9
Lareídaguagüdün Jesúsu ában wügǘri maríjinti
Lídan le lásügürün Jesúsu lídaangiñe ában fulásu, ába laríjin ában wügǘri maríjinti lúmagiñe lagǘriajoún. Ába jaríñagun láni disípulugu lun.
—Maésturu, ¿cásan uágu lagǘriajoúnbei wügǘri le maríjinga? ¿Ladǘgasan jafígoun lagǘbürigu, o ladǘga lifígoun guánarü?
Ába laríñagun Jesúsu joun.
—Máma ladǘga lifígoun, máma gíñe ladǘga jafígoun lagǘbürigu, lasúseredunbei ítara lun larijoúniwa le luáraabei Búngiu adǘga láu lareídagun wügǘri ligía. Lúnti nadǘgüni luwádigimari Búngiu le oúnajabalina sun wínwangidina lan, jiláadina ligíame, siñáme nadǘgüni. Sun dan anája lan ligíbuagu uboú le, áu lilámpunbei uboú.
Lárigiñe laríñaguni Jesúsu cátei le, ába lásuerun múarugun, ába ladǘgün murúsun gubégubeti láu larǘre, ába lájuruduni luágu lágu le maríjinbei. Ába laríñagun lun.
—Beíba achíbei bigíbu lídan dúna le gíribei Siloé —míni lan líra, Oúnajoúti.
Ába lídin maríjinti ligía, ába lachíbuni ligíbu ñi, dan le lagíribudunbei, aríjaali. Játi lubésinanigu jáma gürígia já meja aríjubalin amúriaja, ába jaríñagun.
—¿Másan nijáñaja le añúurubei amúriaja seínsu?
Ñíñanu aríñagutiña.
—Ánja, ligía.
Jaríñaga jíbiri.
—Máma ligía, lenége.
Ába laríñagun wügǘri ligía.
—Ánja, áu.
10 Ábati jaríñagun lun.
—¿Ída liñáti aríjaadibu lubeí?
11 Ába laríñagun joun.
—Wügǘri le gíribei Jesúsu, ligía adǘgübei murúsun gubégubeti, ába lájuruduni luágu nágu, ába laríñagun nun. “Beíba lídan dúna le gíribei Siloé, ábame bachíbuni bigíbu ñi.” Ábati nídin, lásun nachíbuni nigíbu, ába naríjin.
12 Ábati jaríñagun lun.
—¿Jageígi wügǘri ligía?
Laríñaga joun.
—Ibídiñeti nun jageí lan.
Jálügüdaguni fariséogu maríjinti le areídaguagüdǘwalibei
13 Ábati janǘgüni wügǘri lé meja maríjinbei jagíbugiñoún fariséogu. 14 Queíti lídan lan wéyu le eméraaguagülei ladǘgei Jesúsu gubégubeti le áubei lareídaguagüdei maríjinti ligía, 15 ába gíñe jálügüdüni fariséogu wügǘri ligía ída líña lan gayáraajali lubeí laríjin. Ába laríñagun joun.
—Ába líchugun gubégubeti luágu nágu, ába nachíbuni nigíbu, guetó aríjaadina.
16 Ábati jaríñagun jádaangiñe fariséogu.
—Le wügǘri le adǘgübalin cátei le, siñáti loúnagüle lan Búngiu ladǘga minébenti wéyu le eméraaguagülei lun.
Jaríñagati jíbiri.
—¿Ída liñáti ladáaguni buri miláguru le, ánjein gafígoun lubeí?
Ába lubeíti ñi lan fánreinguaü jádan. 17 Ábaya jálügüdüni lé meja maríjinbei.
—Ángi bugúya, ¿cági baríñagubei luágu wügǘri le, queísi bugúya lubeí le laríjagüdübei?
Ába laríñagun.
—Nugúya, naríñagun luágu ában lan proféta.
18 Májatiña yebe fariséogu jafíñerun luágu maríjin lán meja wügǘri ligía áni aríjaali lan guetó, darí lun jagúarun joun lagǘbürigu, 19 ába jaríñagun joun.
—¿Nijánsan jiraǘ le uágubei jaríñaga luágu maríjin gubeíñein lan lúmagiñe lagǘriajoún? ¿Ída liñáti aríjaali lubeí guetó?
