Yohans Guut'tso
Nodoonz Iyesus Krstos Dooshishiyo
Kindo
Yohans dooshishiyo Iyesusi b́ t'intsir meetso tahdek't ash dagotse beyat beets Ik'i aap'o b́wottsok'owo kitsosha, mas'aafan b́tookon b́ kitsirwok'on dooshishiyan b́ guut'e bín nababirwots Iyesus kashitso wotar weetwe eteets Ik'o naayi b́wottsok'o amanar, bín boamantsatse tuutsonowere dúre dúri kasho bodetso bodanishe (20:31).
B́ dooshishiyi tuwoki kayanitse dúre dúron Ik'o keewuts keewonat Iyesusn ik bowottsok'o kindok'o aridek't b́t'intsiyakon Iyesus kashitso wotaarr weetuwe eteets Ik'o naayi b́wottsok'owo kitsiru k'osh k'osh adits keewwotsi b́t'intsiri. Maniyere hakonowere aditsanotsatse eegi oot'o daatsetsok'o kitsiru taarikiwots b́shuutsats weyirune. B́kayaan b́kitsir ik ik ashuwots Iyesusn amanar b́shuuts sha'at biyatse dantswotsi bowottsok'o, k'oshwotswere ando awuk'on bín bok'eftsok'ona bín amaneratsone boettsok'oniye. K'ot 13-17 tse Iyesus b́detsewots kooc' b́ danifwotsnton awuk'o karnts gonkeyo detst b́teshtsok'onat b́ jiteyoniyere shin k'andek'ikonat kup'shit aap'i keewwotsi b́ shishitsok'oniye bokeewiri. S'uwaatsi k'ot'wots Iyesus b́detseyonat angshosh b́t'iini jango, b́jiitewonat k'irotse b́tuwi jango, aani k'irotse b́tuwi jango, mank'o k'irotse b́tuwiyako b́woshefwotsats b́be'etwok'o keewirwotsiye. Yohans Iyesus Krstos weeron daatset dúre dúri beyo p'aap'uridek't b́kitsir deeran andon tuur Iyesusi weerok'o, arook'o, kashok'o woshde dek'etwotsshe. Yohans doo shishiyo k'osh k'osh b́wotitwok'o k'altso shayiri keewwotsi kitsosh daneetswotsnat aaw aawi nobeyootse boon nofiinef (t'ak'amamefwotsi), man etonwere aatsok'o, mishok'o, sháánok'o, giz jinfonat mereerwotskok'o, weyini mitonat weyini shuwon arts keewwotsn b́guut'oniye.
Jamon mas'aafan b́detstso
Shin shino 1:1-18
Yohans gupfonat Iyesus danif shintswotsna 1:19-51
Iyesus b́fiino sháánon dek'b́tutsok'owo 2:1—12:50
Iyerusalemnat bgúúratse b́fiini s'uwatse aawwotsí 13:1—19:42
Doonzo k'irotse tuwonat b́be'ewo 20:1-31
Gúúpo, Gelin ando aani b́woshefwots b́be'ewo 21:1-25
1
Aap'o kash imts meets b́wottsok'o
1 Shin shin aap'o fa'e b́tesh, aap'onwere Ik'oke b́ teshi, aap'manwere Ik'e b́ teshi. 2 Bí shin shin Ik'ontoni b́ taash. 3 Jam keewo bína bí azee, azeets jamotse ikonwor bí bíazrawo azeetso aaliye. 4 Bíyoknowere kasho fa'e b́ teshi, kashanwere ashuwotssh sháána b́ teshi. 5 Shááno t'aluwats c'eeshitwe, t'alwonu shááno da'aratse.
6 Mat. 3:1; Mar. 1:4; Luk'. 3:1-2 Ik'oke wosheetso Yohanisi eteets ash iko fa'e b́ tesh. 7 B́ gawts gawon jamo bíamanitwok'o bí shááni jangosh gaw wotat b́weyi. 8 Bíwere shááni jangoni gawosh b́ weyi bako bí b́tookon sháánaliye. 9 Ash jamwotssh c'eshitwo ariko wottso shááno dats jamwats woke b́ fa'oni.
10 Bíwere datsanatse b́ teshi, datsanwere bí'azee bíne, datsanmó bín danatsane. 11 B́ik wottswotsok waare, b́ jirwotsmó bín de'atsne. 12 Wotowabako b́ keewu dek'tswotsnat b́ shútson amants jamwots Ik'o nana'uwotsi bowotitwok'owe alo boosh b́mi. 13 Bowere Ik'atse shuwekno bako ash naaratse, man etonwere meetsi shnunon wee nungshe mááts gonkewon shuweratsne.
14 Aap'onu meets wotere, s'aatonat arikono s'eent no dagotse beere, b́ nihoke waats ik s'uz na'o mangok'o wottso b́ mangonowere bek'rone. 15 Yohanswere «Ekeew taayere il weyirumań taayere shin fa'o b́teshtsotse taayere ayidek't bogfe etaat itsh tkeewtsoniye haniye,» ett kuhat b́keewi. 16 B́ s'eenatse no noúnets s'aatats s'aato dek'rone, 17 Nemo Muse weerone imeyi, s'aatonat aronmo Iyesus Krstos weerone b́ weyi. 18 B́jamon Ik' bek'tso konwor aaliye, wotowa eree Ik'o niho sheetsotse fa'a ik s'uzo b́naayi, bíwere Ik'wottsoni noosh kish kitsiye.
Gpfo Yohans gawts gawo
(Mat. 3:1-12; Mar. 1:1-8; Luk'. 3:1-18)
19 Ayhudi naashwots Iyersalemitsi kahniwotsnat Lewawino etefwotsn Yohansok woshat, «Kone nee?» ett boatiyor b́ imts gawo hank'oyiye.
