1 Pues jax era ucajyesnibꞌir tama tunor e ojroner tama e Jesucristo xeꞌ jax Uyunen e Dios. 2 Pues cay tunor era tamar lo que chꞌar tzꞌijbꞌabꞌir umen inteꞌ profeta xeꞌ ucꞌabꞌa Isaías xeꞌ turuan tama e onian tiempo xeꞌ cay utzꞌijbꞌa* Pues e versículo 2-3 era atajwina tama e Malaquías 3:1, y Isaías 40:3. lo que Catata Dios uyare Uyunen y che:

4 Pues entonces ayan inteꞌ winic xeꞌ ucꞌabꞌa Juan xeꞌ cay uchꞌuyi e gente tama inteꞌ choquem lugar y cay uyare e gente axin que ucꞌani tuaꞌ uyactobꞌ umabꞌambꞌanirobꞌ y tuaꞌ achꞌujyobꞌ tama e jaꞌ tuaꞌ aquetpa chequer que cꞌumpa e Dios tacarobꞌ. 5 Y tunor e gente xeꞌ turobꞌ tama e departamento Judea y xeꞌ turobꞌ tama e chinam Jerusalem cay cꞌotoyobꞌ tuaꞌ uyubꞌiobꞌ lo que che e Juan. Y conda e gente cꞌapa uchecsuobꞌ umabꞌambꞌanirobꞌ, chꞌujyobꞌ inteꞌ intiobꞌ umen e Juan tama e xucur Jordán xeꞌ anumuy tama e choquem lugar.

6 Y e bꞌujc lo que lapar umen e Juan chembꞌir taca utzutzer inteꞌ arac xeꞌ ucꞌabꞌa camello y ucajchibꞌ unac jax inteꞌ qꞌuewer. Y lo que war ucꞌuxi jax taca lo que ayan tama e cꞌopot cocha e sajc y uchabꞌir e xux. 7 Y jaxir war uyare e gente y che:

—Ayan inteꞌ winic xeꞌ watar tanipat xeꞌ más ayan ucꞌotorer que nen. Porque nen ma tawaren nien tuaꞌ imbꞌani ut uxanabꞌ, porque meyra ayan ucꞌotorer. 8 Pues nen era war inchꞌuyma taca e jaꞌ, pero jaxir cꞌani uchꞌuyox taca Unawalir e Dios, che e Juan.

9 Pues entonces tama e tiempo era locꞌoy e Jesús tama e chinam Nazaret tama e departamento Galilea tuaꞌ axin esto tama e choquem lugar tiaꞌ turu e Juan tuaꞌ achꞌujya umener tama e xucur Jordán. 10 Entonces chꞌujya e Jesús, y conda war alocꞌoy macuir e jaꞌ uwira que pascꞌa ut e qꞌuin tichan, y uwira Unawalir e Dios ecmay tari tujor bꞌan cocha uwirnar incojt sacsac mut. 11 Y wacchetaca pejcna umen Catata Dios xeꞌ turu tichan y ubꞌna cocha era:

—Net Niunenet xeꞌ war inyajta oit y xeꞌ war intzay inwiret, che e ojroner era xeꞌ tari tut e qꞌuin tichan.

12 Entonces wacchetaca qꞌuejcha ixin e Jesús esto tama inteꞌ choquem lugar umen Unawalir e Dios. 13 Y turuan yajaꞌ cuarenta día tujam e sian animal xeꞌ imbꞌacꞌajr uwirnarobꞌ. Y tama e tiempo era e Satanás war uturbꞌa ubꞌa tuaꞌ upijchꞌi e Jesús, pero tariobꞌ cora angelobꞌ tuaꞌ utacre.

14 Pues entonces tari e día conda osena e Juan tama e cárcel, y jax tama e día era conda e Jesús ixin esto tama e departamento Galilea tuaꞌ uchecsu e ojroner xeꞌ imbꞌutz tama uchinam e Dios. 15 Y war uyare e gente y che:

—Cꞌotoyix e día conda cꞌani acay acꞌotori Cadiosir tara tor e rum. Actanic entonces tunor imabꞌambꞌanir y cꞌubꞌseyanenic tama uyojroner e Dios xeꞌ imbꞌutz tama e corpesiaj, che e Jesús.

