Matiwos Guut'tso
Nodoonz Iyesus Krstos Dooshishiyo
Kindo
Matiwos dooshishiyo, Iyesus b́ weyijango, shin shin jangit keewetso kashitk b́ wottsok'onat Ik'o shin b́ taarts taar shintsotse bí ashuwotssh b́ jangits keewo b́ weeron b́ imtsotse b́ keewit doo shishi aap'ono detstsoniye. Doo shishi aap'onuwere Iyesus bo dagotse shuweyat bí eents ayhudiwots s'uzsh b́ woterawon, dats jamosha b́ tesh.
Matiwos dooshishyo Matiwos dooshishiyan t'iwintsdek't k'aniyek mas'aafa, Iyesus b́ shuwertsatse tuut b́ gupeyonat b́ fadeyi jango sháánshdek't b́ keewihakon, Geliln b́ nabts nabo, daniyonat kashiyi finoni b́t'intsiri. Manats dabt Geliln tuut Iyerusalem maants b́ sha'ats sha'onat datsanatse b́ teshts dúri s'uwaatsi ik gawyotse wotts keewwotsi tandek't b́keewir, keewanotswere b́ jitewo, b́ k'ironat k'iro da'at b́two detskno.
Doo shishiyan Iyesusi, Ik'i nemo bitsosh al detstsonat Ik'i mengsti jango daniyi danif eeno b́ wottsok'o woshdek'tni b́t'ints. B́ danif danwotsitse ayuwotswere k'osh k'osh naarotse kakuwere útsok kayiyekno.
1. Ik'i mengsti ashuwots doyo, fino, bo detsts mebtiyo, boatse koteetkewonat dúri s'uwatse boon kotiru gowo daniyiru gúúratse nabetso (k'ot' 5-7).
2. B́ danif tatse gitwots doo shishyi keewosh boon woshetsok'on boosh imets nemwotsi (k'ot' 10)
3. Ik'i mengsti jangosh t'ints k'osh k'osh naaron ariyets jewrwots (k'ot' 13).
4. B́ danifwotsi etirwi biitso kitsiru dano (k'ot' 18).
5. And dúri s'uwonat Ik'i mengsti weyi jangosh imets dano (k'ot' 24-25)
Jamon mas'aafan b́detstso
Iyesus Krstos naari s'oot'onat b́shwewon 1:1—2:23
Gupfo Yohans fino 3:1-12
Iyesus b́ gupewonat b́ fadewon 3:13—4:11
Iyesus b́fiino Geliln dek't b́tuutsok'owo 4:12—18:35
Gelilen tuut Iyerusalemits 19:1—20:34
S'uwaatsi ik gawiyotse Iyerusalemnat b gúúratse 21:1—27:66
Nodoonz k'iro da'adek't b́ tuutsk'onat b́ be'etsok'on 28:1-20
1
Iyesus Krstos shuwets s'oot'o
(Luk'. 3:23-38)
1 Dub. 132:11; Isa. 11:1 Dawitnat Abrahamn naar wottso Iyesus Krstos shuweyi s'ap'o haniye.
2 Abraham Yisak'i b́shuwi, Yisak' Yak'obi b́shuwi, Yak'ob Yihudnat bí'eshwotsi b́shuwi, 3 Yihudwere Faresnat Zaran Timari eteef máátswatse b́shuwi, Fares Hesroni b́shwi, Hesronwere Arami b́shuwi, 4 Aramu Aminadabi b́shuwi, Aminadabu Ne'asoni b́shuwi, Ne'asonu Selmoni b́shuwi, 5 Selmon Boezn Reaabi eteets máátswatse b́shuwi, Boez Iyobedn Ruuti eteef máátswatse b́shuwi, Iyobed Iseyi b́shuwi, 6 Rut. 4:18-22; 1 Zen. 2:13-15 Isey Nugúso Dawiti b́shuwi.
