4
Atso ik b́wotok'o
1 Eshe doonzosh t fintsosh tipeets wottso taa, it s'eegets s'eegosh geyik wotts beewon it beetwok'o itn k'onirwe. 2 K'ol. 3:12-13 Shunon it took tookon k'amefetsr tooko dashan detson maac' nefonat faleyon beewere,. 3 Jeenon it atsatseyo deshede'er Ik' shayirotse daatseyiru ik woto kotosh kúp'owere. 4 It s'eegeyor ik jángosh it s'eegetsok'o ik atsonat ik shayiro fa'ee. 5 Aaninuwere doonz iko, imneti ikonat gup iko fa'ee. 6 Dabnwere jamoniyere damb wottso, jamotse wotde finitwo, jamotse beetwo, jamosh nih wottso ik Ik'o Izar Izewer fa'ee.
7 Ernmó Krstos imosh bí ettsok'o bodtso no took tookosh s'aati imo noosh imere. 8 Dub. 68:18 Mansh S'ayin mas'afotsere,
«Damb b́keshor mus'o mus'dek'tni bí'ami,
Ashuwotsshowere imuwotsi b́ imi» eteetsok'owiye.
9 Beree «Dambaan b́ keshi» etiru aap'an shini shin datso maants, datsotsnoru ayidek't dashan wotts beyok b́ ot'tsoni bako k'osho eebi b́ kitsiri? 10 Dashan ot'tsanwere bí jamo s'eenosh dar jamoniyere damb keshtsoniye. 11 Bíwere ik ikwotsi wosheetso, ik ikwotsi bek'etswotsi, ik ikwotsi doo shishiyo nabitwotsi, ik ikwotsi amantsuwotsi jinetwotsi, ik ikwots danitwotsi bowotitwok'o imuwotsi boosh b́ imi. 12 Hanowere b́ k'al amantswotsi kirstani finosh k'anir Krstos ats wotts Ik' moowu bi agetuwok'owe. 13 Ando Ik' na'o danon imnetiyon daatseyiru ik wotok bodroone, Krstos s'ayinonat s'een b́ wottsok'o noowere ik wotde s'een asho no wotitwok'owe. 14 Haniyere okoon ashuwots gondonat ant'elcosh k'andek'ts dani jongonat aats fundon hake bako gifnide'er daamet nanaúwotskok'o woteratsone. 15 Dab maniyere aro shunon keewfetsr jam keewon took wottso Krstos maants eenetwone. 16 K'ol. 2:19 K'osh k'osh atsi kaywots bodesh Krstosne, ats jamonwere ikok b́ deshee shas'wotsne, eshe ik ik atsi kayo bísh eteets fin sheengshde'er b́ finor ats jamo bí eneti, shunonowere b́ kup'iti.
Krstosn daatset handr beyo
17 Haniyakon, k'awntsalkeew gawirw Ik' ash woterawwotskok'o beek'ayere etaat doonzo shútson it tooko kor it dek'etwok'o itsh keewre, 18 Bo asaabiyo t'aluwtskee, bodaronat bo k'elikúp'i jangosh Ik'o boosh bí imts beyatse k'alernee. 19 Jitso bot'ut'tsosh kim jamo k'alosh bo tewnirwotse botoko meets tewunosh beshidek't imrne. 20 Itmó Krstos jango hank'owaliye it dani, 21 Arikon b́ jango shishrte, aronwere Iyesusitse b́ fa'ok'o bín danrte, 22 K'ol. 3:9 Mansh antelchde'er morro maants jishit Woteraw tewno shini bín it beyiru nat wotts it azeets doyo okaan juu bayere. 23 It nibonat asaabiyon b́ jamon handr wotowe, 24 Aze. 1:26; K'ol. 3:10 Arik wotts kááwonat S'ayinon Ik' arok'on azeetso handr atso tahade'ere.
25 Zek. 8:16 Eshe kooto keewk'ayere, no jamets ik atsi kaywotsi no wottsotse no ats atsewo ari keewo keewwone. 26 Dub. 4:4 Fayore! it fayonomo morro fink'ayere, it fayetsok'on it befere aawo ilk'aye. 27 Dablossh b́ kindit fúro imk'ayere. 28 Ump'irwo haniyak úmp'k'aye, dab kic'tswotssh b́ imish gizo b́ daatsitwok'o b́ kishon sheeng fino finowe. 29 B́ jamon it nonotse woteraw keewo keshk'aye, maniyere dab shishetwotsi geneúshitwonat kup'shosh wotitu keewo ashuwotssh keewwere. 30 It kashts aawo b́ kiitstwok'o wotitwo it ats jot'ets Ik' S'ayin Shayiro shiyanik'ayere. 31 S'aam woto, nib k'úno, fayo, kúúho, c'ashonat kon naari gond jamo it atsere okaan wokowe. 32 3:13 Maniyere it ats atseyosh doowwotsnat maac' nefwotsn, shiyanitwotsnat imetwotsi wotoore, Ik'o Krstosn it morro itsh orowe bí ettsok'o it were it atsatsewosh orowe erre.