Wosheetso P'awlos Wosho
Filp'siyos Ashuwots Maants
Kindo
P'awlos woshan b́ guut'uwre, Mek'odoniya eteets Rom shirotse fa'a Filp'siyosyosn fa'a Ik' mooshe, Ik' maa manuwere, P'awlos Awuropi datsatse shini b́ ned'itsuniye, woshan guut'tsonwere P'awlos tipi mootse b́ beyor, k'osh Krsitiyaniyotsn k'efeyo bíats b́ bodorat Filp'siyos Ik' mootse tuwts koot dani jangon bomaac'o shiyanon b́ tishts aawotse. Wotowa bako P'awlos Iyesus Krstosatse b́ detsts imnetiyo ayidek't bog b́ wottsotse woshanitse bogt be'eyiruwo gene'onat s'een imnetiyoniye.
P'awlos woshan shini b́ guut'etuok'o bín woshtso b́ kic'or bín tep'osh imo bísh bodeyitsotse Filp'siyosn amantsuwotsi udoshe, bíyatso wotowa boats k'osh k'osh kic'uwots bodrno wotiyal dab ááwu shuk'onat b́ jamon kup' woto bo detsetwok'owe mansh gawerawo boon kup'iyoshe. Tooko dambaan detsonat bog taana eto okaan bazir Iyesus Krstosn tooko dashan detson bos'enetuwok'o kup'shdek't b́ gawiyiri, Krstos Iyesus shayironton ik woton bodaatsts kasho Ik' deeri imootse t'up'tsonat imnetiyon it dek'tsoni bako nem koton datsekaliye eton boosh gawiyituwe, Krstos Iyesusnton ik wotar beetu jamwotssh Ik'o b́imet jeenonat gene'uon boosh guut're.
Woshan b́danefo gene'úon, kup'ar amanon, ikwowotonat krstiyan imnetiyonat beyotse kup'on shaanide kitsone, manats dabtnuwere wosh na'o P'awlos Filip'isyus Ik'i moosh b́detsts een shunoniye b́kitsiri.
Jamon mas'aafan b́detstso
Kindo 1-11
P'awlos b́tookon bítse b́teshts keewo 12-26
Krstani beyon ariyetso 1:27—2:18
T'imotiyosnat Ep'afroditussh detsetso 2:19-30
Amaneyiruwo k'efiruwotsoki ats kotiyo 3:1—4:9
P'awlos Fililp'isiyositsi Krstiyaniwotssh b́t'intsts údonat izon 4:10-20
B́ guupo 4:21-23
1
1 Wosh. 16:12 Krstos Iyesus guuts wottsuwots P'awlosnat T'imitiyosoke, Flp'isyos kitotse beyiru Krstos Iyesusn S'ayn wotts jamwotssh, Ik' maa eenashwotsnat diyak'oniyotsnsh.
2 Nonih Ik'oknat no doonzo Krstos Iyesusoki s'aatonat jeenon itsh wotowe.
P'awlos udon Ik'o b́k'ontsok'owo
3 Iti tgawi taawo jam aawo Izar Izeweri udirwe, 4 It jamets jangoshowere Ik'o tk'oni taawu jamo Ik' tk'ono gene'on s'eenke. 5 Shints aawortson dek't b́tutson andish b́borfetsosh dooshishiyo nabfetsr t fino tep'iruwotsi it wottsotse Ik'o udiruwe, 6 Fini sheengo ititse dek't tuutso Izar Izewer, Krstos Iyesus angshosh aanar b́ weet aawots s'uwomaants b́betsituwok'osh arikon danfee. 7 And tipimootse tbeyanoronat ttpeftsere shin doo shishi fini aroosh mooyr bínowere kup'iyosh Ik'o b́ s'aaton b́imts gowosh it únetswor biyatse kayituwotsi it wottsotse it jam aawo t nibots itne. Manshowere it jangosh taash shiyeyiruwo arikee. 8 Krstos Iyesus shunon it únetsnoor awuk'o tgawiruwok'owosh tgawo Ik'oniye.