Nugúso Dawit Oriyo mááts teshtswatse Selemoni b́shuwi, 7 Selemon Rob'ami b́shuwi, Rob'am Abiyayi b́shuwi, Abiyawere Asafi b́shuwi,*Asafnat Asan ikno. 8 Asaf Iyosaft'i b́shuwi, Iyosaft' Iyorami b́shuwi, Iyoram Oziyani b́shuwi, 9 Oziyanwere Iyo'atami b́shuwi, Iyo'atam Akazi b́shuwi, Akaz Hzk'iyasi b́shuwi, 10 Hzk'iyas Mnaseyi b́ shuwi, Mnaase Amos'i b́shuwi, Amos' Iyosyasi b́shuwi, 11 2 Naash. 24:14-15; 2 Zen. 36:10; Erm. 27:20 Iyosyas Israe'el ashaasho Babilon maants bo kishodek't damets dúr Ikoniyannat bí'eshwotsi b́shuwi.
12 Bokisho dek't Babiloni dameyakon Ikoniyan Salatiyal b́ shuwi Selatyal Zerubabeli b́ shuwi, 13 Zerubabel Abiyodi b́shuwi, Abiyodu Eelyak'emi b́shwi, Eelyak'em Azori b́ shuwi, 14 Azor Sadok'i b́shuwi, Sadok' Akimi b́shuwi, Akim Eelyudi b́shuwi, 15 Eeliyud Alazari b́shuwi, Alazar Matani b́shuwi, Matan Yak'obi b́shuwi, 16 Yak'ob Krstosi†Krstosi: Eto mesihiya wee fuutetsoni etee. eteefo Iyesusi shuwtsu Mariyami wid'tso Yosefi b́shuwi.
17 Eshe Abrahamatse tuut Dawitats b́borfetso tatse awd gubra, Dawitatse tuut kisho dek't Babilonits dameetsok b́borfetso tatse awd gubra, kisho dek't Babiloni dametsatse tuut waa Krstosok b́borfetso tatse awd gubree.
Iyesus Krstos Shuwewo
(Luk'. 2:1-7)
18 Luk'. 1:27 Iyesus Krstos b́shwetsok'o hank'oyi b́tesh, b́ índ Mariyam Yosefsh wid'eyat bbefere, bogonkerawon bi S'ayin shayiron maac'at' bdatseyi. 19 Bin wid'tso Yosef ash kááw b́teshtsotse Maryami ash shinatse kish kitso geeratse, mansh áátson k'azk'ro b́gaw. 20 Ernmó keewan jango shiyanoke b́befere doonzo melakiyo gúmon bí'ats be'eyat hank'o bíet, «Dawit naaro Yosefo! Nwid'tsu Mariyam bmaac'tso S'ayin shayiron b́wottsotse bin nmoo maants dek'osh shatk'aye. 21 Luk'. 1:31 Biye nungush na'o shwitwaniye, bí ashuwotsi morrotse b́kashitwotse b́shútso Iyesusi etetune.»
22 Jaman b́wottsonwere doonzo nebiyiyo weeron b́keewtso b́s'eenetwok'owe, 23 Isa. 7:14 «Hambe, baar na'a s'eenu mac'itwanee, nungush na'onowere shuwitwane, b́ shútsonwere ‹Amanu'eli› err s'eegetwe.» Amanu'eli etonwere «Ik'o nontoniye» etee.
24 Yosef tokrotse b́ tuwor, doonzo melakiyo bísh b́keewtsok'on b́ wid'tsu Mariyami b́moomants dek'tbíami. 25 Luk'. 2:21 Wotowa eree bna'o bshuufetsosh bin danatse.‡Aanatse: Eto máátsonat nungushi gonkeyo gokeratse etee. B́shútsonowere Iyesusi et b́s'eeg.
1:1 Dub. 132:11; Isa. 11:1
1:6 Rut. 4:18-22; 1 Zen. 2:13-15
*1:7 Asafnat Asan ikno.
1:11 2 Naash. 24:14-15; 2 Zen. 36:10; Erm. 27:20
†1:16 Krstosi: Eto mesihiya wee fuutetsoni etee.
1:18 Luk'. 1:27
1:21 Luk'. 1:31
1:23 Isa. 7:14
1:25 Luk'. 2:21
‡1:25 Aanatse: Eto máátsonat nungushi gonkeyo gokeratse etee.