Wosheetso P'et'ros Shints Wosho
Kindo
Wosh na'o P'et'eros woshts wosh shintso b́ guut'e b́ woshotse «Ik'o marat' b́dek'ts ashuwotsi» ett s'egeyirwotsnat múk'na'a Isiyotsere gaar maantsi kayotse bad'wtsts krstiyaniwotssha, b́ woshotsi een k'os'onwere bo imneti jangosh gishewonat gond bek'on boats bodts nababirwotsi kúp'shonat t'engoyosha, guut'tso han b́ k'aluere b́ k'iro, k'irt b́ tuwo, aanar b́weetwok'osh jangiyetso daniyitwo Iyesus Krstos doo shishiyi aap'o nababirwotssh gawiyosha, Iyesus Krstos beyo ariyetsok'o woshde'r s'iilr gond bek'o k'amoon dek'o boosh b́ geyitwok'owa boosh b́ gawiyiri, hanton deshidek't gond bek'o bo imnetyo s'ayinfre bíamo fadeyarr «Iyesus Krstos b́ be'et aawots» boosh wotit k'awntso bo dek'etwok'o boosh b́ kitsiri.
Guut'tso gond bek'o bo k'amitwok'o kúp'iyoniyere k'osho nababirwots Krstos shuutso sha'irwots beyo boosh b́ geyit narok'o wotar bobetwok'owe boosh b́ gawiri.
Jamon mas'aafan b́detstso
Kindo 1:1-2
Ik' kashiyo gawiyetso 1:3-12
S'ayin wotts kashon beyosh imets izo 1:13—2:10
Kic'or Krstiyaniwots boatse geyetwo 2:11—4:19
Krstiyani maac'nefonat bo fino 5:1-11
Gúúpo 5:12-14
1
1 Iyesus Krstossh wosheets wottso P'et'rosoke, ib wotat P'ant'osn, Gelatiyon, K'ep'edok'iyon, Isiyon, Bitiniyon bad'aat beyirwotssh, 2 Ik'o niho bali b́dantsok'on marat'etswotssh, Iyesus Krstossh alewosh, b́ s'atson fakeyar s'ayonosh, S'ayin shayiron s'ayintseyat galertee, itsh s'aatonat jeenon ankatowe.
Beyar bewosh jangiyetso
3 Iyesus Krstos k'irotse b́ tuwi jangon jamaaw beyosh wititwo jangiyetso noosh imtso, b́ mhreti ayon handr shuwewo noosh imtso, no doonz Iyesus Krstos nihi Ik'o údewe, 4 Bíwere t'afrawo, aawasherawonat gawereraw rstiyo darotse itsh k'anire. 5 Itwere s'uwaatsi aawots be'et kasho imneti weeron Ik' angon koteertee. 6 Dab ay naari fadewwots múk' aawwotssh iti boshiyaniyo ooreratse wotiyaloru amanat it kashtsosh gene'ore. 7 Fadeyan itats b́bodir it imnetiyo arik b́ wotok'o kitsoshe, t'afit awntsonwor dab tawone b́ fadefoni, awntsoniyere bogo k'awnts detsts it imnetiyonmo hank'o fadeyo bísh geyife, it imneti arik wottsanwere Iyesus Krstos b́ be'ewor údon, mangonat iti k'ees'iyeyo itsh daatsitwe. 8 Iyesus Krstosi be'atste wotiyaloru bín shunfte, dab andoor bín bek'o it k'azaloru bín amanirute, hank'oyi err falr keewerawnat mangts gene'on geneeúwirutee. 9 It amantsatse tuutso it kotirwo it kashu woro daatsitwte.
10 Kashi jangansh itsh wotit s'aato bek'on keewts nebiyatiyots aydek' geeyat p'ec'ar s'iilo woshrne. 11 Boyitse beyiru Krstos shayiro Mesihiyo ats bodet gond bek'o, gond beek'oniyere okoon b́ daatsit mango shini kitsre b́ teshi, boowere jaman awri gizeyonat aawk'on b́ wotitwok'o p'ec'at s'ilrne bo teshi, 12 Nebiyiyanots bofinir itsha bako botokosh b́ woterawok'o boosh be'ere b́ teshi, bo finwere darotse wosheets S'ayin shayiri weeron dooshishiyo itsh keewts ashuwots itsh bokeewtso bek'shoone, keewanowere melakiwotswor dab bek'osh tewnroone bo teshi.
S'ayinon beyo
13 Mansh eshe it nibo káátsde'er finosh k'ande'ere, Iyesus Krstos b́ be'et aawots it daatsit s'aatosh s'een wotts jángiyo deshere. 14 Aleyiru nanaúwotsi wotarr bali dáron it detsts gond tewni jafrats sha'ak'ayere, 15 ernmó itn s'eegts Ik'o S'ayin b́ wottsok'o itwere it be jamon S'ayin wotoore, 16 Lew. 11:44-45; 19:2 «Taa S'ayin t wottsok'o itwere S'ayin wotoore» ett guut'ere.
17 Konshoru b́ boga bogshrawo ik ikosh b́ finok'o angishitu Ik'o «Nonihi» etaat it s'eegirwo b́ wottsotse datsanatse ib wotat itbeyirwotse bín shatoon beewere,. 18 It it nihwotsatse it naatts woteraw beyatse itn kéwe t'afit ambaron wee awntson b́woterawok'o danfte. 19 Itn aani kéwédek'e eeg eeg kim deshaw wee ik shap deshaw mereer wottso mangts Krstos s'atsone. 20 Bíwere b́ dane datsan b́ azeraftsere shinon b́ wotor ando s'uwaatsi dúranatsere itsh be'ere. 21 It imnetiyonat it jangitwon Ik'ats b́ wotitwok'o Iyesus weeron bín k'irotse tiztsonat bísh mang imts Ik'on amanitute.
22 Amantsuwotssh kááwon s'eents shuno it detsetwok'o aroosh alewosh it kashu kup'shdek'rte, mansh eshe it nibi s'eenon it ats atsewo ayide shunewere. 23 Gitlo it shuuwe beyar beetwo dúre dúron ned'itu Ik'o aap'on t'afraw shokona bako tafitwonaliye. 24 Mas'aafo b́ etirwok'on;
«Meets tahats jamo totsok'owiye,
B́ mang jamonwere boditsi fundok'owiye,
Totsonwere shuuk'etwe, fundonwere ooshetwe,
25 Isa. 40:6-8 Doonzo aap'tsonmó
Dúre dúrosh kúp'ar beetwe.»
Itsh nabets dooshishiy keewonwere haniye.