fichǝ Kǝrǝstiwa, ɓassengnani pofǝn, fǝrkitchiɗengnuni pofǝn. 15 Ma tana nakǝn kichu, shiɗani fa lekta Fara, kǝthlǝm shiɗani sheta kǝ ɗar Farǝwa thla'aɗǝ Kǝrǝsti hur mǝmatcha, le thla'awuchitǝn, ma tǝ kitwa thla'awu fichǝ mǝmatchǝwa. 16 Kǝthlǝm ma thla'awu fichǝ mǝmatchǝwa, sokkǝn Kǝrǝsti ma thla'awu fichǝwa. 17 Ma sokkǝn thla'awu fichǝ Kǝrǝstiwa, fǝrkitchiɗengnuni pofǝn paɗ paaya mwakuni hur ɓǝɓichitfechengnuni. 18 Sokkǝn fichile fǝrkǝkitta hur Kǝrǝsti, kannda mǝrtaɗi thlǝrǝtkǝndaɗi. 19 Ma ɗǝfǝm hanɗǝkiketengnǝm kǝ Kǝrǝsti kǝthlǝm naɗihiya ɗeng, sheraɗima chikawun kǝ ǝnat haɗandǝ nifǝfa.

20 Kitchitkǝn thla'afichǝ Kǝrǝsti a hur mǝmatcha, mǝlan naka tǝrka thlata fichile mǝrkaɗi. 21 Nakǝn ɓak murtǝ tǝ mbǝɗa nifa ǝrta, tǝ mbǝɗa nifǝ ǝrta paɗ ɓat thlata mǝmatcha. 22 Nda i nat ficha mǝmattǝ kǝthlǝm Adamu, kichu paɗ kǝthlǝm Kǝrǝsti nat ficha thla'andǝ nofchǝ nat. 23 Nak thlakǝna nata ndera chikawun tǝ witǝ ikǝn, Kǝrǝsti na nata tǝrkakǝn, kana fichile naka ikǝn a fari natna ngǝrandǝ'in. 24 Kana mweshitmikǝna ɓata, fari natna fǝra kuturǝchita Fara Shinda, ɗifitǝ wuwwelandǝ fa kuturǝchitaɗi, nat tǝ kuturcha tǝ alchita. 25 Waat nan sok kuturǝchita, kana ɗǝf atikrechikǝn kǝ ka sarǝchi'en. 26 Hanmurtǝ naka mweshitmi atikretǝkǝn ti natna ɓǝllanda. 27 "Kǝthlǝm shiɗtǝ ichinat kǝ ka sarǝchi'en" Ma ɗeɗfichǝwa: "Shiɗtǝ ichinat kǝ ka sarǝchi'en", cheɗakissha ɗwaachitkǝnwa nga nat tǝ Farǝ tǝ indǝ'enwa, le ɗǝfkǝ chikamǝnat kǝ ka Kǝrǝsti. 28 Kǝ ngǝrandǝ Farǝ ichiniyu kǝ ka sarǝchi'en, hwankǝn paɗ sokkǝna ka Fara, kana Fara nata chikamǝ tǝ tǝmǝ nat.

29 Manga thlata mǝmatchǝsǝwa, mǝnat nofchiya sǝta, fichile sandǝ fichǝ baptisma kanda kǝthlǝm mǝmatcha? Ma thla'awu fichǝ mǝmatchǝwa kǝpware, kǝthlǝmmǝ la sandǝ fichǝ baptisma nofchǝ kǝthlǝm kandang? 30 Kǝthlǝmmǝ la natma ɗǝf inchengnǝma hur mboro chikayen hanthlǝkta? 31 Wembǝta nja miya hanmurta! Yarkiyaa hwanmancha, kittǝkǝn la thla'ayi'indǝ kǝthlǝm kunang hur Yǝso Kǝrǝsti Lǝmwaɗengnǝm. 32 Ma mbeɗi tǝ pǝktat hanthlucha a Afisa, kǝthlǝm yarengnǝ kǝ ɗar nifa, mǝ naka mbǝstengnǝhar? Mangu ficha thla'andǝ mǝmatchǝwa,

