11
Yesu yo Diyon Babasito
Matiu 11:1-19
(Luka 7:18-35)
1 Yesu tau famuli watanina 12 ya fatalahadi mulina yai, nuꞌuna ya lau afulen, na ya lau ya lau faꞌata yo ya lauguguya, Galili taondi yai. 2 Fuyana Diyon deli yai, Keliso somo ya ginaginaulidi, wasadi ya atahiyedi. Yofede tau famuli watanina haisa ya duidi sa lau Yesu lisina.
3 Sa fatiꞌoi tiyen,
U falibamai! Um logem Diyon ya libaen haba wa laoma, o doga hesa haba ꞌe bagiyen?
4 Yesu alinadi ya bui fuyoi iyen,
Somo ami ita yo ami atahiyen, au fuyo, be Diyon au faliba auwen,
5 <<Tau matatoutou haba matadi sa falaladi,
yo tau dabidabi haba sa laulau.
Saluma asiyebo taudi yai mate sa loholoho;
Tau beya tuitui beyadi sa taꞌafasi, (Isaiya 35:5-6)
yo tau peꞌi sa mwahuli fuyo;
yo wasa loholohona mate sa duwai tau gogo gesagesa lisidi yai.>> (Isaiya 61:1)
6 Yena sai hige i nuwa heyaya lisigu yai, nuwana i amna!
7 Diyon tau famuli watanina sa lau na mulidi yai, habahim, Diyon wasana Yesu ya dedei fatubu baiwa lisidi yai, iyen,
Fuyana ami lau nuꞌu pitapitalina yai, somo bena ami ita? Hwayahwayau hawahawa ya fafamwahiudi bena ami itadi? 8 Ami lau ni somo bena ami ita? Taumoho ena leli loholohodi bena ami ita? Higeꞌe! Salumadi edi leli loloho mate kin edi luma namanamalidi yai sa gogo!
9 Ami lau bena somo ami ita? Peloweta hesa bena ami ita ye? Ii–, moꞌisa, inmoho, doga ni peloweta mahudoꞌidi ya diꞌoidi. 10 In logenana wasana Buka Tabuna yai sa uli, tiyen,
<<Yaubada iyen, <Haba egu wasa tau lawenna E fatamali bwaꞌiyen, be em edaꞌeda ya sepa nonohai.>>> (Malakai 3:1; Maleko 1:2)
11 E falibamiu hige waihin laꞌi natuna maꞌena Diyon Babasito gonogonowadi. Inmoho, sai ya kiu Galewa Aba Baꞌisa yai mate ya laꞌi wananaha, habahim Diyon Babasito. 12 Diyon Babasito ena fuya yai na ya laowa be ahoꞌite, dodoga inoꞌinono heyaheyaya Galewa Aba Baꞌisa Nuꞌuna sa anpatei bena sa lau gili fahi.*11:12 Alina Giliki yai, lausoisoi te aniyona begana ya poꞌi
13 Paꞌana Peloweta mahudoꞌidi yo Laugagayo sa libalibaen, ya laoma ee–, Diyon ena fuya yai. 14 Yo ibe yena tiyen, <<Ilaidiya haba ya laoma,>> logenana bena ami tauꞌulu, mate Ilaidiya, na logenana In Diyon. (Malakai 4:5)
15 Sai fafabeyana mate libana i falau watan!
16 Hiti ahoꞌite haba E fagonogonowaꞌedi doha ite? Iti doha wawaya kikiꞌina maketi yai sa taꞌataꞌai, na sa yogayoga lau haidadi lisidi, tiyen,
17 <<Emi ꞌe figo, na hige au leꞌi. Peꞌi lilidi ꞌe wanaidi, na hige au tan.>>
18 Fuyana Diyon ya laoma, ya andabu yo hige waen i nom, be doga mahudoꞌina tiyen,
<<Yaluwa heyaheyayana ganahewana yai.>>
19 Na Doga Natuna ya laoma, ya kalahe yo ya nom, be dodoga tiyen,
<<Doga te hola au ita! In ya andom, yo ya nom wananaha. Takesi tau tano yo tau heyaya hidadi!>>
Inmoho sonoga aba fawananahana mate ena paisowa loholohodi yai.
Taon Kawakawawananaha Gesadi
Matiu 11:20-24
(Luka 10:13-15)
20 Yofede, taon laꞌilaꞌidi somo yai Yesu ena no'o abi'abidi mahudo'idi ya ginaulidi mate ya liba suꞌuidi, paꞌana nuwadi hige ti buidi.
21 Iyen,
Kolasin Nuꞌuna Yo Betesaida Nuꞌuna! Au nuwadubu! Pa'ana noꞌo abiꞌabidi lisimiu yai E ginaulidi, ibe E ginaulidi ai Taiya yo Sidon egoba beyabeyana haꞌa sa nuwabui be baiki sa liꞌodi yo sa anꞌouya. (Isaiya 23:1-18; Diyoweli 3:4-8)
22 E faliba dudulaimiu mate, Fakasa Lahaina yai haba Yaubada ena nuwatohatoha laꞌilaꞌi ya lau Taiya yo Sidon lisidi, habahim umi! 23 Na umi Kapanayum dodogadi! Emi fanuha bena ibomiu haba ami hasai Galewa? Haba ami lau dodoga peꞌipeꞌidi edi aba miya.†11:23 Alina Giliki yai mate <<Hadesi>> na aniyona doha <<Biula>> o <<Tanalai.>> Ibe noꞌo abiꞌabidi lisimiu yai E ginauli ai Sodom E ginaulidi, egoba iti sa miya be–, ahoꞌite! (Isaiya 14:13-15; Genesi 19:24-28)
24 Bena ami kawawananaha mate, Fakasa ana Lahai yai, Yaubada haba nuwatohatoha la'ila'i Sodom ai lisidi ya ginauli, na habahim umi.
Au Laoma Lisigu, be au Anyawasi
Matiu 11:25-30
(Luka 10:21-22)
25 Lahaina yai Yesu iyen,
Tamagu E fadebasaem, Galewa yo Tanohi edi Guyau, paꞌana ginauli te wa simodi tau sibasiba yo tau nuwanuwatuhu lisidi yai wa simodi, na wa fataumahatadi wawaya kikiꞌina lisidi yai. 26 Wananaha, Tamagu, pa'ana um em fanuha yai wa ginauli doha!
27 Tamagu mate, ginauli mahudoꞌina ya felegu. Natuna hige sai i sibai, Tamana ibona ya sibai. Na Tau Tamatama hige sai i sibai, Natuna ibona ya sibai, yo sai Natuna ya fasinabodi mate haba ai lisidi ya fataumahata.
28 Saluma ami ewaꞌewa sa mwahu yo ami bayaho heyaya, mahudoꞌimiu au laoma lisigu, haba E faꞌanyawasimiu. 29 Egu oibaho au abi be ai dabayalomiu au tole, na sibasiba ai lisigu au anpatei, paꞌana yau mate tau nuwa lidilidi, yo yau tau gadosisi be haba anyawasi ami lobahi. (Delamaiya 6:16)
30 Paꞌana egu oibaho E felemiu mate, hige i mwahu. Yo ami ewaꞌewadi E fabahemiu, sa kufefe.