Luk'as Guut'tso
Nodoonz Iyesus Krstos Dooshishiyo
Kindo
Luk'as guut'ts doo shishiyo Iyesusi b́ t'ints shin shin weetwe ett nebiyiwotsn b́ jango ay dúrosh jangiyetso Isra'eli kashitwoni ett bokotfere bo boteshts «Mesihiyo» mank'owere ash naar jamo «Kashiyitwo» b́ woto kits keewosha b́ tesh. Luk'as, Iyesusi «Tugretswotssh doo shishiyo b́ keewish» b́ nihoke wosheetso b́ woto manwere doo shishiyon ashuwotsatse fa'a gond keewo ay naarwotssh bits detstso b́ woto keewre. Luk'as doo shisiyotse bitsnor Iyesus weyi jango shino waa keewirwots tuwoki shinats k'ot'uwotsitsnat Iyesus daromaand tuwi jang keewirwots, k'otuwots s'uwoke eent bek'sht keewe geneúwi jangoni. Iyesus daromaand b́ tuwiyakon Krstani imnetiyo aak'o aaniyi bí aaytsok'o sheengsh keewirwo tarikiyo b́ wosheetsots fini mas'afotese guut'ts ashaann keewetso fa'e.
Melakiwots duubo, Iyesus b́ shuwewor giz jinfwots amt bín bo s'iltsok'o keewiru tarikiyo, Iyesus na'or Ik' k'oni moomand bí amtsok'o, maac' k'ewts Semari jiro jangonat t'aft daatsets na'o jango Luk'as doo shishiyi mas'aaf mec'rotsna b́datsefo. B́ doo shishiy mec'rutse c'uushatse tuut c'uushats b́ borfetso een t'iwintson finetso Ik' k'oni jango, S'ayin shayiri jango, máátswots Iyesus finotse bodetsts boyokonat Ik'o ashna'i morrosh orowe b́ eti jangoni.
Jamon mas'aafan b́detstso
Kindo 1:1-4
Gupfo Yohansnat Iyesusn shuweyi jango 1:5—2:52
Gupfo Yohans fints fino 3:1-20
Iyesus gupewonat b́ fadetsok'o 3:21—4:13
Iyesus b́ fino Gelilitse dek'b́tuwo 4:14—9:50
Gelil maantse tuut Iyerusalem maants 9:51—19:27
Torbani s'uwatse Iyerusalemnat b gúúratse 19:28—23:56
Doonzo k'irotse tuuwona, b́be'ewonat daromaand b́tuwon 24:1-53
1
1 Shiimets Tewofloso!
No dagotse k'aleets keewwotsi kishde'er kitsit tarikiyo haniye shin aywots guut'rnee. 2 Wosh han noosh beshitswots shin shinon teshts ááwon bek'tswotsnat b́ aap'tso nab́t teshtswotsiye. 3 Mank'owere taa shin shino tuzat jam keewo t'iwintsdek'at t s'iliyakoń b́ tarikiyo matsdek'at neesh t guut'etwok'o sheeng wotat taash b́ daatseyi. 4 Han tk'alwere ndants dano ar b́woto sheegshde dań ndek'isha etaatniye.
Gupfo Yohans shuwetwok'o melakiyo Gebr'el shino b́ keewutsok'o
5 1 Zen. 24:10 Herods Yihud datsatse nugús wotat b́teshor, Aabiya kahni fini kayotse fin finirwotsitse Zekariyasi eteetso kahniya b́ tesh. Bíwere Aron naaratse shuwetsu Eelsabti eteets máátsu detsfe b́tesh. 6 Gitwotswere Ik'o shinatse kááwwotsi bo teshi, Doonzo alonat teron iko bo shapirawona Ik'i shinatse sheeng beya bobefoni bo teshi. 7 Elsabet' mahan b teshtsotse na'o deshatsno botesh, ando gitwotsu ay dek't gaawerwtskno bo tesh.
