1 Ri Cristo can nucukuba-vi c'a ic'u'x y que chuka' ri' nuben ri ajovabel ri c'o iviq'uin. Ri Lok'olej Espíritu c'o iviq'uin y jun ivech nuben chive.*2 Co. 13:14. Can c'a pan ivánima c'a nipe-vi richin nijoyovaj ivech chi'ivachibil ivi'. 2 Romari' ninbij chive chi can junan ivech tibana',†1 P: 3:8. y jantape' quixajovan. Ronojel ri niben, riq'uin jun ic'u'x tibana'. Vi queri' xtiben, can xquiquicot‡Jn. 3:29. c'a ivoma. 3 Ronojel ri niben, man richin ta ninimirisaj-ivi' o richin ta chi xaxe rix ri c'o utz niq'uen can chire ronojel.§Stg. 3:14. Xa tich'utinirisaj-ivi',*1 P. 5:5. y tibana-ka chi rix xa can más ix co'ol que chiquivech ri ch'aka' chic. 4 Tich'obo' ri nika' chiquivech ri ch'aka' chic,†1 Co. 10:24. y man xe ta ri nika' chivech rix.

5 Tibana'‡Jn. 13:15. c'a achi'el ri xuben ri Cristo Jesáus. 6 Rija' can Dios vi,§Is. 9:6; Jn. 1:1, 2; 5:18. pero man riq'uin ta ri' xc'oje' ta can chila' chicaj riq'uin ri Dios. Man que ta ri' xuben. Rija' xuya' can ronojel ri'. 7 Man xupokonaj ta c'a xuya' can ri ruk'ij-ruc'ojlen, y xo'alex chuvech re ruvach'ulef. Can xoc c'a achi'el roj vinek;*Jn. 1:14. xsamej achi'el xa ta xabachique samajel.†Is. 42:1. 8 Rija' xoc c'a vinek achi'el roj y xuch'utinirisaj-ri'. Can xunimaj y xuben c'a ronojel ri xubij ri Dios chire; queri' xuben, c'a jampe' xapon chupan ri camic; ri camic chuva ri cruz.‡He. 12:2. 9 Y romari' ri Dios rubanon chire chi can c'o-vi ruk'ij-ruc'ojlen ri chila' chicaj.§Mt. 28:18. Jac'a rija' ri más nim*Ef. 1:21. chiquivech ri can nima'k chuka' quisamaj. 10 Ri Dios can nrajo' c'a chi conojel quexuque'†Ef. 3:14. tok nicac'axaj ri rubi' ri Jesáus. Ri ec'o chila' chicaj y re ec'o chuvech re ruvach'ulef,‡Ap. 5:3, 13. y chuka' ri ec'o chupan ri lugar quichin ri caminaki' ri man xquinimaj ta el, can quexuque' c'a chuvech. 11 Y conojel tiquibij chi ri Jesucristo jari' ri Ajaf.§Jn. 13:13; Ro. 14:9. Y queri', xtiquiya' ruk'ij-ruc'ojlen ri Katata' Dios.

12 Roma c'a ri', rix ri yalan yixinvajo', ninbij c'a chive chi jantape' tinimaj rutzij ri Dios,*He. 4:11. achi'el ibanon-pe. Tok xic'oje' iviq'uin, queri' xiben. Y que chuka' ri' tibana' vacami, tok man inc'o ta iviq'uin. Titija' ik'ij chirij ri rusamajixic ri icolotajic, c'a pa ruq'uisibel. Can tixibij c'a ivi'. 13 Ri Dios nisamej pa tak ivánima, y nuya' ri rayibel†He. 13:21. chive chi niben ri nika' chuvech rija'. Y chuka' nuya' ivuchuk'a'‡2 Co. 3:5. richin yixtiquir niben.