16 Entonces conda e Jesús war axana tutiꞌ e nuxi jaꞌ xeꞌ ucꞌabꞌa Galilea uwira chateꞌ ijtzꞌimbꞌirobꞌ; inteꞌ ucꞌabꞌa Simón y inteꞌ ucꞌabꞌa Andrés. Pues jaxirobꞌ ajcoromobꞌ xeꞌ war uyariobꞌ uchijrobꞌ tama e jaꞌ tuaꞌ uchuquiobꞌ e chay. 17 Entonces ojron e Jesús y che:

—Laric tanipat y nen cꞌani inwajcꞌox e cꞌotorer tuaꞌ ixixin ixcorma, pero mixto jax chay yaꞌ, sino que e winicobꞌ tuaꞌ ipejca tama uyojroner e Dios, che e Jesús.

18 Y wacchetaca uchoqui uyactobꞌ uchijrobꞌ y ixiobꞌ taca e Jesús.

19 Y nacpat era xanato e Jesús más bꞌana tutiꞌ e nuxi jaꞌ y uwira otro chateꞌ winicobꞌ xeꞌ ijtzꞌimbꞌirobꞌ ubꞌan. E sacumbꞌir ucꞌabꞌa Santiago y e ijtzꞌimbꞌir ucꞌabꞌa Juan. Y yaꞌ turu utata ubꞌan xeꞌ ucꞌabꞌa Zebedeo. Y turobꞌ tama ubarco taca utatobꞌ war uyustesobꞌ uchijrobꞌ. 20 Entonces e Jesús upejca e Santiago y e Juan tuaꞌ axanobꞌ tacar, y wacchetaca uyactobꞌ utatobꞌ xeꞌ jax e Zebedeo taca e barco y taca tunor umanobꞌ, y locꞌoy ixiobꞌ tupat e Jesús.

21 Entonces ixin e Jesús taca uyajcanuarobꞌ esto tama e chinam Capernaum xeꞌ turu tama e departamento Galilea. Y conda cꞌotoy e día tuaꞌ e jiriar xeꞌ jax inteꞌ día sábado, ochoy e Jesús tama e sinagoga y cay cay canseyan. 22 Pero cay bꞌactobꞌ cora e gente tama tunor uyojroner e Jesús porque galan locꞌoy tunor ucanseyaj. Pues jaxir machi canseyan bꞌan cocha inteꞌ ajcanseyaj tama uley e Moisés sino que canseyan taca ucꞌotorer e Dios. 23 Y tama e sinagoga era ayan inteꞌ winic xeꞌ chucur uyalma umen inteꞌ mabꞌambꞌan mein xeꞌ cay ojron taca inteꞌ nuxi nuc y che:

24 —¿Tucꞌa tuaꞌ war oꞌse abꞌa tacaron, net xeꞌ Jesuset xeꞌ tuaꞌ e chinam Nazaret? ¿Tariet ca tuaꞌ acꞌapa atijreson era? Canata que net jax xeꞌ erachet tuaꞌ e Dios, che e mabꞌambꞌan meinobꞌ era.

25 Entonces cay ojron e Jesús y ucꞌaye e sian mabꞌambꞌan mein y che:

—Chꞌancabꞌenic, y loqꞌuenic tama uyalma e winic era, che e Jesús.

26 Entonces e sian mabꞌambꞌan mein cay ucucru e winic taca inteꞌ ataque y cay aruobꞌ taca inteꞌ nuxi nuc, y de allí locꞌoyobꞌ tama e winic era. 27 Y bꞌactobꞌ tunor e gente tama e sinagoga conda uwirobꞌ lo que numuy taca e winic, y cay uyubꞌi ubꞌobꞌ jaxobꞌ taca y chenobꞌ:

—Pues ¿tucꞌa era? ¿Y tucꞌa e canseyaj era que ma tiaꞌ coybꞌi que war uche taca e cꞌotorer? Y uyare e mabꞌambꞌan meinobꞌ tuaꞌ alocꞌoyobꞌ tama e winic y obꞌna umenerobꞌ, che e gente era jaxobꞌ taca.

28 Y wacchetaca cꞌotoy natanwa lo que cay uche e Jesús tama tunor or e departamento Galilea.

29 Entonces locꞌoy e Jesús taca e Santiago y e Juan tama e sinagoga y ixiobꞌ esto tama uyotot e Simón Pedro y e Andrés. 30 Y conda yopobꞌ tama e otot cay uwirobꞌ que upixam ixic e Pedro chꞌar tama uchꞌacteꞌ y war apuruy. Entonces uyareobꞌ e Jesús que ajmuac e ixic era. 31 Y tamar era e Jesús ochoy tiaꞌ chꞌar e ixic y uchuqui ucꞌabꞌ y cay utacre tuaꞌ achpa, y wacchetaca locꞌoy e purer y achpa e ixic y cay usicbꞌa tucꞌa tuaꞌ uyajcꞌu tuaꞌ ucꞌuxiobꞌ e ajwarobꞌ.