8 Manoor Zekariyas kahniwots jirwotsitse Ik'i mootse finosh b́ fini aawa b́tesh, mansha bí Ik'i shinatse b́ kahni fino b́finefera b́ tesh. 9 Kahaniyots yoots bo k'alfok'ooń doonzo Ik' moots kindt it'ano s'uwiwosh bíats it'o keshb́wutsi. 10 Ik' mootsnowere it'ano s'uwiyewor, ash jamo úratse ned'de'rni Ik'o bok'onfo. 11 Doonzo melakiyo it'an s'uwiyeyiru t'arap'ezoke k'aniweeron ned'irwo Zekariyas ats be'eeb́wtsi. 12 Zekariyas Ik'i melakiman b́bek'or tek'at shatb́wts. 13 Ernmó melakiyo bísh hank'owa bíet: «Zekariyaso! shatk'aye! Ik'o n k'ontso shishre, n máátsu Elsabet' nungush na'o neesh shuwitwaniye, b́ shútsono Yohansi err s'egetune. 14 B́ shuwewono geneúwi eeno neesh wotituwe, aywotsu b́ shuwewon mank'o genee'úwitunee. 15 Taaw. 6:3 Bí doonzo shinatse een wotitwe, weyiniwon dutsets bironat k'osh mashit úsho úyatse, indu maac'otse b́befere S'ayn shayiron s'eenk wotitwe. 16 Bí Isra'el ashotse aywotsi bo Doonz Izar Izewer maants aniyituwe, 17 Mil. 4:5-6 Ari nebiyo Eliyas kok'o S'ayn shayironat angon wotaŕ nihwots nibo nana'o maants, aleraw ashuwots nibono kaawwots dan telofo maants aanitwe, ashaashwotsnowere doonzosh k'anbodek'etwok'o woshitwe.»
18 Ernmó Zekariyas melakiwosh «Keewan arik b́ woto eegneya t daneti? Taawere gaawerwtserere, tmáátsunwere gawerwtserane» bí et.
19 Dan. 8:16; 9:21 Melakiyonwe hank'o ett bísh bí aani, «Taa Ik'o shinatse ned'efo Gebreel taane, doo shishiyan neesh tkeewitwok'o Ik'oke wosheyat waare. 20 Neemó bí aawo b́bodor wotitwo t keewts keewo amaneratsne, mansh neesh t keewts keew jaman wotar b́ s'eenfetso gidik' wotar s'k err nbeetesheti, noon keewono falatsne.»
21 Manoor ash ashuwots Zekariysi bokotfera botesh, Ik'i mootse b́ ja'atsosh bo adi. 22 Zekariyas Ik' mootse b́ keshor ash ashuwotsnton keeweyo falratse b́ tesh, mansh bo Ik' mootse bek'o b́bek'tsok'oo danbok'ri, bí b́ kishon kitsfetstni boosh b́ daniyiri bako noon keewo falratse b́ tesh. 23 B́fiino b́ s'uwi hakon Zekariyas b́ moo maants k'az bíami. 24 Muk'i b́teshihakon b́ máátsu Elsabet na'o maac'bwtsi, úts shashosh b moots ááshutsatni b tesh, hank'owo bi et, 25 «Doonzo keewi sheenghan taash k'alre, ashuwots dagotse t gac'ewo tiatse k'aaú dek't juu k'rere.»
Iyesus b́ shuwetwok'o melakiyo Gbr'el b́ keewtsok'o
26 Elsabet bmac'ts shirtl shashon melakiyo Gebr'el Gelil datsatse fa'ú Naazreti eteef kituts Ik'oke b́ wosheyi. 27 Mat. 1:18 B́ woshewwere Dawit naar wottso Yosefi eteef ashosh wid'ets baarna'a s'eenúka b́ tesh, b shútsonwere Mariyami b tesh. 28 Melakiyonwere b maants waat, «Nee Ik'i s'aaton s'eentsune, jeeno neesh wotowe! doonzo neentoniye, [Nee máátswotsitse derek neene]» bí et.