20 Bí «Taa Krstos taanaliye» et b́ gawi bako gawo gawosh k'aze eraatse.
21 Iwi. 18:15, 18; Mil. 4:5 Bowere «Beree nee kone? Eliyas neeneya?» ett bín boaati.
Bíwere «Taanaliye» ett boosh bíaniyi.
Bowere «Weetwe eteetso nebiyiwo neeneya?» bo et.
Bíwere «bí taanaliye» bí eti. 22 Bowere «Beree konene? Noon woshetsuwotssh nokeewish n took jangosh aawk'owe nieteti?» bo eti. 23 Isa. 40:3 Bíwere «Nebiywo Isayas b́ keewtsok'on
Taa ‹Doonzo weero katsuwre› et fere
worotse kuhiru asho k'aaro taane» bí eti.
24 Ashuwotswere bo woshe ferisawiwotsi etefuwotsitsna botesh, 25 Beree, «Nee Krstosi wee Eliyasi wee weetwe eteets nebiyo woto nk'azihakon eegoshe n gupiri?» ett bínboaati.
26 Yohansuwere hank'o ett boosh bíaaniy, «Taa tgupirye aatsone, eree it it danawo it dagotse b́ ned'iriye. 27 Bí taayere ile b́ weetiye, taa b́ c'aami tipi joko bitsosh dab bodktanaliye.»
28 Man b́ wotwere Yohans b́ gupfoke Yordanos fokoniyere bak'etse Betani kitotsna b́tesh.
Ik'i mereero
29 Yatsok'on Yohans Iyesusi b́ maants b́waafere bek't hank'o bíet «Datsantsi morro k'aa'ubazetwo Ik'i mereero haniye! 30 ‹T shutsatse weyiru ekeew taayere shino b́ teshtsotse taayere ayidek't bogfe› ti ettsoniye haniye. 31 Taawor ttookish bín danaaktana b́tesh, ernmó Isra'el ashuwotssh b́ be'eyish taa aatson gupfere t weyi. 32 Manats dabt Yohans hank'o ett gawere S'ayin shayiro erkukundok'o darotse oot't biyats b́ k'ot'efre t bek'i. 33 Taawor bín danaktane, ernmó aatson tgupetwok'o taan woshtsoniye, ‹Shayiro ood'r bíats b́ beewor n bek'etwo S'ayin shayiron gupetwo bíne› ett taash keewi. 34 Tawor han bek're, bí Ik'o naayi b́wottsok'owo gawitwe.»
Iyesus b́danif shintsuwots
35 Yatsok'on Yohans b́ danif gitetswotsnton aani manoke need'dek'tni b́ tesh, 36 Yohans Iyesus man weeron b́beshefere bek't, «Hambe! Ik'oko mereroni!» bí et.
37 Yohans danif gitetswots Yohans man b́ keewfere shisht Iyesus shutsats shoydek't bo ami. 38 Iyesus wongr et aanat s'ilbek't, «Eebi it geyiri?» bíet.
Bowere, «Rebi! eewke n beefoni?» boet. (rebi etoni danifino eta.)
39 Bíwere, «Waa s'iilere» bí eti. Eshe amt aak b́byirwok'o bos'ili. Manots aawots bínton towat bojin, manwere aaw tatsi sa'atok'oyi b́tesh.
40 Yohans b́ keewts keewo shisht Iyesus shuuts amts b́ danif gitetswotsitse iko Simon P'et'ros eshu Indriyasi b́teshi. 41 Indriyas shin shino b́ eshu Sim'onok amt «Mesihiyo daatsdek'rone» bí et. (mesihiya eto Krstosi eta, wee fuuteka eta) 42 Maniye il Indriyas Sim'oni Iyesusok dek't b́weyi.
Iyesuswere t'iwintsdek't s'iilt, «Nee Yona naay Simon neene, haniye hakonmo Keefi eteyar s'egetune» bíet. (Keefi etonmu: P'et'rosi wee shútsi s'ala etee).
Iyesus Flip'osnat Natnaeln b́s'eegtsok'o
43 Yatsok'on Iyesus Gelilmants amo b́gee, Flip'osi daatsdek't, «T shuutso shoy de wowe» bí eti. 44 Flip'os Indriyasnat P'et'rosnkok'o Bete Sayda eteets kitutsi asha b́tesh. 45 Filip'os Natna'eli daatsdek't, «Muse nemi mas'afatse, nebiyiwots bek'i mas'afatse b́ jangosh bo guut'tso daatsdek'rone, bíwere Yosef naay Nazrettso Iyesusiye» bí et. 46 Natnaelmó, «Nazretitse sheeng keewo b́jamon daatsewo falitwa k'úúna?» bí eti. Filp'osuwere «Waar s'iile!» bíet. 47 Natnael b́ maants b́waafere bek't Iyesus «Hambe! gond fino bíatse datserawo ariko Isra'el ashoni!» ett b́jangosh b́keewi. 48 Natnaeluwere «Aawokneya taan ndani?» bíet. Iyesuswere «Filip'os neenbs'egfetsere shino Belesi mitú shirotse n befere neen bek're» ett bísh bíaniyi. 49 Manoor Natna'el, «Danifono! nee Ik'o naay neene! nee Isra'el naasho neene!» bí et.
50 Iyesusu hank'owa bíet, «Nee ni aman, ‹Belesi mitu shirotse n befere neen bek're› ti ettsosheya? Haniye bogts keewwotsi shinomaants bek'etune. 51 Aze. 28:12 Arikoniye neesh tkeewiri, Daro b́k'eshere melkiwots ashna'o ats keer bo'ot'fere bek'etute.»