Wosheetso P'awlos Gitl Wosho
Teselonk'e Ashuwots Maants
Kindo
Krstos aanar weyi jangosh aatets aato fayo tizfere b́ amtsotse Teselonk'e Ik' mootse fa'a gond bek'o ayefere bi'ami, P'awlos Teselonk'e ashuwotssh b́ guut'ts gitl wosho «Doonzo weyi aawo bodre» etts imnetiyo s'illike b́ teshi, P'awlos Krstos wooniyere shinon «Gond asha» eteets Krstosi k'efiru jishirwotsn datsanats gondonat ale k'azon ayefere ametuwe ett bo imnetiyo káátsosha b́tuu.
Wosh na'o, nababirwotsats gond bek'ona et kic'on boats b́ ayiyalor dab bo imnetiyats bo kúp'itwok'o bonat k'osh binton finirwots bok'alirwok'o bobeyosh geyiyitwo daatsosh kúp'ar bo finitwok'o mank'o sheeng fino finoke boatso bo bazirawok'o kup'shdek't boon b́ izi.
Jamon mas'aafan b́detstso
Kindo 1:1-2
Udona et adaron 1:3-12
Krstos aani weyi jangosh imets dano 2:1-17
Krstani beyi jagosh izetso 3:1-15
B́ ko'ewoko 3:16-18
1
1 Wosh. 17:1 Ik'o no nihinat no doonz Iyesus Krstosok wotts Teselonk'e Ik' meyitsi amantsuwotssh P'awulosoke, Silasnat Timotiyosoke guut'dek't wosheets wosho.
2 Ik'o nihoke no doonz Iyesus Krstosoke s'aatonat jeenon itsh wotowe.
Krstos aanar gitlo b́woor bí ímet angsho
3 Tí eshuwotso! it jangosh Ik'o jam aawo udiruwone, udonwere noosh geyike, no udiruwere it aman amano iki bogt bí eniruwnat it it atsatse shuneyo dabfere b́ amiruwotsne. 4 Mansh eshe gishewonat gond bek'on dab itats b́ bodalor it aawk'o it k'amtsok'onat it imnetiyatse kúp' it wottsok'o keewon noo k'osh Ik' moowwots dagotse wotdekat itn it'irwone.
5 Jam keewan b́ kitsir Ik' angsho arik b́ wotok'onat itwere bísha etaat gond bek'o it dek'ts mengst mansh bodk it wotitwok'oniye. 6 Kááw keew k'alitwo Ik'o b́wottsotse it ats gondbek'o dowirwotsats gond bek'o dowon bok'awntso boosh dashetwe. 7 And gond bek'o daatsirwotswere noonton kashdek'o itsh imetwe. Han b́wotitwere doonzo Iyesus b́melaki kúp'wotsnton darotse b́ oot'oore, 8 bí darootse be'et aat'iru tawone, manoor Ik'o danawwotsnat nondoozo Iyesusko dooshishyosh alerawwotsi sezitwe. 9 Isa. 2:10 Bo doonz shinatsnat bí een mangatse k'aleyaarr dúre dúri t'afon bo sezeti. 10 Bo bo sezitwere manots aawots bík s'ayinwotsoke mangr bín amanir jamwotsoknowere adewosh b́wooree. Itwere noo gawuts gawo dek'at it amantsotse bonton taawetute.
11 Han gawon itsh no eed'irawo nó Ik'o no k'onir b́ s'egots s'eegosh bodtswotsi iti woshr sheeng finosh it detsts shunonat imneti fin jamo bí angon finde itsh b́s'eentsitwok'owe. 12 Mank'o no doonz Iyesus shútso ititsere mangr itwere noko Izar Izewernat no doonz Iyesus s'aatok'on bín it mangitwok'o Ik'o k'onirwone.