1 Pues entonces coner war caxana tama ubꞌir e Dios. Pero ixnix chamenon ani umen que war ani caxana tama e incsibꞌaner y tama e mabꞌambꞌanir. 2 Y cay xanon tama e mabꞌambꞌanir bꞌan cocha ucꞌani e gente tara tor e rum. Y cay cache tunor lo que ucꞌani e diablo xeꞌ jax e ajcꞌotorer xeꞌ acꞌotori tama e icꞌar tara tor e rum. Jaxir jax inteꞌ nuxi mein xeꞌ mabꞌambꞌan xeꞌ war utacsu axin tunor tin e machi cꞌani acꞌupseyanobꞌ tut e Dios tuaꞌ uchiobꞌ más e mabꞌambꞌanir. 3 Y bꞌanon ani ubꞌan conda merato cacꞌupseyan tama Cawinquirar Jesucristo. Pues non cay cacꞌupse cawerir y cay cache tunor e mabꞌambꞌanir lo que uyusre uche y cay cache tunor e mabꞌambꞌanir lo que ayopa tama cabꞌijnusiaj. Y tama tunor era non tawaron ani tuaꞌ cachꞌami ujatzꞌuar e Dios bꞌan cocha aquetpa tuaꞌ uchꞌamiobꞌ e inmojr gente xeꞌ turobꞌ tara tor e rum xeꞌ machi cꞌani uyactobꞌ umabꞌambꞌanirobꞌ. 4 Pero Cadiosir incꞌun uwirnar ticoit non, y war uyajta coit taca inteꞌ cꞌunersiaj xeꞌ nojta, 5 y tamar era conda chamenon ani tama e mabꞌambꞌanir Cadiosir sutpa uyajcꞌon cacuxtar xeꞌ imbꞌutz bꞌan cocha usuti uyajcꞌu ucuxtar e Cristo otronyajr. Y tamar era canata que corpesbꞌiron tamar taca utacarsiaj e Dios. 6 Y Cadiosir ixin ulocsion tama ubꞌir e chamer y usuti ubꞌixqꞌueson tujam e chamenobꞌ taca e Cristo, y uchion caturuan tuyejtzꞌer e Cristo Jesús tichan tut e qꞌuin. 7 Y uche cocha era tuaꞌ uwirse tunor e inmojr tama e tiempo xeꞌ watar cobꞌa e nuxi tacarsiaj lo que war uyajcꞌon era. Y uche tunor era umen que incꞌun uwirnar ticoit non xeꞌ turon tama e Cristo Jesús. 8 Pues non corpesbꞌiron umen utacarsiaj e Dios y umen que cꞌupseyanon tama Cawinquirar. Y cachꞌami e corpesiaj majax tamar lo que cay cache xeꞌ imbꞌutz sino que intaca uyajcꞌon e corpesiaj e Dios. 9 Y tamar era chequer que mamajchi erer acorpesna umen lo que war uche xeꞌ imbꞌutz, y bꞌan quetpa cocha era tuaꞌ aquetpa chequer que mamajchi uyubꞌi utattzꞌi ubꞌa nien imbꞌijc tut e Dios. 10 Pues tunoron chembꞌiron umen e Dios tama e Cristo Jesús tuaꞌ caxin cache meyra lo que imbꞌutz. Y lo que war ucꞌani tuaꞌ cache xeꞌ imbꞌutz ustabꞌir umener conda ma ani tucꞌa or e rum era.

