Wosheetso Yohans Shints Wosho
Kindo
Woshetso Yohans shino b́ woshts wosho keewi een een git asaabiyotsi biitse detsfe. Bowere han nababituwots Ik'onat Naayo Iyesus Krstosnton ik woto bo detsetwok'o boon kup'iyonat ik wotmanowere t'afiy falitu kootetsuwots bo danirudnatse boatso bokotetuwok'oshe. Manoori tuuts kootets kooti dani gondo t'uup't keshiruwatse be'eyiru datsanton k'aleyiru gonkeyo b́wottsotse, Ik'o naay Iyesus b́jamon ashwoto wee ash nai amalo detso falratse etiiruwoni b́teshi. Daniru manots «Wora eto datsatsi beyosh kic'otse nas' kesha eta» boetfooni b́teshi. Mantonuwere «Sheeng amal detso wotowa ash k'oshosh shun kitso woronton eegor gonkewo» deshatse eta boetfo boteshi.
Han Guut'tso danan k'efat Iyesus Krstos ari ashe, Iyesusi amaniruwotsnat Ik' shuniru jamwotsn boatsatseyosh shunewo boosh geyife ett keewure.
Jamon mas'aafan b́detstso
Kindo 1:1-4
Shaanonat t'aluwona 1:5—2:29
Ik'i nanaúwotsnat Diyablos nana'otsn 3:1-24
Aroonat sheelon 4:1-6
Shuno b́k'alit k'alo 4:7-21
Da'ts imnetiyo 5:1-21
1
Kash aap'o
1 Shin teshts kashi aap'i jango itsh guut'irwonee, kashi aap'anuwere no shishtsonat no aawon nobek'tso, nos'iiltsonat nokishonowere noshu'utsoniye. 2 Kashanwere be'ere noowere bín bek'rone, no b́ jangosh gawitwone. Nihoke teshtsonat noosh be'ets dúre dúri kasho itsh keewitwone. 3 Noonton ik woto itdetseetwek'o nobek'tsok'onat noshishtson itsh keewirwone. Ik nowotitwere nihonat b́ naay Iyesus Krstosntoniye. 4 Nogeneeúwo s'een b́wototiwok'o han itsh guut'irwone.
Ik'o sháán b́wottsok'o
5 Bíyokee noshishtsonat itsh nokewit wosho «Ik'o shááne, t'aluwonwere b́jamon bíyoke aaliye» etiruwoniye. 6 Mansh «Ik'onton ik woto detsfone» erfetsr t'aluwotse nobeetka wotiyal koote nokotiri, no aap'onat nofino arikaliye etee. 7 Wotowa eree bí sháánotse b́ beyirwok'o noowere sháánotse nobeyink'e no atsatsewo ik wotosh faliyank'one. Dab b́ naay Iyesus Krstos s'atsonwor morr jamotse noon s'aytsitwee.
8 Morro deshatsone no'etal notooke no ant'elciri, aronwere noytse aaliye. 9 No morro Ik'osh kish nokewitka wotiyal bí kááwonat amanek b́wottsosh nomorr jamo noosh orowa eteetwe nogond fin jamatsno noon s'ayintsitwe. 10 Morro fineratsone no'etetkawotiyal Ik'one kotetsiye nowoshiri, bí aap'onwere noyitse aali etee.