Wosheetso P'awlos Wosho
Efeson Ashuwots Maants
Kindo
P'awlos Efeson dats ashuwotssh b́ guut'ts wosh jamoniyere shino b́ t'iwintsir «Ik'o b́ k'umtso b́wotit daronat datsatse fa'a azeets jamo kakweyar Krstos s'uz shirots bowotit aawo b́bodore» (1:10) etiru asaabiyatsne. Aaninwere Iyesus Krstosnton ik wotde'er ash naar jamo iko bowotitwok'o k'umts enan finats bo jitsitwok'o Ik' ashuwotssh gawiyetkee.
Ephesonsh wosheets wosh shints kayo guut'tso ik woti jango dek' b́twtso gawintsdek't, Ik'o niho bíashwotsi aawk'on galb́dek'tsok'o, b́ naay Iyesus Krstosn bomorrosh orowa eto daatsr aawk'on bos'ayinetwok'onat Ik'o een wotts b́ jángiyits aap'o shayiri S'ayini weeron aawk'on ariko b́bek'shtsok'oni b́kitsiri, Gitli kayotse ando aani guut'tso nababirwots ikwotde bobewotse Krstosn bodetsts ikwoto arik b́wotitwok'owa boosh b́gawiyir.
Ashuwots Krstosnton bodetsts ik woton aawk'o ik woto bodetstsok'o k'osh k'osh jewri keewon kitsere, Ik' moowu atsok'o b́ wotor Krstos atsatsi tokok'owiye, Ik' moowu mook'o b́ wotor Krstos b gúratsi shúts eenok'owiye, Ik' moowu moogenk'o b́ wotor K'rtos moodonzk'owiye, wosh han guut'tso Krstos weeron be'ets Ik' deero ayidek't adt b́ keewor dashan gop'at wok wotts kitsone b́ bek'shiri, jam keewono b́ s'iilir Krstos shunone, b́ tooko beshide'er b́ imon, b́ maac' k'ewon, b́ deeronat b́ jenok'one.
Jamon mas'aafan b́detstso
Kindo 1:1-2
Krstosnat Ik' moon 1:3—3:21
Krstosn andr beyo 4:1—6:20
B́ gúúpo 6:21-24
1
1 Wosh. 18:19-21 Ik' shunon Iyesus Krstossh woshek wottso P'awlosoke, Iyesus Krstosn amanek wottswots, Efesonitse beyiru S'ayinwotssh.
2 No nihi Ik'onat nodoonz Iyesus Krstosokere s'aatonat jeenon itsh wotowe.
Krstosn daatseyiru shayiri deero
3 Darotse fa'a shayiri deer jamo Krstosn noon deertso no doonz Iyesus Krstos nihi Ik'o údewe. 4 S'ayinonat eeg eego deshawwotsi wotaarr b́ shinatse nodaatsetwok'o datsu b́ azeftsere Krstos weeron noon gal b́dek'i.
5 Ik'o b́ geetso sheeng keew b́ wottsotse Iyesus Krstos finon b́ nanaúwotskok'o no wotish bale noon marat'b́dek'i. 6 Hanowere b́ k'al b́shune na'o weeron beenon noosh b́ imts mang wotts s'aato b́ úditwok'owe. 7 K'ol. 1:14 Ik' s'aati s'eenatse tuutson b́ naay s'atson keeweyat no morrosh orowa eto daatsrone. 8 B́ s'aatono ayidek't noosh kuut're, danonat dani teleefonowere, 9 Ik'o b́ shuntso Krstos weeron bali b́ k'úmtsok'on ááshat teshts b́shunman no danetwok'o woshre. 10 Dúri s'uwi aawo b́ bodor Ik'o finats b́ jitsts b́ k'úmtsman daronat datsatse beyiru azeets jamwots ko'ide'er ik s'uzo Krstos shirots bo wotitwok'o b́ woshiti.
11 Jam keewo b́ took shunok'on finiru Ik'o bali b́ k'úmtsok'on Krstos weeron b́ jirwotsi no wotitwok'o noon marat'b́dek'i. 12 Man b́wotwere Krstosi jángon shintswotsi wottswots noo Ik'o b́mangosh no úditwok'owe.
13 It it kashosh doo shishi aap' wottso ari aap'o it shishor Krstosi it amani, mank'o bí itsh imosh jangit b́ teshts S'ayin shayri matabo itats togk'rere. 14 Shayiranwere b́ mango údosh b́ wotitwok'o Ik'o bík wotts jamwotsi b́ kashifetsosh nodaatsit naatosh dets nodek'tsoniye.
P'awlos Efeson ashuwotssh Ik'o b́k'ontsok'o
15 Eshe doonzo Iyesusatse it detsts imnetiyonat S'ayin jamwotssh it detsts shuno shishat, 16 itn Ik' k'onon gawfetsat it jangosh Ik'osh údo t'intso need'iratse. 17 Mango bísh wotitwo no doonz Iyesus Krstos nihi Ik'o ayide'er it danetwok'o dani teleefonat bek'i shayiro itsh b́ imetwok'o Ik'o k'onitwe. 18 Aaw naari jangosh it s'egetsok'onat S'ayinwots bo naatet mang wotts ristiyo aawk'o ayi b́ wotok'o it danetwok'o it nibi ááwo b́ sháánetwok'o Ik'o k'onitwe. 19 Dub. 110:1 Tatsdeshaw bí angi eeno noosh amanirúwotssh aawk'o een b́ wotok'o it danetwok'o Ik'o k'onitwe, 20 Bí anigi eenano finats b́jiitsi k'irotse tuzdek't darotse b́ k'ano maants b́ beeztso Krstosne. 21 Ik'o niho Krstosi darotse b́ k'ano maants b́ beez aaw naari alguroniyre, aloniyere, naashoniyere, angoniyere, doonzwottsonat shúúts jamoniyere damb aaninwere datsan s'uzats b́ woterawo weet datswatsnorniye. 22 Dub. 8:6 Jam keewo b́ aali shirots woshdek't bísh b́keewiyi, Ik' maatsnowere jamoniyere damb b́ wotitwok'o tooko bín b́ woshi. 23 K'ol. 1:18 Ik' moowniye bí atsuniye, jamó b́ jamon s'eentsitwo bín s'eenon kiitsitwaniye.