Wosheetso P'et'ros Gitl Wosho
Kindo
Woshetso P'et'ros woshts gitlts wosho b́ guut'e k'osh k'osh beyoke fa'a yoots krstiyaniwotsshe. B́ woshotse een keewo kootets daniyirwots gond finonat bodaniyo s'ilitsatse tuut gond ash woti beyo k'efosha. Tuuts kic'wotssh biitso wotitwo Iyesusi bo ááwon bek'tswotsnat b́daniferewre bo waazon shishts ashuwots bobeshits danatse tuutson Ik'onat doonzo Iyesus Krstosko ari dano daatse. Guut'tso bítsnor b́ kitsirwo «Krstos aanar waratse» etiru kooti danoshe, han s'ilitsatse keeweyor «Krstos aanar waaraniyere b́teshiye, Ik'o ash jamo b́morratse bíaanisha bako konwor asho b́ t'afitwk'o b́geerawotsne» etfe.
Jamon mas'aafan b́detstso
Kindo 1:1-2
Krstiyani s'eegeyo 1:3-21
Kootets danirwots 2:1-22
Krstos gitlo aanar b́ woo 3:1-18
1
1 Iyesus Krstossh guutsonat woshef wottso Sim'on P'et'rosoke, Noko Izar Izewernat no ato Iyesus Krstosoke fa'a kááw imnetiyok'o mangts imnetiyo daatstswots itsh, 2 Ik'onat nodoonz Iyesusi danon s'aatonat jeenon itsh ayowe.
Ik'i s'aatonat s'eegetsmanats kup'etwok'o b́ íztsok'o
3 B́mangonat b́dowon noon s'eegtso bín nodantsatse tuutson b́ Ik'i angon kashonat Ik'o aroosh geyitu jamo noosh imre. 4 B́ mangonat b́ dowonn mangts k'awntso detstsonat ayidek't een wotts no jangiru aap'wotsi daatsdek'rone, janigiyets aap'anotsatse tuutson gond tewnatse datsanatse fa'a t'afotse k'ay keer Ik'i doyo kaydek'irwotsi it wotishee. 5 Manatse tuutson keewanots itsh bodabeetwok'o kup'ore, imnetiyatse doo woto, doo wotaatse dano, 6 danatse b́took keewdek'o, b́ took kordek'atse k'amoon kup'dek'o, k'amoon kup'dek'ats Ik' aro, 7 sheeng beeyats eshu eshwi shunewo, eshu eshuwi shuneeyatse shuno dabwere. 8 Keewanots ayaarr itsh bobere itdetsal nodoonz Iyesus Krstosi danosh woteraw shuu deshawwotsi itwoterawok'o iti kotetúne. 9 Keewanotsi deshawonmó wokts keewo bek'ofalaw aaw dooge, beshts b́morratsnowere b́s'ayintsok'o batk'rere.
10 Eshe ti eshwotso! its'eegeyonat itmarat'etsok'o arikon b́woto kitsosh baltsoniyere iki bogo kup'ore, man itk'aliyal b́ jamon gandeyar dihratste. 11 Mank'oon dúre dúrik wotts nodoonznat no aton Iyesus Krstos mengstots kindo s'eenon itsh imetwe.
12 Keewanotsi danfte wotiyalor, it detsts arikeewon itkúp'yalor hanots jango úni aawo itsh gawiyo fal k'ayaatse. 13 Dunkaniyok'o wotts tiatsanitse t befetsosh úni aawo itsh gawiyo kááw araatniye taash b́be'eyiri. 14 No doonz Iyesus Krstos taash b́ kiitstsok'on datsanatse káári k'iron tk'aletwok'o danfee. 15 And taa t kup'ir kááron itatse tk'aleyakon dab keewanotsi úni aawo gawdek'o it falitwok'owe.
Krstos mangi jangosh ááwon bek'tswots bo gawts gawo
16 Nodoonz Iyesus Krstos kúp'onat gitlo aanar b́weyi jango itsh nokeewor, notookon, eeno b́woto no ááwon bek'aat gawirwotsi bako ash weri gondon k'aniyets tururi jafro shoydek'atniyaaliye. 17 «Tmaac' k'eeztso tshunts na'o haniye» etiru k'ááro mangts Ik'oke bísh b́woor, Ik'o nihoke mangonat een woton dek're. 18 Mat. 17:1-5; Mar. 9:2-7; Luk'. 9:28-35 S'ayin guro abaatse bínton noteshor darotse waats k'ááran no notokon shishrone.
19 Jaman nebiyiwots bo keewtso arik b́ wottsok'oniye noosh bogshdek't bo kitsiri, mansh t'alwi beyoke fa'a c'eshosh sheengshde'er it kotfok'o nebiyiwots keewtsono sheengshde'er koto itn geyiyitwe, manowere it k'alit maargoyo b́ gatsfetsosh, datsgatsi mozofu it nibots b́ be'efetsoniye. 20 Jamoniyere shino t'iwintso itsh geytwo S'ayin mas'aafotse fa'o kon naari bek'on keewetso konwor b tookon b́ gawirwok'o bitsosh b́ falawok'oniye.*Asho konwor b́ tookosh b́ gawirwok'on bitsosh falatse etirw k'osh bits bitson Nebiyo konworub́ tookon keewratse etiru biitso imosh falfe. 21 Kon naari bek'o b́jamon ash shunon waratse, ernmó bek'o shayiron jisheyiru ashuwots Ik'oke dek'tinye bokeewi.