35 Paɗ funǝ nanda sahtǝ ndatwa: "La thla'ang fichǝ mǝmatchǝwa kǝni? Tǝ witǝ fatmǝ natnda ɓata?" 36 Ɓoma! I hǝftu ngu tiftǝwa se ma mirwa. 37 Ma hifna, nga cheta i hǝftu tǝ fatkǝn na tiftǝwa, hanwitǝkǝn ndak. Ndu i alkama ndu hanwitǝ ǝn somǝn. 38 Farǝ la fǝrang fata hanwitǝkǝn nda i yahtǝn, paɗ chika witǝ hanwitǝmi la fǝraǝn fatkǝn'en. 39 Nga nat thlu ǝrtǝwa, nofchǝ tǝ witǝ thlǝwengnanda ǝrta, ɗǝhǝrǝmchǝ tǝ witǝ innanda, ɗishchǝ tǝ witǝ innanda, tinchǝ paɗ tǝ witǝ innanda. 40 Tinɗǝsi i afshi neɗsǝ paɗ i kisshita, mwanda i afshi somǝn, mwanda i kisshitǝ paɗ somǝn. 41 Mwanda hwatfarǝ somǝn, i ndǝraa somǝn, i hanndǝrechǝ somǝn; kǝthlǝm yunǝ hanndǝraa somǝn mwandǝ'en tǝ le. 42 Nakǝn kichu tǝ pathlǝ thlata mǝmatcha. I hǝftǝ ficha nan yirataɗi, i thla'andǝ ficha yirat'ensaɗǝwa. 43 La hǝfkǝ ficha tǝ ɓah fǝr mwanda, thla'ang ficha hur mwanda. La hǝfkǝ ficha hur ɓah alchita, thla'ang ficha hur alchita. 44 Hǝfkǝ ficha hur cheta fata, thla'ang ficha hur fata shemeɗa. Nakǝn fatsǝ i cheta fata, fatsǝ paɗ i shemeɗa.

45 Nakǝn kichu hur yaratkǝn, "Adamu tǝrka nifa sokka nifǝ tǝ shisshingtafa, ndukwalat Adamu shemeɗa lela fǝrkǝ shisshingta. 46 Nga le naka i shemeɗ naka tǝrkakǝnwa, i punifǝchita, kana i shemeɗa. 47 Tǝrka nifa chekna hur furta a hur kisshita, chapatǝ nifa ɓakna hur afshi 48 Nda ini chet nifa hur furtuyu, nakǝn kichuyu tǝ fichile naka i furta. Nda i'ni nat leni hur afshiyu, kichu paɗ natna nata kǝ fichile naka i hur afshi. 49 Nda i'ni tǝrtǝm mirshingta leni cheka hur furtuyu, kichu paɗ natma tǝr mirshingta le naka hur afshi.

50 I nati mbwa'anda kuni, hwanmancha, ngusǝtta faɗengnǝm nda thlu tǝ fwara kǝ yimnda kuturǝchita Farǝwa. Kichu paɗ lǝ yirata ngu mbǝs ǝna a ratǝ le nguchika yiratwa. 51 Kamthlǝmathi, ni mbwa'a ǝna kuni ɓuɓweeta. Ngǝma mǝrtǝ natǝmwa, natǝm naficha ɓuɓweɗandǝkǝmhi, 52 Nda nakǝnya a tǝɓǝrta hwanitǝhi, a mweshitmi kutmeta. Naficha pyandǝ kutmeta, thla'ang fichǝ mǝmatcha tǝ faɗi nguchika yirata, kana ficha ɓuɓweɗandǝ kǝmhi. 53 Kǝthlǝm faɗi na yirata waat kǝ ɓuɓweɗang fichǝhi tǝle nguchika yirata, lela mǝrkǝ paɗ kǝ ɓuɓweɗang fichǝ tǝle nguchika mǝrta. 54 Le na yirata ma ɓuɓweɗa fichǝhi tǝle nguchika yirata, le na mǝrta kǝ ɓuɓweɗang fichǝ tǝle nguchika mǝrta, a mbǝnniyu nat i yarandǝ fichǝhi hur shunda Farǝ nan nǝhhatǝhi ndatwa:

56 Alchita hanmurta ɓǝɓichitfata, kus naka alchita ɓǝɓichitfata. 57 Usoko Fara le fǝrang mbǝs'ǝna kǝmhar tǝ mbǝɗa Lǝmwaɗengnǝm Yǝso Kǝrǝsti. 58 Kǝthlǝm ndǝkǝn hwanmanchinǝ ti yahti, thlaramhi kit, mǝ fohha ǝnkuniɗiwa. Kǝnding kǝ fǝrunǝ fechengnuni nat kǝ tora Lǝmwanda, kǝthlǝm shinuniwa ɓahtengnunihi hur Lǝmwanda ngu nat pofǝnwa.