29 Biwere melakiyo keew keewatse tuutson aydek'at tek'at, «Jam aatan awuk'o jam aate k'una?» etaat asaabbdek'i. 30 Melakiyonwere hank'o bish bíet, «Mariyame! Ik'i shinatse n baatsirwotse shatk'aye, 31 Eshe! Na'o mac'ituune, nungush na'ono shuwiytuune, b́ shútsono Iyesusi etetune. 32 Bí were een wotitwe, jamoniyere damb bogo Ik'o naayiye eteetwe, doonzo Ik'o b́ nih Dawit naashi jooro imetuwe. 33 2 Sam. 7:12-13, 16; Isa. 9:7 Isra'el ashaatsnowere dúre dúrosh naashitwe, b́ naashonwere s'uwo deshatse.»
34 Mariyam melakiyosh «Taaho baarna'a s'eenu taanere, bere, hank'ó keewan aak'oneya woto b́faliti?» bi eti.
35 Melakiyonúwere hank'o ett bíaany, «S'ayin shayiro ni ats weetuwe, jamoniyere damb bogts Ik'o angonwere neen gúúpetuwe, mansh niyatse shuwet na'o S'ayno wotitwe, Ik'o naayiye eteetwe. 36 Njaguu Elsabet dab mahani eteere beyat ja'at and b gaweriyakon nungush na'o maac' dek'raniye, b maac'ihakon and shirtl shasho bodrane. 37 Aze. 18:14 Ik'osh maawet keewo aaliye.»
38 Maniyakon Mariyam, «Hamb! Taa doonzo gonú taane, taash niettsok'o wotowe» bieti. Manoor melakiyo biyoke k'az bí ami.
Mariyam Elsabeti s'iilo bi amtsok'o
39 Manoor Mariyam gur báár datso Yihud datsomantse fa'a kitu maants kááron tuwat bi ami. 40 Zekariyas mootso kindat Elsabetsh jamo b imi. 41 Elsabet Mariyam bin jamo bi aator b k'aaro bshishtsok'oon b maac'itsi na'o t'oolo gedb́k'ri. Elsabetwere S'ayn shayiron s'eengutsat 42 B k'aaro eensh dek'at hank'o bi et, «Nee máátswotsitse derek neene, niyatse shuweetwonwe deereke. 43 Tdoonz ind taan s'iilo b waan taash aak'o mangi eene, 44 N jamo t shishtsok'on manoor t maac'otse fa'a na'o gene'on t'oolere. 45 Doonzoke bish keewets aap'o b́s'eenetwotse nee amantsu aak'o deerek neene!»
Mariyam duubts udi duubo
46 1 Sam. 2:1-10 Mariyam hank'owa bi et
«T kashu t doonzi úditwanee,
47 T shayiru t doonzn ti aton geneeúitwane,
48 1 Sam. 1:11 Ik'o taan ashitsi ashe dash gonú b́ s'iiltsotse,
Hambetse okoon shuwets jamo deretsuniye etetúne taasha,
49 Ik' kup'o een een keewwotsi taash k'alre.
B́ shútsonwere S'ayine.
50 Ik'o bín shatirwotssh,
Bo Na'i na'osh b́ mhretiyo woshitwe.
51 B́ kup' aaron bí ango kitsre,
Bog noona ett it'irwotsnowere bo tewnonton boon bad'ik'reree.
52 Iyo. 5:11; 12:19 K'eeziru een eenwotsno bo naashi jooratse oorshre,
ernmó bo tooko dashan detsiru ashuwotsi mangon dambaan tizree.
53 K'ak'tswotsno sheeng keewon worire,
Galetswotsnmó kishi baashon damik'rere.
