8
Lepela Doga Yesu ya Faloholoho
Matiu 8:1-4
(Maleko 1:40-45)
1 Fuyana Yesu uduhuli yai ya letama, dodoga baiwadi sa lau watan. 2 Taumoho lepela asiyebona ya abi,*8:2 Asiyebona mate doha <<tupitupi>> o <<lepela.>> ya laoma Yesu nuwanuwana yai ya tulibono na iyen,
Baꞌisa, yena wa tauꞌulu, mate u faloholohogu.†8:2 <<mate u faloholohogu>> na uliꞌuli haisa tiyen, <<haba wa faꞌaꞌagu.>>(Lewitikusi 13:6)
3 Yesu ya abilau, taumohona tauna yai, na alinana ya bui fafuyo, iyen,
E tauꞌulu. U loholoho!
Yofede, taumoho wa ana asiyebo ya ofi.
4 Habahim, Yesu ya libalau dogana lisina iyen,
U ataꞌatahi! Tabu sai ena u liba. U dudulai bee–, tau antalasam i ita sipoim. Yo ainauya Mose ena laugagayo ya libaen mate u gabu. Haba sa siba haꞌa wa loholoho. (Lewitikusi 14:4)
Hiyala Tau Lau Kulukuluwenna ena Sunuma
Matiu 8:5-13
(Luka 7:1-10)
5 Yesu ya mahano lau Kapanayum. Loma edi hiyala tau lau kulukuluina ya laoma be ya anꞌeta lau Yesu lisina bena haba ya saguhi. 6 Iyen
Aee–! Guyau, egu tau paisowa ya asiyebo be ya enoꞌeno luma yai. Hige gonowana i famwahiu yo ena kamkamna ya fafalaꞌi.
7 Yesu iyen,
Haba E lau be E faloholoho.
8 Na hiyala tau lau kulukuluina‡8:8 <<Hiyala tau lau kulukuluina,>> hesana mate <<Sentuliyon>> Loma alinadi yai. iyen,
Guyau, tabu u laoma egu luma. Yau hige ya dudulai. U liba moho, haba egu tau paisowa ya hwaina. 9 Paꞌana yau mate, dodoga lalaꞌi haisa gabuladi yai E paipaisowa hinaga. Na tau hiyala haisa mate gabulagu yai. Esega haba E faliba <<U lau!>> haba ya lau. Na hesa E faliba, yawa, <<U laoma!>> haba hinaga ya laoma. Na egu fayofayo tau abina E faliba, yawa, <<Ite u ginauli!>> haba ya ginauli.
10 Yesu ya atahiyedi, be ya noꞌo, yofede ya libalau dodoga sa laulau watan lisidi iyen,
E faliba dudulaimiu, hige sai Isalaela yai ya lobahi, ena kawawananaha laꞌina doha doga te!
11 E falibamiu mate dodoga haba sa laoma maihala ena aba kepama yai yo ena aba bulu yai be sa taꞌai mataꞌasi yai maꞌedi Abelaham, Isako, yo Iyakobo, Galewa Nuꞌuna yai.
12 Inmoho, safaluma bena haba Aba Baꞌisa Nuꞌuna dodogadi mate, haba sa pei lawedi ganamuli be ai kamumu sa tantan yo gadigadidi sa nali didinidi.
13 Habahim Yesu ya libalau hiyala tau lau kulukuluina lisina, iyen,
U lau em luma! Em kawawananaha debam yai somo wa fanuha haba ya tubu.
Yofede, maihalana yai ni, hiyala tau lau kulukuluwenna ena tau paisowa ya loholoho.
Boludi Yesu ya Faloholohodi
Matiu 8:14-17
(Maleko 1:29-34; Luka 4:38-41)
14 Fuyana Yesu ya lau Pita ena luma yai Pita botiyana waiwaihin mate ya atuꞌuhi ya ita ena aba enoꞌeno yai. 15 Yesu ya abilau tau asiyebo nimana yai, yofede ana atuꞌuhi ya talu mwalugulugu na ya paulaidi. (Luka 4:38)
16 Maimailafina, yaluwa heyaheyayadi dodoga ganahewadi yai sa ledima Yesu lebena. Yesu liba yai moho, na yaluwa heyeheyayadi ya liba duidi yo salumadi sa asiyebo sa loholoho.
17 Logena, Peloweta Isaiya ya libaen, iyen,
In iyabona adi asiyebo ya baheidi yo edi kamkamna ya abifahidi. (Isaiya 53:4)
Lisina yai Yesu ya ginauli doha, be libana ni ya fawananaha.
