20
Tau paisowa Waen Gabuna yai Heyaheyasondi
Matiu 20:1-16
1 Galewa Basileiyana itaꞌitana doha ite. Fuya maꞌesega, doga hesa ma hwalahwalalana ya aulaha, be ya lau dodoga ya fatalawaudi, be haba ena ai waen gabuna sa paisowa. 2 Ya falibadi mate lahai esega haba ya famaisadi, kina esega,*20:2 Giliki yo Loma Alinadi yai, monina te hesana denali. na ya fatamalidi, be ena waen gabuna yai sa paisowa. 3 9 koloki ya lau mate haisa maketi yai ya itadi, sa fafamiya gaibu.
4 Ya falibadi iyen,
<<Umi hinaga au lau egu ai waen gabuna au paisowa. Haba maisa dudulaina E felemiu.>>
5 Yofede, sa lau sa paisowa. Lahai laꞌi yo maimailafina yai, laulauna eseꞌesegana ya ginauli. 6 Maimailafi doha 5 koloki ya lau maketi yai, dodoga haisa hinaga ya itadi, sa miyamiya gaibu. Yofede, ya fatiꞌoidi, iyen,
<<Paꞌana somo be emi fuya ami pei gaibu, na hige somo au ginauli?>>
7 Alinana sa bui, tiyen,
<<Hige sai laꞌi i fatalawaumai.>>
Ya falibadi, iyen,
<<Au lau egu ai gabu, au paisowa hinaga.>>
8 Maimailafina, habahim gabu tanuwagana ena tau paisowa edi baꞌisa ya faliba, iyen,
<<Tau paisowa u yogaidima! Tau paisowa mumulita, maisadi u fele bwaꞌiyedi; na tau paisowa bwaꞌi, maisadi u fele mulitaidi.>>
9 Maimailafi yai tau paisowa fatubu maisadi K1.00 sa abidi. 10 Na salumadi maihala dudulaina yai sa paisowa be–, ya mailafi, edi nuwatuhu haba maisa katupwanalina sa abi. Inmoho, iti tau paisowa bwaꞌi yo mailafi yai tau fatubu, mate mahudoꞌidi maisadi K1.00.
11 Maisadi sa abidi, mulina yai gabu tanuwagana sa fatalapiliyen, tiyen,
12 <<Tau paisowa wa abi mulitaidi sa paisowa awa esega moho, na maisadi wa feledi mate doha ai maisamai. Inmoho ai mate ꞌe pewalosimai yo maihala hige i palemai.>>
13 Hidadi hesa alinana gabu tanuwagana ya bui iyen,
<<Hidagu, hige ya bwalaim. Haꞌa E falibam mate K1.00 yai haba E famaisam be wa tauꞌulu.>>
14 <<Maisam moho u abi na u lau em luma. Yau egu fanuha yai be tau bwaꞌi yo tau mulita maisamiu gonogonowadi. 15 Yau egu moni, na paꞌana somo be tabu ibogu egu nuwatuhu ya lau watan? Nuwana u nuwa eleꞌela paꞌana E famaisa komokomaim?>>
16 Habahim, Yesu ena liba ofiꞌofina, iyen,
Mulimulitadi haba sa bwaꞌi, na bwaꞌibwaꞌidi haba sa mulita. (Matiu 19:30)
Fafafaihonana Yesu ena Peꞌi Libana ya Libaen
Matiu 20:17-19
(Maleko 10:32-34; Luka 18:31-34)
17 Yesu ya lau Yelusalem ana halulu, na ana hewahewali 12, ya foya hudoꞌiyedi be ya falibadi, iyebom,
18 Te hasahasai Yelusalem, haba Doga Natuna ana sa wewe tau antalasam babaꞌisadi yo laugagayo tau lau faꞌataina ai lisidi be sa wunui.
19 Haba taꞌowawa sa feledi be sa lau faliuhwaꞌen, sa talai, yo sa tutu fapatu. Inmoho, lahai faihona ai mulidi, haba Yaubada ya famwahuli fuyo.
Sebedi Lahuna ena Anꞌeta
Matiu 20:20-28
(Maleko 10:35-45)
20 Habahim, Sebedi lahuna ma nanatuna luwaga sa laoma Yesu lisina, be ya tulu bono, sadaina yai, na ya anꞌeta lau Yesu lisina.
21 Alinana Yesu ya fafuyo iyen,
Somo wa fanuha?
Waihin iyen,
Yena wa famala Baꞌisa mate nanatugu luwaga te, edi aba taꞌai u feledi, hesa ai sibam na hesa ai seulim.
22 Yesu iyen,
Somo wa fatifatiꞌoi, hige u sibai.
