15
Ashuwotsi geneúsho b́ geyituwok'o
1 No imnetiyon kúp wottswots, mawirwots kuro kurdek'o geyife bako no took mec'ro geneúshitu woto geyiratse, 2 no took tookon k'osh asho b́ imnetiyon b́ kup'ituwok'o bín t'ak'amituwonat geneúshit keewo k'aluwone. 3 Dub. 69:9 Krstos b́ tooko geneúshratse, dab «Ashuwots neen boc'ashts c'asho ti'ats b́ oot'i» etiru S'ayn mas'aafotse eteetso bí ats b́ bodi. 4 S'ayin mas'aafotse nodatsituwots k'amonat kup'on, noosh jángo b́beetuwok'o shin guut'ets jamo dano noosh b́ wotituwok'o guut'ere. 5-6 Ik níbon wotde'er ik noonon Ik'o nodoonz Iyesus Krstos nihi, bín it mangitwok'o, k'amikonat angi kúp'iko Ik'o Izar Izewer Krstos Iyesus shunok'on it atsatsewo ik níbetsuwotsi woto itsh ime.
7 Krstos Ik' mangosh itn b́ dek'tsok'o it jamets iko iko de'e. 8 Hanowere t keewor Ik'o shints nihuwotssh b́ jangitso b́ wotituwok'onat Ik'o arikeewets b́ wotonwere b́ danetuwok'o Krstos ayhudiyotssh guutso wotere etee. 9 2 Sam. 22:50; Dub. 18:49 Krstos ayhudiyots guutso b́ wottso k'osh jango Ik' ash woterawwots Ik'o b́ mhretiyosh bín bo údituwok'owe, hanuwere,
«Eshe Ik' ash woterawwots dagotse neen udituwe,
n shúútsosh dubon údo t'intsituwe»
ett guut'etsok'one. 10 Iwi. 32:43 Aaninu
«It Ik' ash woterawotso,
Ik' ashuwotsnton gene'owere!» ett guut'ere.
11 Dub. 117:1 Aaninuwere,
«Ik' ash Woteraw jamwots! doonz údoore,
Ash ash jamwotswere údoore!» ett guut'ere.
12 Isa. 11:10 Ando Isiyas,
«Iseyi naarotse shuwetuwo weetuwe,
Ik' ash woterawwotssho jishituwo wotar tuwituwe,
boowere bojangtso biyats woshdek'etune» etfe.
13 It jangtso S'ayin shayiri angon eenfere b́ ametuwok'o jangetso Izar Izewer bín it amanetsosh gene'únat jeenon s'eenon itsh ime.
P'awlos ááwu shuk'on b́guut'tsi jango
14 Ti eshuwotso! doo woton s'eentsuwotsi, danon gaaltsuwotsnat it ik iketsuwots k'osho izosh falituwotsi itwottsok'o danre. 15 Ik ik keewwotsi itsh gawiyosh geeyat woshan Ik'o taash b́ imts s'aatok'on ááwushuk'on itsh guut're. 16 Deeranuwere taash b́ime Ik'o doo shishi keewo Ik'i ashwoterawwotssh shishiyosh kahniyo wotat Krstos Iyesush finoshe, Mansh Ik' ashwoteraw ashuwotssh S'ayin shayiro S'ayintsonat Ik'onowere gene'úshit wosho wotáár bot'inetuwok'o finiruwone. 17 Manatse tuutson Krstos Iyesun Ik'osh fino tfaltsotse it'iruwee. 18 Ik'i ash woterawwots bo aletwok'o woshosh Krstos ti aap'onat finatse tuutson b́ fints keewo wotiyalabako k'osho aap'osh aawo shu'atse. 19 Hank'owere een adits milikit finuwotsn S'ayin shayiri angon Iyerusalemnat b gúúratse tuut Elwarik'oni b́ borfetso Krstos doo shishiyo danire.
20 Jam aawu t tewuno k'osh asho b́ agtsats dabr ago b́woterawo Krstos shutso b́ shiyerawu beyok jamok sheeng doo shishiyi keewuman daniye. 21 Isa. 52:15 Hanu,
«Haniyere shinon b́ jangosh eegoru keewerawu ashuwots bek'etune,
b́ jangosh shiyawwots t'iwitsitunee»
ett guut'etsok'one.
P'awlos Rom Maants Amoosh B́ Gawutsok'o
22 Manshowere itmaants twarawok'o ayoto taan baziyeree. 23 Andomó han gúúratsi fa'a datsuwotsatse t finit beeyokuwots bo beetsotse, hank'o ay dúrosh itn s'ilosh een tewuno tdetstsotse 24 Ispen maants t amor man weeron itn s'ilosh gawure. Muk' aawosh itnton gene'útsat tteshiyakon twerindo ttuwosh taan falit tep'o it k'alituwok'o jangere. 25 Andomó Ik' jirwots tep'et gizo deshde'er Iyerusalem maants ametuwe. 26 1 K'or. 16:1-4 Hanuwere Mek'odoniyonat Ak'yiyi datsatse fa'a Ik' jirwots Iyerusalemn beyiru tugúretsuwotssh boon tep'et gizo woshosh boshunon bogawutsotsne. 27 1 K'or. 9:11 Tep'anowere bo shunon imo boosh geyik b́wottsotsne, Ik' ash woterawots ayhudiyotsnton shayiri deero kayosh b́wotiyal boowere bomeets deeron ayhudiyotsi tep'o boosh geyife. 28 Eshe ko'iyets gizan Iyerusalem maants de'am boosh t imiyakon it weeron waar Ispen maants t ameti. 29 Itok twoor Krstos deero s'eenon itsh de'er tweetuwok'o danfee.
30 Tieshuwotso! t jangosh Ik'o maants k'onon tmaak'oriruwo taash itdabish nodoonz Iyesus Krstosnat S'ayin shayiri shunon iti k'oniruwe. 31 Ik'o taash it k'onituwere Yihud datsatsi fa'a amanerawu ashuwots kishotse farr Iyeresalemitse t detsts fiinonuwere Ik'i jirwotsoke dek'eyo b́daatsituwok'owe. 32 Han b́wotiyakon Ik'o bíetal geneúwon itok waarr itoke kashdek'o shunfee. 33 Jeeniko Izar Izewer it únetsnton wotowe! Amen.