Jax era e chajr ojroner lo que tz'ijb'ab'ir umen e Apóstol Pablo tama e grupo ajc'upesiajob' xe' turob' tama e chinam Tesalónica
2 Tesalonicenses
1
Pues nen xeꞌ Pabloen taca e Silvano y e Timoteo war catzꞌijbꞌa e carta era tibꞌa xeꞌ jax inteꞌ grupo ajcꞌubꞌesiajox xeꞌ turox tama e chinam Tesalónica xeꞌ intera ibꞌijnusiaj taca Catata Dios y taca Cawinquirar Jesucristo ubꞌan. Chꞌamic utacarsiaj y ujiriar Catata Dios y tuaꞌ Cawinquirar Jesucristo.
E jatzꞌuar lo que tuaꞌ uchꞌamiobꞌ tin e ajmabꞌambꞌanirobꞌ conda achecta watar e Cristo
Pues niwermanuox, war catattzꞌi ucꞌabꞌa Cadiosir tamarox iraj iraj bꞌan cocha ucꞌani tuaꞌ cache. Porque war achꞌiꞌ icꞌubꞌesiaj tama Cadiosir axin, y war iyajta ut ibꞌa más y más axin. Y tamar era war catattzꞌiox tut e sian grupo ajcꞌubꞌesiajobꞌ iraj iraj que war ixqꞌuecꞌo ixcꞌubꞌseyan tama Cadiosir motor que war inumse ibꞌa meyra tama e sian cꞌuxner. Pues chequer que erach Cadiosir conda uche juzgar porque tamar era war ixquetpa tawar tuaꞌ ixochoy tama uchinam cocha war inumse ibꞌa era umen taca que war ixcꞌubꞌseyan tama e Cristo.
Pues tawar Cadiosir xeꞌ cꞌani uyajcꞌu uyeror tunor tin e war uchiox inumse ibꞌa era, y tuaꞌ axin uyajcꞌox ujiriar watar e día cocha war inumse ibꞌa meyra era, y bꞌan tuaꞌ axin uyajcꞌon non ubꞌan tama e día conda achecta watar Cawinquirar Jesús tut e qꞌuin macuir uwarar e cꞌajc taca uyangelobꞌ xeꞌ meyra ayan ucꞌotorer. Jaxir watar taca inteꞌ nuxi jatzꞌuar tuaꞌ uwatzꞌi tunor tin e machi unatobꞌ chi Cadiosir y tunor tin e machi acꞌubꞌseyanobꞌ tut uyojroner Cawinquirar Jesús tama e corpesiaj. Jaxirobꞌ tuaꞌ axin ajajtzꞌobꞌ taca inteꞌ nuxi tijresiaj xeꞌ machi tuaꞌ acꞌapa, y ucꞌani tuaꞌ ajujrobꞌ najtir tut Cawinquirar y najtir tut e nuxi tawarer lo que ayan tama ucꞌotorer Cawinquirar. 10 Y bꞌan tuaꞌ anumuy tama e día conda achecta watar Cawinquirar tuaꞌ atajttzꞌa umen tunor tin e tuobꞌ y conda tuaꞌ atzay eꞌrna umen tunor tin e war acꞌubꞌseyanobꞌ tamar. Y cocha nox cꞌapa ichꞌami tunor uyojroner e Dios lo que cay cachecsu tiut, nox ubꞌan tuaꞌ ixquetpa taca tunor e sian ajcꞌubꞌesiajobꞌ era.
11 Pues tamar era war cacꞌajti taca e Dios tamarox iraj iraj que jaxir tuaꞌ axin uyustes tunor iweroj este que ixcꞌotoy ixquetpa erach inyajrer tamar jaxir porque tamar era sicbꞌabꞌirox umener. Y war cacꞌajti taca e Dios ubꞌan que jaxir tuaꞌ utacriox meyra taca ucꞌotorer tuaꞌ ixajcꞌuna tunor lo que imbꞌutz lo que war iyusre ichꞌami tuaꞌ, y que Cadiosir tuaꞌ axin utacriox taca tunor lo que war iche umen que war ixcꞌubꞌseyan tamar. 12 Pues tamar era cꞌani axin atajttzꞌa meyra ucꞌabꞌa Cawinquirar Jesús tamarox, y nox ubꞌan cꞌani ixixin ixtajttzꞌa umen e Dios umen que meyra ayan utacarsiaj Cadiosir y tuaꞌ Cawinquirar Jesucristo ubꞌan.