Yesu, Dodoga sa Lau Watan
Matiu 8:18-22
(Luka 9:57-62)
18 Yesu dodoga baiwadi ya itadi sa obiyo fataꞌiꞌili yofede ana hewahewali ya falibadi be sa lau gabogabo tefana.§8:18 <<Gabogabona>> mate hoꞌowa, na laꞌina doha Mullins Harbour, na nenena doha gabogabo. Inmoho, hige <alita>> paꞌana hoꞌowana ni, gonowana te nom.
19 Laugagayo tau lau faꞌataina hesa ya laoma, be iyen,
Tanuwaga, yau E nonoha, em aba lau somo yai haba E lau watanim.
20 Yesu iyen,
ꞌWayoꞌwayowa edi gali, yo ataiꞌa hinaga edi nohi, inmoho Doga Natuna hige ena aba eno.
21 Yesu tau famuli watanina hesa iyen,
Guyau, bwaꞌibwaꞌina u biya afulegu be ya lau tamagu ya boꞌusai.
22 Yesu iyen,
U famuli watanigu, tau peꞌi falena tau peꞌi haba sa boꞌusai.
Yesu Gabogabo ya Liba Fadaumwali
Matiu 8:23-27
(Maleko 4:35-41; Luka 8:22-25)
23 Yesu yo ana hewahewali waga yai sa awa gogo. 24 Na hige walolona, hwayahwayau laꞌilaꞌi ya abi mahano. Edi waga bena haba ya bulu. Na Yesu mate haꞌa ya eno ꞌwafu.
25 Ana hewahewali sa lau be sa fanohi, tiyen,
Guyau, u saguhida! Ite haba te peꞌi!
26 Yesu iyen,
Paꞌana somo be ami ꞌwasabu? Emi sunuma haga ti kiu!
Habahim ya obiyo be hwayahwayau yo bagodu ya falibadi be sa fatautau. Yofede, daumwali laꞌilaꞌi.
27 Mahudoꞌidi sa noꞌo tiyen,
Taumoho somosomohena itete? Hwayahwayau yo bagodu alinana sa awaꞌabiyen.
Dodoga Luwaga Yaluwa Heyaheyayadi Ganahewadi yai
Matiu 8:28-34
(Maleko 5:1-20; Luka 8:26-39)
28 Fuyana Yesu ya mahano lau gabogabo tefana yai, Gadala Nuꞌuna yai,*8:28 Nuꞌu hesana hesa mate <<Gelasa.>> Au itaꞌitalau Maleko 5:1 yo Luka 8:26. tatau luwaga demoni ganahewadi yai bwana yai sa laolaoma be Yesu sa lobahi. Luwagadi sa inonodi sa heyaya wananaha be nuꞌuna sa bobolei be ibege sai i lau niya.
29 Maꞌesega na, sa ꞌwalaꞌui, tiyen,
Yaubada Natuna, somo wa fanuha lisimai yai? Maihala hige dudulaina i abi, na wa laoma bena wa fakamkamnamai?
30 Salai baiwadi mate sa banban, aꞌawadi hige i lofa. 31 Yofede, yaluwa heyaheyayadi wa, Yesu sa faliba, tiyen,
Yena bena wa liba afulemai, u dui lawemai salai baiwadi ni, ai ganahewadi.
32 Yesu iyen,
Au lau!
Yofede, sa kalamahano, be sa lau salai sa luhufidi. Be salai baiwana sa tafo sa lidi daha yai, sa dago hoꞌowa ganahewana yai be sa kapulolo.
33 Salai tau itaꞌita watanidi sa gela, sa lau taon. Demoni sa luhufidi tataudi somo ya tubu lebedi yai mate dededi tau gela sa dedei. 34 Yofede, doga mahudoꞌina taon ganahewana yai sa lau be Yesu sa failobahi, be sa faliba, tiyen,
Ema nuꞌu te u lau afulen!
*8:2 8:2 Asiyebona mate doha <<tupitupi>> o <<lepela.>>
†8:2 8:2 <<mate u faloholohogu>> na uliꞌuli haisa tiyen, <<haba wa faꞌaꞌagu.>>
‡8:8 8:8 <<Hiyala tau lau kulukuluina,>> hesana mate <<Sentuliyon>> Loma alinadi yai.
§8:18 8:18 <<Gabogabona>> mate hoꞌowa, na laꞌina doha Mullins Harbour, na nenena doha gabogabo. Inmoho, hige <alita>> paꞌana hoꞌowana ni, gonowana te nom.
*8:28 8:28 Nuꞌu hesana hesa mate <<Gelasa.>> Au itaꞌitalau Maleko 5:1 yo Luka 8:26.