20 Ába jaríñagun lagǘbürigu.
—Subúdi wamúti luágu waraǘ lan le, áni maríjin lan dan le lagǘriajoúnbei, 21 ibídiñeti woun ída líña lan aríjaali lubeí, ni ca lan areídaguagüdübalin lágu. Álügüda jumeí, weíriyaali, gayáraati loúnabun lueígiñegua.
22 Anúfudeiti aríñagagüdübalin líra joun lagǘbürigu wügǘri ligía, ladǘga aríñagaaña lan fariséogu luágu sun lan ja afíñerutiña luágu Jesúsu lan Crístubei, jabugúba lan tídaangiñe jalígilisin juríu. 23 Ligía jaríñagunbei lagǘbürigu. “Álügüda jumeí, weíriyaali.”
24 Ábayati jagúarun juríu lun wügǘri lé meja maríjinbei, ába jaríñagun lun.
—Aríñagabeí inárüni woun ligíbugiñe Búngiu, wagía, subúditi woun luágu gafígoun lan wügǘri líra.
25 Ábati laríñagun joun.
—Ibídiñeti nun ánjein gafígoun lubeí lúmoun mafígoun lan. Le nasúbudirubei, luágu maríjin nán meja, áni guetó aríjaadina.
26 Ábaya jaríñagun lun.
—¿Cásan ladǘgübei báu? ¿Ída liñásan ladǘga lun laríjagüdünibu?
27 Ába laríñagun joun.
—Aríñaga náali jun, mebéreseguntün náu, ¿cáti uágu jabúseera naríñaguniya jun? ¿Ódi buséntün gíñe jafálaruni?
28 Ábati janábuni, ába jaríñagun lun.
—Bugúya, falá bumuti larúfudajan wügǘri ligía, ánjein wagía, larúfudajan Moisés wafálarubei. 29 Subúditi woun luágu adímureja lán meja Búngiu lun Moisés, ánjein le, ibídiñegubeíti woun jalíagiñeti lan.
30 Ábati laríñagun wügǘri ligía joun.
—¡Ámuti gíñe cátei le! ¡Ibídiñeti jun jalíagiñeti lan, áni aríjagüda lána! 31 Subúditi woun luágu magáambun lániña Búngiu gafígountiña, ja rügǘñanu ájuduragubaña lun jáma ja adǘgübalin lugúndan, lagáamba. 32 Magáambuñajagili luágu ni ában aríjagüdǘti ában gürígia le agǘriajoúti maríjinga. 33 Lun jamúga máma lan lúmagiñe Búngiu liábin wügǘri le, siñáti jamúga ladǘgün ni cáta.
34 Ábati jaríñagun lun.
—¿Bugúyasan le agǘriajoúbei buin láu figoú, buséntibu barúfudajan woun?
Ába jabúguni tídaangiñe jalígilisin.
Ja maríjinbaña luágu cátei lánina Búngiu
35 Ába lagáambuni Jesúsu luágu bugá jamaani maríjinti meja ligía, dánti le ladúnragun lúma, ába laríñagun lun.
—¿Afíñetibu luágu Liraǘ Búngiu?
36 Ába laríñagun wügǘri ligía lun.
—Aríñagabeí nun cátei lan, afíñe námuga luágu.
37 Ába laríñagun Jesúsu lun.
—Aríja báali, áu le úmabei badímureja.
38 Ába lájuduragun ligíbugiñe Jesúsu, ába laríñagun.
—Afíñetina, Nabúreme.
39 Ába laríñagun Jesúsu.
—Niábinbei ñájoun uboúagun lun néfegechagǘdüni jágu ja ibídiñejabubaña lun cátei lánina Búngiu, lun gíñe narúfuduni luágu ja lan aríñagubaña luágu fegé lan jágu luágu buri cátei lánina Búngiu, maríjin jamá ni cáta.
40 Dan le jagáambunbalin jádaangiñe fariséogu ja ñíbaña cátei le, ába jaríñagun lun.
—¿Baríñaguñati luágu darúñu líña lan gíñe wágu lun cátei le luáguti Búngiu?
41 Laríñaga Jesúsu joun.
—Lun jamúga ibídiñe lan cátei lánina Búngiu jun, madúnruntün jamúga luágu jifígoun, quei jaríñagun luágu subúdi jumáni, gadúnruntün.