54-55 Aze. 17:7 Abrahamnat b́ naarwotssh dúre dúrosh b́ kitsts mheretiyonowere gawdek't,
B́ guutso Isra'eli tep'ree.
Manowere b́k'al shin no nihotssh b́ jangits keewo s'eentsoshe.»
56 Mariyamwere Elsabetnton keez shashosh b́teshiyhakon b galomaants aanat k'azbiami.
Gupfo Yohans shuwewo
57 Elsabet b shuwi aawo b́bore nungush na'o shuubk'ri. 58 B giyuwotsnat b jag jamwotswere doonzo bish mhetiyo b́ woshtso shisht binton bo geneúwi.
59 Lew. 12:3 Na'o b́ shuwetsi shmtl aawon, bín gof damiyewor b giyuwotsnat b jagwotsn kakweyat bo weyi, b́ nih shútson Zekariyasi err s'egetwok'o geyatni botesh, 60 Indunmó «Mank'o woteratse, b́ shútso Yohansiye» bi eti.
61 Bowere bish «N jagotse shútsann s'eegetso konwor aalneya?» bo eti. 62 Maniye okoon nihosh, «N naayi koni err s'egetwok'owe ngeyi?» ett kolon bo aati.
63 Zekariyasu bín guut'etuwo bísh bo imetuwok'o aatdek't «B́shutsoniye Yohansiye» ett b́ guut'i, jametswotsu keewmaanatse tuutson bo adi. 64 Manoor Zekariyas albero bishwtsat bí eree noonkeewo b́fali, Ik'o údo dek'b́tuwi. 65 Manatse tuutson bogiyi jametswots shatoon tek'bowtsi, keewman gúrmanatsi Yhud dats jamwotsatse shiyeb́wtsi. 66 Keewhan shishits jamwots, «Na'i marmat'an eeg wotishek'uwa?» ett bo atsatseyo bo aatefere botesh. Han b́wotiye Ik' kisho arikon bínton wotat bín b́tep'tsoshe.
Zekariyas bek'on b́ keewtso
67 Na'i marmat'o nih Zekariyas S'ayin shayiron s'eenwtsat hank'o ett bek'on b́keewi,
68 «Bí ashuwotsi mheretiyon waa b́s'iltsonat b́ kashitsotse,
Isra'elko Izar Izewer, doonzosh údo wotowe!
69 B́guutso Dawit naarotse kaashiyts kup'o noosh tuuzre,
70 Yoots shin dúrtson tuuzt b́ teshts S'ayin nebiyiwots noonon b́keewtsok'on,
71 B́ kashiwonwere no balangarwotsnat noon shit'iru jamwots kishotsene,
72 Han b́ k'alwere nonihotssh mhretiyo b́ woshtsok'o
B́keewts S'ayn taaro s'eentsosh gawdek'tniyee.
73 Taaranowere, taaron b́ ím nonih Abramsha b́teshi.
74 B́ jangitsonwere no t'alatwots kishotse nas'o keer,
Shatalon bísh no finishe,
75 Mank'o beyi dúr jamon
Ik'ishinatse S'ayinonat kááwon beyo nofalitwok'owe.
76 Mil. 3:1 Aaninu nee na'i marmat'ono, jamoniyere danb eents Ik'ko bek'etsoniye neene eteetwe.
B́werindo k'aniyosh doonzoshinats beshar ametunee
77 Doononwere bo morrosh boosh oorowe err
Kashosh wotit dano boosh imetwe.
78 Noko Izar Izewer maac' k'ewtsonat maac' nefon b́wottsotse bín kashet shááno danmbane noosh b́ shanetwok'o woshitwe.
79 Manwere t'aluwonat k'iri c'ishotse fa'a jamwotssh shaanitwe,
No shaaw shaawonowere jeeni weromants jishitwe.»
80 Na'onu eenb́wtsi, shayironowere kup'b́wutsi, Isra'el ash jamosh b́ be'efetsosh worwotse b́beeyi.