9 It shuno danonat t'iwintson s'eenk wotarr eenfere bíametwok'o Ik'o k'oniruwe. 10 Manuwere k'ants keewo p'ec'ar danr Krstos aanar b́weet aawots s'ayinwotsnat eeg eego boatse daatserawuwotsi wotarr it datsetuwok'oye. 11 Mank'oon it beyon Iyesus Krstosoke daatset kaawi shuwon s'eentso wotaarr Ik'osh mangonat udon datsiyituwotsi wotitute.
P'awlos tipewo dooshishiyo b́gawnetwok'o b́k'altsok'o
12 Tieshuwotso! tiats bodts keewu jamo dooshishiyo iki b́gawnetwok'o b́wooshtsok'o danitdek'o shunfee. 13 Wosh. 28:30 Taa ttipe Krstos jangosh b́wottsok'owo Ron datsi nugúsi maa kotiruwotsnat manoke fa'a ash jametswots danfnee. 14 Taa ttipetsatse tuutson amants eshu eshwotsitse ayuwots iki bogshdek't doonozo amantsuwotsi woternee, mansh Ik'o aap'tso shatalon shishiyosh shintsoniyere iki bogts ááwu shuuk'o daatsrne.
15 Wotówa eré ik ikuwots Krstosi bo nabír okooronat nokoreyi shayirone, k'oshuwotsmó Krstosi bo nabir níb s'aayinone. 16 Hanots Krstosi bo nabir bo took shunatse tuutsone, boowere taa doo shishiyosh tdetsts mooshatse tuutson hanoke juwetso twottsok'o bodantsoshe. 17 Ekewotsmó Krstos jango k'uuridek't nabiruwots maac' s'ayinon b́woterawon botook shunonat ttipeyatse iki bogts kic'o tiats doosh gawttiniye.
18 Han wotowa ekeewi wotowa taa geneeúwe tgeeneúwiti, ariyon wotowa arikon wotowa jam werindon Krstosi nabetuwe. 19 K'osho taan gene'úshiruwo it Ik'o itk'onirwonat Iyesus Krstos shayiri tep'oon s'ayinr tkeshetwok'o tdantsotsne. 20 B́ jamon tjitserawok'o jangatniye tkotiri, ernmó úni aawo tk'aliruwok'onat hambets kashon t beyal wee t k'iriyal Krstos tiatsotse mangituwe etaat ááwushuk'on keewiruwe. 21 Mansha taash beya eto Krstosn beewoniye, k'ira etoonwere oot'o biitse daatset keewe. 22 Ernmó t atsi metsanaton dabr t beyetka wotink'e shuu daatsitfino finere etee, b́wotiyaloru dabr beyonat k'irotse ááwi galtdek'etwok'owo danatse. 23 Git hasabiyanots dagots detsewtsere, hank'o beyanitse k'aleyar Krstosnton woto geefe, manuwere Krstosnton beyo taash ayidek't k'ank b́wottsotsne. 24 K'osh weeron kashon t beyo itsh ayidek't geyike. 25 Mansh arikeewetsk taane, taa k'irraniye oorar it imnetiyo eenr bíere imnetiyon geneúo it daatsish it jametsnton t teshetwok'o danfee. 26 Taa aani itok twoor t jangosh it detsts it'o Iyesus Krstosn ayituwe. 27 Eshe jamoniyere bogo it beyotse Krstos doo shishiyo bíetirwok'on beewere,, hanuwere taa wáár itn t s'ilalo wee itoke twokiyal ik níbon kup'at it ned'tsonat doo shishiyo ik wotat betsosh it kaartsok'o shishirwe. 28 Itn k'efiruwotsi ik keewonoru shatk'ayere, it ááwu shuk'anwere boosh bot'afit milkt b́ wottsotse itshomó Ik'oke wotts it kashtsi milkte. 29 Krstosi aman mec'rosh b́ woterawo b́ jangoshowere gond bek'o it datsitwok'owe. 30 Wosh. 16:19-40 Eshe and itats bodiru gondbek'aan bali tiyats bodt teshtsoniye, andoor tiyats b́bodiru gond bek'o itshishirwoniye.