Sebedi nanatuna luwaga wa Yesu ya falibadi, iyen,
Gonowamiu haba egu kamkamna te ami sigufi saguhigu?†20:22 Uliꞌuli haisa tiyen, <<Kaputi wa E nomnom te, umi ami siba mate gonowana ami nom? Yo babasito lisina yai sa fababasitoigu haba hinaga sa fababasitoimiu wa?>> Na aniyona mate, <<Gonowamiu haba egu kamkamna te ami sigufi saguhigu?>>
Alinana sa fafuyo, tiyen,
Ai gonowamai.
23 Yesu ya falibadi iyen,
Gonowamiu haba egu kamkamna ami sigufi saguhigu. Inmoho, yau hige egu dudulai, bena haba ai sibagu yo ai seuligu au taꞌai. Salumadi edi aba taꞌai Tamagu ya abi nonohaidi, mate iti logedidi haba ainiya sa taꞌai.
24 Tau famuli watanina safuhudohudoꞌi haisa sa atahi, be, Sebedi nanatuna luwaga sa manabalaꞌedi. 25 Yofede, Yesu mahudoꞌidi ya yoga gogonidi, na ya falibadi, iyen,
Ami sibai mate, taꞌowawa tau foyahidi gigibwali lisidi yai, be edi dodoga sa laulau beleleidi. Yo edi babaꞌisa edi gigibwali sa fapaisowa be edi dodoga sa dalu beleleidi. 26 Na umi, tabu emi nuwatuhu doha. Ibe umi esega sai wa fanuha bena wa fadoga laꞌilaꞌim mate, um bena dodoga edi wa paisowa; 27 yo yena sai bena in ya eda bwaꞌiyemiu, bena emi fayofayo tau abina. 28 Doha, Doga Natuna ya laoma tanohi yai, hige bena dodoga ena ti paisowa. Higeꞌe, In bena dodoga edi ya paisowa yo ena mwahuli ya pei be dodoga ouꞌouli ya une fafuyodi.
Mata Toutou Luwaga Yesu ya Faloholohodi
Matiu 20:29-34
(Maleko 10:46-52; Luka 18:35-43)
29 Yesu yo tau watanina bena Diyeliko Nuꞌuna haba sa lau afulen,‡20:29 Matiu 19:1 yai ya uli: <<Ya lau Diudeya Nuꞌuna, Diyodan Hoꞌowana tefana yai.>> Na lausoisoi yai te, Diyodan Hoꞌowana haꞌa sa lau tefa, bee–, Diyeliko Taonna yai sa gogo. na dodoga baiwadi sa famuli watanidi. 30 Tau matatoutoudi luwaga mate, edaꞌeda sadaina yai sa taꞌataꞌai, sa atahiyen mate, Yesu haba ya laoma ya lau. Yofede, sa yogayoga tiyen,
Deiwidi Natuna!§20:30 <<Deiwidi Natuna>> aniyona mate Yesu mate Deiwidi ana hiti mulita. U nuwatohatohaemai!
31 Dodoga baiwadi wa, tau matatoutou luwaga sa sagasagaliyedi tiyen,
Au famakano!
Inmoho, hige edi liba ti lau watan. Sa yoga laꞌi boda tiyen,
Deiwidi Natuna! U nuwatohatohaemai!
32 Yesu ya obiyo tohai na ya yogaidi, be ya fatiꞌoidi iyen,
Emi fanuha somo lisigu yai bena E ginauli?
33 Alinana sa bui tiyen,
Guyau, ꞌe fanuha bena matamai wa faloholohodi!
34 Yesu ya ita nuwatohatohaedi, be ya abilau matadi yai. Hige walolona, matadi sa falaladi yofede sa famuli watan.
*20:2 20:2 Giliki yo Loma Alinadi yai, monina te hesana denali.
†20:22 20:22 Uliꞌuli haisa tiyen, <<Kaputi wa E nomnom te, umi ami siba mate gonowana ami nom? Yo babasito lisina yai sa fababasitoigu haba hinaga sa fababasitoimiu wa?>> Na aniyona mate, <<Gonowamiu haba egu kamkamna te ami sigufi saguhigu?>>
‡20:29 20:29 Matiu 19:1 yai ya uli: <<Ya lau Diudeya Nuꞌuna, Diyodan Hoꞌowana tefana yai.>> Na lausoisoi yai te, Diyodan Hoꞌowana haꞌa sa lau tefa, bee–, Diyeliko Taonna yai sa gogo.
§20:30 20:30 <<Deiwidi Natuna>> aniyona mate Yesu mate Deiwidi ana hiti mulita.