3
Ri achique utz chi ye'oc uc'uay quichin ri quiniman ri Jesucristo
1 Ri ch'abel re nin-ij chave vacami can utz vi chi nicuke' ac'u'x riq'uin: Si c'o jun nurayij ntoc uc'uay quichin ri quiniman ri Jesucristo, utzulaj samaj*Hch. 20:28; Tit. 1:7. ri nurayij. 2 Romari' ri nirayin ri samaj ri', nic'atzin chi ri ruc'aslen manak roma ni'an tzij chirij, xe jun rixayil, nuna' ri achique najin riq'uin, nunojij jabel ri yerubanala', nuc'ul chi niyo'ox ruk'ij, nuc'ul quivech chiracho ri epetenak naj, nitiquer jabel k'alaj nu'on che ruch'abel ri Dios, 3 man ruyo'on ta ri' pa ruk'a' ri vino, man ch'eyonel ta, y man benak ta ránima pa ruvi' méra ri man pa ruchojmil ta ruch'aquic, nic'atzin chi utz runo'oj, (ch'uch'uj, me'l oc) ránima, y man benak ta ránima pa ruvi' méra. 4 Utz eruc'uan ri aj pa racho, ri ralc'ua'l can ta enimey rutzij*Tit. 1:6. riq'uin ronojel ruchojmilal. 5 Roma si jun man reteman ta yeruc'uaj utz ri aj pa racho, ¿achel xqueruc'uaj rutinamit ri Dios? 6 Man utz ta chi ri uc'uay rutinamit ri Dios xa jun ri c'a juba' k'ij tunimaj ri Jesucristo, roma riq'uin juba' nunimirisaj-ka-ri' ruyon, y nika ri mismo castigo*2 P. 2:4. pa ruvi' achel xka pa ruvi' ri itzel. 7 Ja jun chiquivech ri man quiniman ta ri Jesucristo, nic'atzin chi utz rutzijol,*Hch. 6:3. richin quiri' man jun niyo'on chi q'uix, y man nisuk'utaj ta chupan ri nuya' ri itzel pa rubey.
Ri achique utz chi ye'oc diáconos
8 Quiri' mismo ri diáconos, nic'atzin chi ri quic'aslen choj chiquivech ri vinak, mani ca'i' ruvech quitzij niqui'en, man ta quiyo'on-qui' pa ruk'a' q'uiy vino, man ta benak cánima pa ruvi' méra ri man pa ruchojmil ta ruch'aquic. 9 Nic'atzin chi cof yukul cánima riq'uin ri man can ta ojer ri' k'alajrisan can ri nich'o pa ruvi' ri utz chi nicuke' kac'u'x riq'uin roj konojel,*2 Ti. 1:3. y man ta caca' quic'u'x riq'uin. 10 Rije' na'ey na titz'et ri quic'aslen. Si manak roma ni'an tzij chiquij,*1 Co. 1:8; Col. 1:22; Tit. 1:6, 7. c'ajari' que'oc diáconos. 11 Quiri' mismo ri ixoki',*Ri ixoki' re' c'o che'el chi ja ri quixayil ri ye'oc diáconos o ja ri ye'oc diaconisas. nic'atzin chi ri quic'aslen choj chiquivech ri vinak, man ta etz'ucuy tzij,*Sal. 15:3; Pr. 10:18; Jer. 9:4. can ta niquina' ri achique yetajin riq'uin, y can ta echoj pa ruvi' ronojel. 12 Ri ye'oc diáconos nic'atzin chi xe jun quixayil chiquijununal. Nic'atzin chi utz (equic'uan, jecuc'a'n) ri calc'ua'l y conojel ri aj pa cacho. 13 Roma ri diáconos ri utz niqui'en chupan rusamaj ri Dios, can c'o quik'ij xquetz'etetaj, y más xtic'uje' ruchuk'a' ri cánima richin niquitzijoj achique roma cukul quic'u'x riq'uin ri Cristo Jesús.
Ri Dios man can ta ojer ri' c'o ruk'alajrisan pa ruvi' ri ruc'amon-pe ri Jesucristo
14 Vacami ja yan re' ri nintz'ibaj chave rat Timoteo, masque ri vánima nuna' chi xquitiquer xcatentz'eta' cha'anin, 15 richin quiri' si c'o jun roma man xcatentz'eta' yan ta, rat aveteman yan apu achique chi c'aslen nic'atzin chiquicojol ri erutinamit ri Dios, ri ru-iglesia ri c'aslic Dios, ri e'ocunak rutemebal y rutz'uyubal ri kitzij, richin man nijalataj ta ruchojmil. 16 Y can kitzij na vi chi nimalaj rakale'n ri kitzij ri man can ta ojer ri' tuk'alajrisaj ri Dios richin nikaya' kánima riq'uin, ri quire' nu'ij:
Rija' xk'alajrises chikavech riq'uin jun cuerpo achel ka-cuerpo roj vinak,
Xk'alajrises roma ri Lok'olaj Espíritu chi can choj vi ruc'aslen,
Xtz'etetaj coma ángeles,
Xyo'ox rutzijol chique ri man israelitas ta,
Xnimex chuvech ri roch'ulef,
Xc'ul chicaj riq'uin nimalaj ruk'ij.