GT:cak:Kaqchikel Hebreos 3

Ri Jesús más c'o ruk'ij que chuvech ri Moisés

1 Vacami c'a, rix ri junan kaniman ri Jesucristo iviq'uin, y rix richin chic ri lok'olaj rutinamit ri Dios, y rix oyon richin yixec'uje' chicaj, nin-ij c'a chive: Roma ronojel re nutz'iban-e chive, romari' tiya' utz-utz pa cuenta ri Cristo Jesús, ri rutakon* ri Dios chikacojol y Nimalaj Sacerdote pa ruvi' ri ch'abel ri kaniman* y nikatzijoj.* 2 Ri Cristo Jesús niniman chuvech ri xyo'on richin chupan ri samaj re', achel xniman ri Moisés* tok xc'uje' pa quivi' ri aj pa racho ri Dios. 3 Y achel jun tata'aj jari' ri más c'o ruk'ij chiquivech ri ec'o riq'uin pa jay, quiri' mismo ri Jesús can nuc'ul-vi chi más c'o ruk'ij que chuvech ri Moisés. 4 Roma ronojel familia c'o tz'ucuyun-pe richin, pero ri tz'ucuyun can ronojel, ja ri Dios.* 5 Can kitzij vi chi ri Moisés xniman tok xc'uje' pa quivi' ri aj pa racho ri Dios, pero xa choj samajinel, y ri xbix che chi tubana' y tu'ij, xc'atzin yan chi retal ri xteleses rutzijol tok xtik'ax más ri tiempo. 6 Quiri' mismo ri Jesucristo niniman pa quivi' ri aj pa racho ri Dios, pero man samajinel ta, can Ruc'ajol vi ri Dios. Y roj, roj aj pa racho, si c'a pa ruq'uisbel* man nikaya' ta can chi cukul kac'u'x, y can nikana' chi c'o rakale'n chi koyo'en-apu ri k'ij chi nikil ri favor ri sujun chike.

Ri uxlanen richin rutinamit ri Dios

7 Romari' ri Lok'olaj Espíritu* quire' ru'in can chupan ri ruch'abel ri Dios:

Si vacami niya' ixiquin che ri nu'ij ri Dios chive,

8 Man ticovirisaj ri ivánima,*

Achel xqui'en rutinamit ri Dios ri pa chakijlaj tz'iran ulef chupan ri k'ij tok xquiyec royoval riq'uin xcajo' xquitz'et si kitzij chi nuya' castigo pa quivi'.

9 Chiri' ri Dios quire' xu'ij: Rije' masque riq'uin quivech xquitz'et ri milagros ri xen-en cuarenta juna',

Pero xquinak voyoval riq'uin xcajo' xquitz'et si kitzij chi ninya-pe castigo pa quivi'.

10 Y xa roma ri quiri' xqui'en, xpe voyoval chique ri te'ej-tata'aj richin ri nutinamit.

Y romari' xin-ij: Jumul niquixutuj-e ri cánima viq'uin;

Ri utzulaj bey nuc'utun chiquivech, niqui'en chi achel man ta queteman.

11 Romari', ja tok catajnak voyoval chiri', xin-en jurar y xin-ij:

Man jun bey xtinya' lugar chique chi ye'oc pan uxlanen viq'uin.*

Quiri' xu'ij ri Dios.

12 Roma c'a ri', rix ri junan kaniman ri Jesucristo iviq'uin, tibana' cuenta ivi', man ta c'o jun chive ri xa itzel ránima y man cukul ta ruc'u'x y romari' nuxutuj-e-ri' riq'uin ri c'aslic Dios. 13 Ri más nic'atzin chi ni'en chivech, ja chi k'ij-k'ij tipaxa'aj-ivi',* utz c'a rojc'o na chupan tak ri k'ij richin ri vacami. Quiri' tibana', richin quiri' nis-ta jun chive nicovir ránima pa ruk'a' ri mac ri nisatzo ivichin. 14 Roma can kitzij vi, chi jun chic banon chike riq'uin ri Ruc'ajol, si roj c'a quiri' na cukul kac'u'x c'a pa ruq'uisbel* achel xka'an pa na'ey. 15 Man tikamestaj ri tz'iban chupan ruch'abel ri Dios ri nu'ij:

Si vacami niya' ixiquin che ri nu'ij ri Dios chive,

Man ticovirisaj ri ivánima achel xqui'en ri rutinamit tok xquiyec royoval.

Quiri' nu'ij ri tz'iban can.

16 Y, ¿achique c'a ri xeyaco royoval ri Dios,* masque quic'axan chic ri achique xu'ij chique? Ja conojel ri xe'eleses-pe roma ri Moisés pa roch'ulef Egipto. 17 Y, ¿achok quiq'uin xkukut-vi ránima ri Dios cuarenta juna'? Ja quiq'uin ri xeq'uis can pa chakijlaj tz'iran ulef* roma xequibanala' mac. 18 Y, ¿achok chique xu'on-vi jurar ri Dios chi can man xtuya' ta lugar chique chi ye'oc riq'uin pan uxlanen? Ja chique conojel ri man xcajo' ta xeniman tzij. 19 Riq'uin ri', nikatz'et chi roma man cukul ta quic'u'x riq'uin ri Dios tok man xetiquer ta xe'oc chupan ri uxlanen.*

*3:1 Mt. 15:24; Jn. 3:34; 5:36-38.

*3:1 2 Co. 9:13.

*3:1 1 Ti. 6:12.

*3:2 Nm. 12:7; 1 S. 12:6.

*3:4 Ef. 2:10.

*3:6 Mt. 10:22.

*3:7 2 S. 23:2; Mt. 22:43; Mr. 12:36; Hch. 1:16; 28:25.

*3:8 Sal. 95:7-9.

*3:11 Sal. 95:10, 11.

*3:13 He. 10:24, 25.

*3:14 He. 3:6.

*3:16 Nm. 14:2, 4, 11, 23, 30; Dt. 1:34, 35.

*3:17 Nm. 26:65.

*3:19 He. 4:5, 6, 11.