14 Y ronojel ri niben, can riq'uin c'a ronojel ivánima tibana'. Man quixxebeloj, ni man tiben oyoval. 15 Can tibana' c'a chi nik'alajin chi can utz vi ri ic'aslen y man jun itzel nilitej chivij.§Fil. 1:10. Tik'alajin c'a chi ix ralc'ual ri Dios y chi man jun etzelal c'o pan ic'aslen, stape' ixc'o chuvech re ruvach'ulef chiquicojol vinek ri man choj ta quic'aslen; ri can e sachinek-vi riq'uin ri quich'obonic. Ja rix c'a ri yixsakirisan*Mt. 5:14. quichin ri vinek ri'. 16 Y nitzijoj ri ch'abel richin c'aslen chique. Y yin can ninvajo' c'a chi ivoma rix ri vánima xtiquicot ta chupan ri k'ij richin ri Cristo, roma xtik'alajin chi c'o xc'atzin-vi ri samaj xinben iviq'uin. 17 Can nintej c'a pokon roma ri ruch'abel ri Dios ri nink'alajirisaj; pero rix xinimaj ri xintzijoj chive. Rix can xijech ri ic'aslen chire ri Dios y romari' yin janíla yiquicot. Y stape' ta yicamisex,†2 Ti. 4:6. can nuq'uen-pe quicoten chuve yin. 18 Y que chuka' ri' rix, tiquicot c'a ri ivánima viq'uin.

19 Vi can rurayibel c'a ri Ajaf Jesáus, ri kach'alal Timoteo‡1 Ts. 3:2. xtapon yan iviq'uin. Xtintek c'a el richin nrac'axaj-pe achique ibanon. Y queri' xticuker nuc'u'x yin. 20 Y man jun chic c'a ri c'o viq'uin ri can ta junan ránima viq'uin, achi'el ri Timoteo, y kitzij ta nuch'ob ri achique ibanon. 21 Ri ch'aka' chic ri ec'o viq'uin, xaxe ri nika'§2 Ti. 3:2. chiquivech rije' ri niquich'ob, y man niquich'ob ta achique ri nic'atzin pa rusamaj ri Cristo Jesáus. 22 Jac'a ri kach'alal Timoteo nuc'ut chi yalan utz. Y rix chuka' ivetaman chi queri'. Ivetaman chi rija' oquinek achi'el valc'ual,*1 Co. 4:17; 1 Ti. 1:2; 2 Ti. 1:2. y samajinek viq'uin richin kak'alajirisan ri utzilej ch'abel richin colotajic. 23 Y yin xaxe chic c'a voyoben ri achique xquinuche'ex-pe pa k'atbel-tzij; vi yinelesex-el pa cárcel o xa c'o quinojin niquiben chuve. Y c'ari' nintek-el ri Timoteo iviq'uin, ri nuch'obon yin. 24 Y cukul nuc'u'x chi ri Ajaf xtuben chi yin chuka' xquitiquir xquinapon iviq'uin pa jun ca'i-oxi' apo k'ij.

25 Man riq'uin vi ri', xinch'ob c'a chi ri vach'alal Epafrodito†Fil. 4:18. nitzolin yan ta iviq'uin; rija' xitek c'a pe viq'uin richin xiruto' riq'uin ri xc'atzin chuve.‡2 Co. 11:9. Can kachibil vi c'a ki' riq'uin richin katijon kak'ij pa rusamaj ri Dios. 26 Ri Epafrodito janíla nrajo' yixrutz'et yan, roma retaman chi rix xivac'axaj chi xyavej. 27 Y kitzij chi rija' janíla xyavej y jubama xquen (xcom). Jac'a ri Dios xujoyovaj ruvech y xujoyovaj chuka' nuvech yin. Roma vi ta xquen (xcom) ri Epafrodito, c'o ta chic jun k'axo'n xpe viq'uin pa quivi' ri k'axo'n ri can ec'o chic pa vánima. 28 Romari' can xinch'ob-vi c'a chi nitzolin yan iviq'uin, richin niquicot ri ivánima tok xtitz'et. Y tok c'o chic iviq'uin, yin manek chic pena xtinchajij. 29 Can riq'uin c'a janíla quicoten tic'ulu', roma queri' ri ruc'amon chi niben chire. Can junan c'a iniman ri Ajaf riq'uin. Can tiya'§1 Ts. 5:12; 1 Ti. 5:17. c'a quik'ij ri kach'alal ri e achi'el chuka' rija'. 30 Ri kach'alal Epafrodito jubama xquen (xcom) roma ri rusamaj ri Cristo. Rix xitek-pe chinuto'ic yin,*Fil. 4:10. y rija' jubama xquen (xcom) chubanic ri samaj.