1 Pues ¿cꞌani ca caware que: “Cachic más e mabꞌambꞌanir tuaꞌ aquetpa más chequer utacarsiaj e Dios?” 2 Machi. Pues non xeꞌ chamayon tut e mabꞌambꞌanir ma cocha erer caxin caturuan tama e mabꞌambꞌanir otronyajr. 3 ¿War ca inata que conda chꞌujyon tuaꞌ caquetpa intera taca e Cristo Jesús, chꞌujyon tuaꞌ caquetpa interon tacar uchamer ubꞌan? 4 Pues conda chꞌujyon quetpon bꞌan cocha jay ixion chamayon ani taca e Cristo, y que mujcon tacar ubꞌan. Pero de allí sujta bꞌixqꞌuesnon otronyajr tujam e chamenobꞌ taca e Jesucristo tuaꞌ caturuan imbꞌutz tut e Dios. Pues sujta bꞌixqꞌuesna e Jesucristo tujam e chamenobꞌ tacar ucꞌotorer Catata Dios, y jax e cꞌotorer era ubꞌan xeꞌ tuaꞌ utacrion caturuan imbꞌutz tut e Dios coner.

5 Entonces cocha quetpon intera taca e Cristo conda chamayon tacar, cꞌani caquetpa intera tacar conda caxin casujta cabꞌixqꞌuesna tujam e chamenobꞌ ubꞌan. 6 Y canata que e mabꞌambꞌanir lo que war ani acꞌotori macuir cawalma chamay taca e Cristo tut e cruz, y bꞌan cocha era quetpa tijresbꞌir ucꞌotorer e mabꞌambꞌanir tama cawalma tuaꞌ machi uyubꞌi asutpa uyareon tucꞌa tuaꞌ cache otronyajr. 7 Porque tin e chamen machi ixto war aꞌrobꞌna umen e mabꞌambꞌanir tucꞌa tuaꞌ uche otronyajr. 8 Y jay cꞌapa chamayon taca e Cristo, entonces war cacꞌupseyan tamar que cꞌani caturuan tacar ubꞌan. 9 Porque canata que e Cristo cꞌapa sujta bꞌixqꞌuesna tujam e chamenobꞌ, y tamar era canata que machi ixto tuaꞌ asutpa achamay otronyajr, porque e chamer mix tucꞌa más ucꞌotorer tujor jaxir coner. 10 Conda ixin chamay e Cristo, chamay tuaꞌ utoyi tunor e mabꞌambꞌanir inyajrer, pero era cocha sutpa bꞌixcꞌa otronyajr cꞌani aquetpa taca Catata Dios iraj iraj. 11 Y bꞌanox nox ubꞌan que ucꞌani tuaꞌ ibꞌijnu que chamenox tut e mabꞌambꞌanir, pero que bꞌixirox tut e Dios cocha intera ibꞌijnusiaj taca Cawinquirar Jesucristo coner.

12 Entonces ira iwacta acꞌotori más e mabꞌambꞌanir tama iwerir xeꞌ war asatpa axin, porque jax e mabꞌambꞌanir era xeꞌ war ani utacsuon tuaꞌ cache tunor lo que uyusre uche cawerir. 13 Y ira iwajcꞌu iwerir tuaꞌ acꞌampesna umen e mabꞌambꞌanir tuaꞌ uche lo que majax bueno. Sino que ajcꞌunic ibꞌa e Dios tuaꞌ ixixin iche lo que erach tut jaxir, bꞌan cocha inteꞌ xeꞌ cꞌapa chamay y de allí sutpa bꞌixcꞌa tujam e chamenobꞌ y coner machi ixto tuaꞌ uche más e mabꞌambꞌanir. 14 Y machi ixto tuaꞌ acꞌotori más e mabꞌambꞌanir tamarox umen que machi ixto turox yebꞌar uley e Moisés, sino que coner turox yebꞌar utacarsiaj e Dios.

15 Pues entonces cocha turon yebꞌar utacarsiaj e Dios coner, ¿cꞌani ca caware que: “Cachic más e mabꞌambꞌanir umen que machi ixto turon yebꞌar ucꞌotorer uley e Moisés?” Ma cocha erer. 16 Nox inata que jay manox tuaꞌ inteꞌ patrón, ucꞌani tuaꞌ iche tunor lo que uyareox. Y bꞌan cocha era aquetpa tama tunor cacuxtar ubꞌan, jay manox tuaꞌ e mabꞌambꞌanir, entonces ixtojya tama e chamer. Pero jay manox tuaꞌ e Dios, ixixin ichꞌami e cꞌotorer tuaꞌ ixturuan erach tut jaxir. 17 Pero gracias a Dios que nox mix jax manox tut e mabꞌambꞌanir coner, sino que war ixcꞌupseyan taca tunor iwalma tut e canseyaj tuaꞌ Catata Dios lo que cay cansenox. 18 Pues nox cꞌotoy corpesnox tama ucꞌotorer e mabꞌambꞌanir, y quetpox manox tuaꞌ iche lo que erach tut e Dios. 19 Pues war incꞌampes e ojroner xeꞌ más tzꞌustaca era tuaꞌ inchecsu tunor era tiut umen que intran tuaꞌ iyubꞌi tunor era. Pues ayan ani inteꞌ tiempo conda war iwajcꞌu ibꞌa tuaꞌ iche tunor e mabꞌambꞌanir axin. Pero coner cꞌani inwareox que ajcꞌunic ibꞌa tuaꞌ ixixin iche tunor lo que imbꞌutz tama icuxtar.

20 Pues conda turox ani yebꞌar ucꞌotorer e mabꞌambꞌanir, machi ani ibꞌijnu tuaꞌ iche lo que erach. 21 Pues ¿tucꞌa ilocse tama e sian mabꞌambꞌanir lo que cay iche ani que coner uchiox ixsubꞌajra tut conda ibꞌijnu? Porque tunor tin e axin uchiobꞌ e mabꞌambꞌanir cꞌani uchꞌamiobꞌ e chamer. 22 Pero coner cocha corpesbꞌirox tama ucꞌotorer e mabꞌambꞌanir, nox ixiox iwajcꞌu ibꞌa tut e Dios tuaꞌ iche lo que ucꞌani jaxir. Y tamar era coner ayan ixto lo que war ilocse tama icuxtar era. Ayan e cuxtar xeꞌ erach tara, y conda acꞌapa cacuxtar tara tor e rum ayanto e cuxtar xeꞌ machi tuaꞌ acꞌapa tut e Dios tichan. 23 Pues tin e axin uche e mabꞌambꞌanir cꞌani atojya taca e chamer, pero lo que Cadiosir cꞌani uyajcꞌon non xeꞌ war aquetpa intera cabꞌijnusiaj taca Cawinquirar Jesucristo jax e cuxtar xeꞌ machi tuaꞌ acꞌapa.