Ri utzulaj ch'abel ri nu'ij achique ruchojmil nkucolotaj, ri tz'iban can roma ri San Mateo
1
Ri quibi' ri ojer tak rati't-rumama' ri Jesucristo
(Lc. 3:23-38)
1 Chupan ri vuj re' tz'iban-vi can quibi' ri ojer tak rati't-rumama' ri Jesucristo. Rija' riy-rumam can ri rey David, y riy-rumam can ri Abraham.
2 Ri Abraham jari' rutata' ri Isaac;
ri Isaac jari' rutata' ri Jacob;
ri Jacob xec'uje' eq'uiy ralc'ua'l, y jun chique ri ralc'ua'l xubinaj Judá.*Gn. 29:35.
3 Ri Judá xec'uje' ca'i' ralc'ua'l riq'uin ri ixok Tamar, y ri alabo ri' Fares*Gn. 38:29. y Zara quibi' xyo'ox.
Ri Fares jari' rutata' ri Esrom;
ri Esrom jari' rutata' ri Aram.
4 Ri Aram jari' rutata' ri Aminadab;
ri Aminadab jari' rutata' ri Naasón;
ri Naasón jari' rutata' ri Salmón.
5 Ri Salmón jari' rutata' ri Booz,*1 Cr. 2:11. y ri rute' ri Booz ja ri Rahab;
ri Booz jari' rutata' ri Obed, y ri rute' ri Obed ja ri Rut;
ri Obed jari' rutata' ri Isaí.
6 Ri Isaí jari' rutata' ri David ri xoc rey.
Ri rey David jari' rutata' ri Salomón ri xalex chuk'a' ri ixok Betsabé, ri rixayil can ri Urías.*2 S. 11:3; 12:24.
7 Ri Salomón jari' rutata' ri Roboam;*1 R. 11:43.
ri Roboam jari' rutata' ri Abías;
ri Abías jari' rutata' ri Asa.
8 Ri Asa jari' rutata' ri Josafat;*1 Cr. 3:10.
ri Josafat jari' rutata' ri Joram;
ri Joram jari' rutata' ri Uzías.*2 R. 15:13.
9 Ri Uzías jari' rutata' ri Jotam;
ri Jotam jari' rutata' ri Acaz;*2 R. 15:38.
ri Acaz jari' rutata' ri Ezequías.
10 Ri Ezequías jari' rutata' ri Manasés;
ri Manasés jari' rutata' ri Amón;
ri Amón jari' rutata' ri Josías.*1 R. 13:2.
11 Ri Josías xec'uje' eq'uiy ralc'ua'l, y jun chique ri ralc'ua'l xubinaj Jeconías. Jari' tiempo tok ri israelitas xe'uc'uax pa roch'ulef Babilonia.
12 Tok ec'o chic quila' pa Babilonia, ri Jeconías xc'uje' jun ralc'ua'l ri xubinaj Salatiel;
ri Salatiel jari' rutata' ri Zorobabel.*Hag. 1:1.
13 Ri Zorobabel jari' rutata' ri Abiud;
ri Abiud jari' rutata' ri Eliaquim;
ri Eliaquim jari' rutata' ri Azor.
14 Ri Azor jari' rutata' ri Sadoc;
ri Sadoc jari' rutata' ri Aquim;
ri Aquim jari' rutata' ri Eliud.
15 Ri Eliud jari' rutata' ri Eleazar;
ri Eleazar jari' rutata' ri Matán;
ri Matán jari' rutata' ri Jacob.
16 Ri Jacob jari' rutata' ri José;
y ri José jari' xoc rachijil ri María, ri achok chuk'a' xalex-vi ri Jesús. Y ri Jesús, jari' ri Jun ri takon-pe roma ri Dios chucolic ri rutinamit.*Gn. 3:15; Is. 9:6.
17 Chuvech re roch'ulef xek'ax-e catorce solaj vinak ri nitiquer-pe riq'uin ri Abraham c'a riq'uin ri rey David. Catorce chic solaj xek'ax-e chuvech re roch'ulef ri nitiquer-pe riq'uin ri rey David c'a chupan ri tiempo tok ri israelitas xe'uc'uax pa roch'ulef Babilonia. Y catorce chic solaj xek'ax-e chuvech re roch'ulef ri nitiquer-pe riq'uin ri tiempo tok ri israelitas xe'uc'uax pa Babilonia c'a chupan ri tiempo tok xalex ri Jesucristo choch'ulef.
Ri ralaxic ri Jesús
(Lc. 2:1-7)
18 Tok xalex ri Jesucristo,*Mt. 2:1-6. quire' ri xbanataj: Ri María ri xoc rute', jun xten c'utun chic roma ri José.*Lc. 1:27. Pero tok man jani tiquic'uaj-qui' chiri', xna'ex chi ri María quiri' chic rubanon roma ruchuk'a' ri Lok'olaj Espíritu xka pa ruvi'. 19 Jac'a ri José ri ne'oc rachijil, jun achi choj ruc'aslen chuvech ri Dios, y xa nupokonaj nuya' chi q'uix ri María chiquivech ri vinak,*Dt. 24:1. romari' xunojij chi ekal neruya' rutzijol chi xa man nic'ule' ta chic riq'uin. 20 Quiri' ri xunojij rija' pa ránima, pero pa ruvaran, ri José xutz'et jun ángel richin ri Ajaf, y ri ángel quire' xu'ij che: José, rat ri rat riy-rumam can ri rey David, man taxi'ij-avi' chi yac'ule' riq'uin ri María, roma ri ac'ual ri royo'en chi nalex chuk'a', can richin vi ri Lok'olaj Espíritu. 21 Ri María xtalex ch'uti ral ala', y rat Jesús rubi' xtaya'. Roma ri ac'ual ri xtalex, jari' xquecolo ri rutinamit chupan ri quimac. 22 Ronojel re' xbanataj richin quiri' nibanataj ri ruk'alajrisan can*Is. 7:14. ri Ajaf chuvech ri jun profeta ri xtzijon ri ruch'abel ri Dios ojer can. Y quire' ri ru'in can:
23 Titz'eta' na pe', c'o jun xten ri kitzij chi c'a ruyon na, ri xtipe alanic chirij, y xtalex jun ral ala'.
Ri ac'ual ri xtalex xtubinaj Emanuel.
Y Emanuel nu'ij tzij, Dios c'o kiq'uin. 24 Tok ri José xc'astaj, can xu'on na vi ri xbix che roma ri ángel richin ri Ajaf. Rija' xuq'uen ri María richin xoc rixayil. 25 Pero ri José man xc'uje' ta apu riq'uin ri María c'a xalex na ri na'ey ral. Y tok ri José xuya' rubi' ri ac'ual, Jesús rubi' xuya'.