11 Pues entonces bꞌijnunic que nox xeꞌ majax tuox e Israel umen que bꞌan cuxpox war ixarobꞌna umenerobꞌ que matucꞌa icꞌampibꞌir umen que machi war ixuri imbꞌijc uqꞌuewerir itejromar. Pero e gente tuaꞌ e Israel warto uchiobꞌ tunor era y anatanwa umen tunor que jax jaxirobꞌ xeꞌ war uxuriobꞌ imbꞌijc uqꞌuewerir utejromar xeꞌ jax inteꞌ patnar xeꞌ achena taca ucꞌabꞌ inteꞌ winic. 12 Y bꞌijnunic que tama e tiempo xeꞌ numuy najtir ani turox tut e Cristo, y najtir turox tut e gente tuaꞌ e Israel, y najtir turox tut tunor e pacto xeꞌ uchecsu que actana inteꞌ ojroner umen e Dios tuaꞌ uchojbꞌes e gente tuaꞌ e Israel. Y tamar era intaca turox tara tor e rum. Ma ani tucꞌa war icojco tamar y nien machi ani war ibꞌijnu jay ayan ani Idiosir. 13 Pero coner, nox xeꞌ najtir ani turox tut e Cristo Jesús, quetpox intera ibꞌijnusiaj tacar y quetpox tuyejtzꞌer jaxir umen que ixin uwechꞌe uchꞌichꞌer tut e cruz. 14 Porque e Cristo jax xeꞌ ixin usisijres tunor e qꞌuijnar lo que ayan ani tuaꞌ e gente xeꞌ tuobꞌ e Israel taca e gente xeꞌ majax tuobꞌ e Israel. Y jaxir ixin ulocse e qꞌuijnar era lo que quetpa ani bꞌan cocha inteꞌ macteꞌ tut e gente tuaꞌ e Israel y tut e gente xeꞌ majax tuobꞌ e Israel xeꞌ machi ani uyubꞌi uwira ubꞌobꞌ. Y tamar era e Cristo uche tuaꞌ aquetpa intera cabꞌijnusiaj tunoron xeꞌ war cacꞌupseyan tamar jaxir. 15 Y e Cristo uche tuaꞌ asatpa tunor ucꞌotorer uley e Moisés conda ixin chamay tut e cruz. Y bꞌan uche tuaꞌ aquetpa inteꞌ taca chinam tuaꞌ e gente xeꞌ tuobꞌ e Israel taca e gente xeꞌ majax tuobꞌ e Israel. Entonces tin e acꞌotoy acꞌupseyanobꞌ tama e Jesucristo aquetpobꞌ intera ubꞌijnusiajobꞌ tacar e inmojr era. Y jaxir ixin uche tuaꞌ aquetpa e jiriar tama tunoron. 16 Y tamar era e Cristo cꞌapa usisijres tunor e qꞌuijnar lo que ayan ani tuaꞌ e gente xeꞌ tuobꞌ e Israel y lo que ayan ani tuaꞌ e gente xeꞌ majax tuobꞌ e Israel, y tamar era ixin cꞌumpobꞌ taca e Dios y tacar ubꞌobꞌ. Pues e Cristo ixin uche cocha era conda chamay tut e cruz, y tamar era loqꞌuesna tunor uqꞌuijnarobꞌ lo que ayan ani tuobꞌ e chateꞌ chinam era tuaꞌ uyubꞌi aquetpobꞌ intera chinam tama e Cristo coner.

17 Pues entonces conda tari e Cristo tara tor e rum cay uchecsu e jiriar tiut nox xeꞌ majax tuox e Israel xeꞌ najtir ani turox tut e Dios, y cay uchecsu e jiriar ubꞌan tut e gente tuaꞌ e Israel xeꞌ majax najtir turobꞌ tut e Dios. 18 Pues tamar lo que uche e Cristo y umen que ajcꞌunon Unawalir e Dios xeꞌ inteꞌ taca ayan war aquetpa pasar e bꞌir ticoit tunoron coner motor jay tuon e Israel o motor jay majax tuon e Israel tuaꞌ uyubꞌion cacꞌotoy tut Catata Dios. 19 Y tamar era nox xeꞌ majax tuox e Israel mix jax ajnajtir genteox coner y machi ixto war ixturuan tama inteꞌ chinam xeꞌ majax tibꞌa, sino que coner nox interox taca tunor e inmojr maxtacobꞌ tuaꞌ e Dios. 20 Y non era laron cocha ingojr otot xeꞌ chembꞌir taca e petzbꞌir tun. Y inteꞌ intion laron cocha ingojr tun xeꞌ aquetpa tujor uwabꞌnibꞌ e otot era. Y uwabꞌnibꞌ era tiaꞌ war caquetpa jax e canseyaj tuaꞌ e apostolobꞌ y tuaꞌ e profetobꞌ. Y e tun xeꞌ más ayan ucꞌampibꞌir tama uwabꞌnibꞌ era jax e Cristo Jesús. 21 Y tamar Cawinquirar era tunoron war caquetpa bꞌan cocha ingojr otot y inteꞌ intion bꞌanon cocha ingojr tun xeꞌ war acꞌatpuna axin tama unac e otot era este que axin atꞌabꞌay tichan tuaꞌ aquetpa inteꞌ nuxi otot xeꞌ erach tiaꞌ tuaꞌ ojytzna ut e Dios tamar. 22 Y tamar era nox ubꞌan quetpox tama unac e otot era xeꞌ tuaꞌ Cawinquirar. Y Catata Dios war aturuan tama e otot era tama Unawalir. Y tamar era tunorox quetpox bꞌan cocha ingojr otot tiaꞌ war aturuan Catata Dios.