1 Yɔgyɔgla de nama ka Naawen dek bisa baai ate wa yaali nna yegayega la. Dila nyiŋ la ni be pii nyiŋ nna yegayega ate ni a tomsi wa. 2 Yeezu Kirisita ale kpi te ti dii la a nyɛ se ka Juuma ale jam a pa ŋan masisa ale duŋsa a kaabi a te Naawen la. Yeezu Kirisita nyɛ ate ka Naawen sui yaa peenti a sak ti ayen wa a yaali ti kama. Ni basi ate ni yaalika a chim ni niŋ wari ase Kirisitawa yaalika ale tama ale de niŋ dii la.

3 Yɔgyɔgla de ni ka Naawen nuruba. Kula a be kan ŋman a magsi ayen ni a biisi nipɔk yaalik ale daŋta tuima ale butuem wie ale chaaba. 4 Ku be kan ŋman a magsi me ayen ni a biisi noai biem a yaase betta biik a diini, alege ku magsi ka ni nyeem kasim a a te Naawen jiam. 5 Ni seba nalimnyiini kama ayen baai meena ale ka nipɔk yaalisa ale tuim daŋtisa nyam ale butueta nyam la a kan baga a jo Naawen ale wa biika Yeezu Kirisita naamu po. Butueta nyam a nyɛ se ka nuru baai ale a kaabi bogluta a la ase ba nin yaali ba ŋantaŋa a gaam Naawen.

6 Ni kan a wom betta nyam wie ŋaai ale ŋa paasi ni la. Naawen sui ale puuri ale bala chaab. Wa le jam te ba ka waalika dai yeŋ po, dii nyiŋ la, ba kan zuli wa. 7 Dila nyiŋ la, ni kan te ni niŋ bo ale baai ale a biisi be sila chaama la po. 8 Ase nama ale jam kan seba Naawen dii po la, ni bo ka legi po, alege yɔgyɔgla de nama ka Nyɔnɔwa nuruba, ni yaa bo ka danni kantueŋka po. Ka dila ale soa ate ku a fe ayen ni bo danni kantueŋka po la. 9 Boan nyiŋa, nuru bala chaab a kasim a tom ka tuimmaŋsa a te Naawen. Ba be chim ka nuru maŋsa me. Ba chim ka nuru baai me ale a biisi wensie la. 10 Ni be pii nyiŋ ate ni a tom tuim ŋaai ale a nyɛ ate ti nyɔnɔwa sui a peenti la. 11-12 Ni kan ta wari a nyɛ ale wie ŋaai ale ka kiri ate nuruba a tom la. Dii nyiŋ la, ka nuru baai ale bo legini po la ale a tom ŋala. Alege, ni ta bala chaab nyini legini po a nyini danni kantueŋka po. Ku ka chivie ate nuru weeni ba ale sugi a nyɛ ŋaai la. 13 Ni dan nyɛ ba dila, ku a nyɛ a se ba tuimaŋa a yaa nyini ka kantueŋka po ate waai meena baga a nya ŋa la. 14 Boan nyiŋa wenbinni a dan ga pusi legini a kan ŋman a boro. Dila ale soa ate nuru wanyi weeni ayen,

15 Dila nyiŋ, ni be kpesi ni dek ale ni boka po ale ka dii ale nuruba la. Ni kan boro ase betta la, alege ni ti an boro ase yam nyam la. 16 Vaaŋa de po nuruba yegayega ale a tom tuimbaata. Alege nama, ni a gisi siuk tii po ate ni ayen ni kasim a a tom tuimmaŋsa la. 17 Ni kan a nyɛ se ni ka betta la, alege ni a gisi dii ate Naawen a yaali ayen ni a tomu a te wa la.

18 Ni kan pa ni dek a te daamɔa ate bu kaasi ni, alege ni pa ni dek meena a te Naawen Chiika. 19 Ni kasim a yi yi ŋaai ate Naawen Chiika a te ni ayen ni a yi la abe ni a te Naawen pimpauk ni suniima po. 20 Ti kowa Naawen a tom tuima ka nna yegayega a te ti. Dila nyiŋ la, ni kasim a te ti Kowa Naawen jiam ti Nyɔnɔwa Yeezu Kirisita yonni nyiŋ.

21 Ni basi ate ni popolaŋa meena a chim popola yena, ate ni baga a te Yeezu Kirisita zula.

22 Nama baai ale ka pooba la, ni siak a te ni choroba ase ni ale a siak a te Naawen dii la. 23 Boan nyiŋa, chorowa ta pagrim kama wa powa zuk ase Yeezu Kirisita ale ta pagrim Kirisita bisaŋa ale a tu chaab la meena zuk dii la. Bala a nyɛ se ka wa nyiŋka la ate wa yaa vari ba ba tuimbaataŋa po a basi. 24 Dila nyiŋ la, ku a fe kama ayen Kirisita bisaŋa ale a tu chaab la a siak a te Yeezu Kirisita. Siuk kula po me, pooba me a siak meena a te ba choroba.

25 Nama baai ale ka choroba la, ku a fe kama ate ni ta yaalika ale ni pooma ase Yeezu Kirisita ale a yaali baai meena ale a va wa la. Wa kpi kama a te ba ate ku sak ba wa yaalika ale soa dii ba jigi la. 26 Yeezu Kirisita nyɛ nyaku de ayen ku sak ayen wa pa Kirisita bisaŋa ale a tu chaab la a te ka Naawen, wa be pa ka Naawen wanni a biisi yaa pa ba te Naawen la. Wa be liŋ pa ka nyiam a sugri ba ale ge nyɛ dila. 27 Yeezu Kirisita a nyɛ wieŋa de kama, ayen wa baga Kirisita bisaŋa ale a tu chaab la meena ale ba nalimu ale ba welensaŋa ale ba ale chim nuru maŋsa la a te wa dek, ate wa kan ŋman nya ba kaasuŋku. 28 Ku a fe kama ate choroba ta yaalika ale ba pooba ase ba nidɔama ale a yaali ba dek dii la. Wa dan ta yaalika ale wa powa, ku a nyɛ se wa a yaali wa dek me kama la. 29 Waai an kisi wa dek nyiŋa, wa a nya ka zuk ale a te ka ŋandiinta kama. Yeezu Kirisita me abe a nya Kirisita bisaŋa ale a tu chaab la zuk ka dila. 30 Wa a ta yaalika ale ba ka nna yegayega, dii nyiŋ la ti a nyɛ se ka wa nyiŋka la. 31 Ase ba ale ŋmarisi Naawen gbaŋka po dila po dila po dii ayen, “Dila nyiŋ la, ku a fe kama ate nidɔa basi wa ko ale wa ma abe wa ge ate wa ale wa powa a chim nuru yeŋ.” 32 Wa susugi ale bo ŋmarisika de po. Mi be ale seba ku kiri ale dii la ale, Nipɔk ale wa chora ale ba chim bunyi dii la, a sak ti kama ayen Yeezu Kirisita ale Kirisita bisaŋa ale a tu chaab la meena me ka bunyi. 33 Ku be ka dila nama me jigi ayen, ku a fe kama ate choroba a yaali ba pooba a se ba ale a yaali ba dek dii la abe, pooba me a te ba choroma zula.