32 Entonces conda war anamtzꞌa e qꞌuin y war acbꞌare cay taresnobꞌ meyra ajmuacobꞌ tut e Jesús. Y ayan tin e chucur umen inteꞌ mabꞌambꞌan mein ubꞌan. 33 Y tunor e gente xeꞌ turobꞌ tama e chinam era cay umorojse ubꞌobꞌ tuyejtzꞌer e otot tiaꞌ turu e Jesús. 34 Y jaxir cay utzꞌacpes ixin meyra gente xeꞌ war ucojcobꞌ e sian muaquir, y cay uyajnes locꞌoy tunor e sian mabꞌambꞌan mein, pero machi war uyacta tuaꞌ oꞌjronobꞌ e mabꞌambꞌan meinobꞌ era porque jaxirobꞌ war unatobꞌ chi e Jesús.

35 Pues conda merato asacojpa, achpa e Jesús y locꞌoy tama e chinam era y ixin esto tama inteꞌ choquem lugar tuaꞌ ucꞌajti taca e Dios. 36 Pero conda e Simón Pedro uwira que mamajchi e Jesús, ixin taca tunor upiarobꞌ tuaꞌ usajcobꞌ e Jesús. 37 Y conda utajwiobꞌ, ojron e Pedro y che:

—Tunor e sian gente war usicbꞌetobꞌ, che e Pedro.

38 Pero ojron e Jesús y che:

—Incuic tama e inmojr lugar xeꞌ aquetpobꞌ yajaꞌ taca, porque ucꞌani tuaꞌ inchecsu uyojroner e Dios tut e gente tama tunor or e lugar, porque tamar era tarien, che e Jesús.

39 Entonces e Jesús ixin xana tama tunor or e lugar tama e departamento Galilea, war acanseyan tama inteꞌ inteꞌ sinagoga tic taca tiaꞌ war axin, y war uyajnes axin e mabꞌambꞌan mein tic taca ubꞌan.

40 Pues cꞌotoy inteꞌ winic tuyejtzꞌer e Jesús xeꞌ ayan cora sian chec tut xeꞌ ucꞌabꞌa lepra xeꞌ uyacta ubꞌa cotuan tut e Jesús y che:

—Jay net acꞌani, uyubꞌiet atzꞌaquien tama nimuaquir, porque ayan meyra acꞌotorer, che e winic.

41 Entonces e Jesús uyajta ut e winic y ucꞌatbꞌu ucꞌabꞌ tama ujor y che:

—Nen incꞌani. Inware e chec era que loqꞌuen quiqui tama e winic, che e Jesús.

42 Y wacchetaca satpa e sian chec lo que ayan ani tama e winic y quetpa tzꞌacpesbꞌir inyajrer. 43 Entonces arobꞌna e winic umen e Jesús que machi tuaꞌ uchecsu tut e gente lo que chena tacar. Pero bꞌajxan que ebꞌtana ixin e winic e Jesús uyare y che:

44 —Ubꞌin, ira aware nien inteꞌ winic tama tunor era, sino que quiqui tama e templo tama e chinam Jerusalem y chectes abꞌa tut inteꞌ sacerdote y ajcꞌun incojt arac tuaꞌ achamesna bꞌan cocha chꞌar tzꞌijbꞌabꞌir tama uley e Moisés. Y tamar era erer acꞌotoy unatobꞌ que net tzꞌacpesbꞌiret inyajrer, che e Jesús.

45 Pero e winic machi ubꞌian tamar lo que arobꞌna umen e Jesús, y conda locꞌoy cay uchecsu tut tunor e gente tic taca tamar lo que numuy. Y tamar era e Jesús machi ixto uyubꞌi oꞌchoy tama inteꞌ chinam, sino que quetpa patir tama tunor e chinamobꞌ tiaꞌ mamajchi ayan. Pero warto asicbꞌana umen e gente tama tunor or e lugar y jaxir war atzay uwira tunor tin e acꞌotoy tut.