4
Yesu atunkwa
(Mako 1.12-13; Luka 4.1-13)
1 Elo Umupasi watungulwile Yesu mumatololo mukutunkwa kuli Kiwa. 2 Panuma yakufunga insiku amakumi yane akasuba nobusiku, Yesu alyumfwile insala. 3 Kiwa aisile kuli Yesu nokumweba ukuti, “Ngoli Mwana wakwa Lesa, eba aya amabwe yasanguke umukate.”
4 Lelo Yesu ayaswike ukuti, “Kyalembwa ukuti, ‘Tekumukate kweka umuntu engabela no mweo, lelo nikwisiwi lyonse ilifuma mukanwa kakwa Lesa.’ ”
5 Kabili Kiwa apiitile Yesu ku Yerusalemu mu musumba wamusilo, amuninike pamulu wamutenge we Tempele, 6 nokumweba ati, “Ngoli Mwana wakwa Lesa ipose pansi, pantu kyalembwa ukuti,
“Lesa akeba bamalaika bakwe ukukubaka;
bakakwimya muminwe yabo,
pakuti wikaipuntula kumabwe.”
7 Yesu ayaswike ukuti, “Kyalilembwa nakabili ukuti, ‘Wilaesya Imfumu Lesa obe.’ ”
8 Kabili Kiwa atwele Yesu palupili ulutali nokumulangisya amabufumu yapesonde mubukalamba bwayako. 9 Nokumweba ati, “Fyonse ifi ndekupela ngawamfukamina nokunsinsimuna.”
10 Yesu amwaswike ukuti, “Kabiye uko, Kiwa! Kyalilembwa ukuti, ‘Ulesinsimuna Imfumu Lesa obe kabili ekafye eo ulepyungila.’ ”
11 Kiwa asile Yesu kabili nabamalaika baisile nokwisa mupyungila.
Yesu atampa imilimo yakwe mu Galili
(Mako 1.14-15; Luka 4.14-15)
12 Lintu Yesu aumfwile ukuti Yohani nabamwingisya mukifungo, aile ku Galili. 13 Afumine mu Nasareti, aileikala mu Kapenamu, umusumba wakumbali ya mumana wa Galili mukyalo kya Zebuluni na Nafutali. 14 Ifi fyakitike mukufikilisya fintu kasesema Ezaya alandile ukuti,
15 “We Zebuluni nawe Nafutali,
mwefyalo fyabela mumbali ya Bemba, kwisilya lyamulonga wa Yodani.
We Galili wa Bena fyalo!
16 Abantu abaikala mumfimfi
nabamona ulubuto ulukalamba.
Abo abekala mukinsingwa kyamfwa
ulubuuto nalubasanikila.”
17 Ukufuma pali ilya nsita, Yesu ayambile ukusimikila ukuti, “Lapileni, pantu Ubufumu bwamumulu nabupalama!”
Yesu aita abasambi bakwe abakubalilapo
(Mako 1.16-20; Luka 5.1-11)
18 Lintu Yesu aleenda mumbali yamumana wa Galili, amwene bamunina babili Simoni (uwaleitwa Petelo) namunina Andereya baleteya amakonde pantu baali bashila. 19 Yesu abebele ati, “Nkonkeni nkamikita ukuba abashila babantu.” 20 Palyapene basile amakonde nokuya nao.
21 Yesu aendelelekofye ikyalinga nakabili amona Yakobo na Yohani abana bakwa Zebedee. Baali mubwato na wisi Zebedee balelunda amakonde. Yesu alibetile, 22 kabili palya pene basile ubwato na wisi nokuya nao.
Yesu afundisya, asimikila nokundapa
(Luka 6.17-19)
23 Yesu aile mu Galili monse, mukufundisya muma sinagogi, ukusimikila Imbila Nsuma Pabufumu nokundapa amalwele yamisango misango. 24 Ilyasi lyapali ena lyasabankene munkyalo kya Silya kyonse, ikyakuti abantu balemuletela bonse abaali nabalwala, abalekyusiwa kumalwele yamisango misango, abaakwete ingulu, abakifulubi nababulebe nao aalibondepe bonse. 25 Ibumba lyalimukonkele ukufuma ku Galili namu Dekapolisi, ukufuma ku Yerusalemu, ku Yudeya nabusilya bwa Yodani.