IMBILA NSUMA YALEMBELE
MATEYO
UBULONDOLOSI
Imbila Nsuma ukulingana na Mateyo kitabo kimo mufitabo fine mukipingo kipya ikilondolola ubwikasi bwakwa Yesu Klistu. Ifi fitabo kila kimo bakita ilandwe. Ikilepilibula Imbila Nsuma. Fyalembelwe panuma yamfwa yakwa Yesu kuli Mateyo, Mako, Luka na Yohani. Abamasambililo tabaisiba ubusiku bwakisinka buntu iki kitabo kyaleembelwepo lelo kitunganisiwa ukuti nimunsita ya 60 AD. Kabili nenkende intu kyalembelwepo tayaisibikwa lelo kitunganisiwa ukuti ni mu Palesitini nangu mumusuba wa Yerusalemu.
Kalemba ni Mateyo uwali kasonkesya wamusonko lintu Yesu talamwita ukuba umusambi. Limbi isina lyakwe bamwisibe nga Lebi. Mateyo ali niumo pabatumwa ikumi nababili kabili alembele bakabelenga baba Yuda. Ifi kuti fyamonwa fyasuntinkanya amalembo yamukipingo kya kale. Ayalefwaya ukulangilila ukuti Yesu ali ni Klistu, Umupususi uwasalwa na Lesa, uo balesesemapo. Nakabili Mateyo alilembele ifingi Pabufumu bwakwa Lesa. Abayunda baleenekela Klistu ukwisaba Imfumu yabufumu bwafikansa. Mateyo alesonsomba apakalamba fintu basuminemo Abayuda mukulondolola Ubufumu bwakwa Lesa ubwamumupasi.
Imbila Nsuma ukulingana na Mateyo kitabo ikisuma ukwambilapo mukipingo kipya pamulandu nafintu kyasuntinkanya kumalembo yamukipingo kyakale. Kyasuntinkanya ifipingo fibili. Abamasambililo basumina ukuti aleesya ukupasyanya imilembele yafitabo fyakwa Mose ifili fitabo fisano ifyabalilapo mukipingo kyakale.
Imilandu yatantama ngefi
Mateyo ayambile Imbila Nsuma mukulondolola pakufyalwa kwakwa Yesu Klistu nokutendeka kwa bupyungisi ikipande (1-4)
Ikyakonkapo Mateyo aloondolola pabupyungisi bwakwa Yesu namafundisyo ayengi ikipande (5-25)
Mukipande kyakulekelesya aalandile pabupyungisi bwakwa Yesu mumfwa yakwe namukusyukuka (26-28)
1
Ifikolwe fyakwa Yesu Klistu
(Luka 3.23-38)
1 Mu emwakonkanine ifikolwe fyakwa Yesu Klistu, umwana wakwa Davidi, uwali mwana wakwa Abulahamu.
2 Abulahamu aafyele Isaaki na Isaaki aafyele Yakobo, na Yakobo aafyele Yuda nabamunina. 3 Kabili Yuda aafyele Paresi na Zara uwaku Tama na Faresi aafyele Esrom, kabili Esrom aafyele Ramu. 4 Kabili Ramu aafyele Aminadabu, Na Aminadabu aafyele Naashoni, na Naashoni aafyele Salumoni, 5 Na Salumoni aafyele Boazi muli Rahabu, na Boazi aafyele Obedi muli Ruti, na Obed aafyele Yesse,
6 Na Yesse aafyele Davidi imfumu, kabili na Davidi imfumu aafyele Solomoni uwali mwana wamukasi wakwe uwaku Uriyasi. 7 Kabili Solomoni aafyele Rehoboam, Rehoboam aafyele Abiya, na Abiya aafyele Asa, 8 kabili Asa aafyele Yehoshafati, na Yehoshafati aafyele Yoramu, na Yoramu aafyele Usaya, 9 Kabili Usaya aafyele Yotamu, na Yotamu aafyele Ahazi, na Ahazi aafyele Hezekiya, 10 Kabili Hezekiya aafyele Manasse, kabili Manasse aafyele Amoni, kabili Amoni aafyele Yosiya, 11 Kabili Yosiya aafyele Yekoniya nabamunina, munsita bapiitilwe mu Babiloni. 12 Kabili panuma babapiita mu Babiloni, Yekoniya aafyele Shiyaliteli, na Shiyaliteli aafyele Zerubabele, 13 Kabili Zerubabele aafyele Abiudi, na Abiudi aafyele Eliakimu, na Eliakimu aafyele Azori, 14 Kabili Azori aafyele Zadoki, na Zadoki aafyele Akimu, na Akimu aafyele Eliyudi, 15 Kabili Eliyudi aafyele Eleyaza, na Eleyaza aafyele Matani, na Matani aafyele Yakobo, 16 Kabili Yakobo aafyele Yosefu muka Mariya, uwafyele Yesu uwitwa Klistu.
17 Eikyo papitile inkulo ikumi nashine ukufuma pali Abulahamu ukufika pali Davidi, kabili ikumi nashine ukufuma pali Davidi ukufika mubusya mu Babiloni, kabili ikumi nashine ukufika mukufyalwa kwakwa Klistu.
Ukufyalwa kwakwa Yesu Klistu
(Luka 2.1-7)
18 Ifi efintu ukufyalwa kwakwa Yesu Klistu kwali. Nyina Mariya aimenwe kuli Yosefu, lelo ilyo tabalaupana asangilwe ukuti, ali nokukwata umwana ukupitila ku maka yakwa Mupasi Wamusilo. 19 Yosefu ali muntu uwalekita ifyalungama, eikyo talefwaya ukumukanina palwalala kabili aalepinga ukubwesya ubwimashi mubumfisolo. 20 Kilya aletontonkanya palifi, malaika wa Mfumu amonekele kuli ena mukiloto nokumweba ukuti, “Yosefu, wemwana wakwa Davidi, witiina ukuupa Mariya. Pantu umwana Mariya akakwata akafuma kuli Mupasi Wamusilo.” 21 Akakwata umwana umwaume kabili ukamwinike ukuti, “Yesu pantu akapususya abantu bakwe kumembu syabo.”
22 Fyonse ifi fyakitike pakuti fintu Imfumu yalandile ukupitila muli kasesema fifikilisye ukuti, 23 “Nakisungu akemita nokukwata umwana umwaume kabili akenikwa Imanuele” (ikilepilibula ukuti, “Lesa ali nafwebo”).
24 Eikyo lintu Yosefu asibwike, akitile fintu malaika wa Mfumu amukonkomesye eikyo aupile Mariya. 25 Lelo tabakumenepo mpaka umwana afyalwa elo Yosefu amwinika ukuti Yesu.