15
Ri vuku' ángeles ri xqueyo'on k'axomal pa ruvi' ri ruvach'ulef
1 Y c'ari' yin Juan can xintz'et c'a chi ri chicaj ec'o c'a vuku' ángeles ri xek'alajin y can man jun bey e tz'eton ta chuka'. Re vuku' c'a ángeles re' jachon c'a jujun ruc'ayeval* Ap. 14:10; 16:1; 21:9. pa quik'a' richin chi yebequiya-pe tok xtapon ri k'ij. Y ri' ja ruq'uisibel tak ruc'ayeval ri nuya' ri Dios pa ruvi' ri ruvach'ulef. Roma jac'ari' ri royoval ri Dios ri xtuya' pa quivi' ri man xeniman ta richin.
2 Y yin xintz'et c'a chuka' chi c'o jun achi'el ri nimalej ya' ri nibix mar chire ri achi'el vidrio nitzu'un,† Ap. 4:6. y can xolon-vi c'a riq'uin k'ak'. Y ec'o c'a ri e pa'el ri chiri' pa ruvi'. Conojel re' jac'a ri man xeka' ta pa ruk'a' ri nabey chicop‡ Ap. 13:15. y ri ruvachibel, ni man chuka' xcajo' ta quetal o ri ru-número ri rubi' ri chicop ri nic'aj-quivech o ri pa quik'a'. Y conojel re' e pa'el c'a ri pa ruvi' ri mar ri', y e quic'ualon arpa ri e richin ri Dios. 3 Y niquibixaj c'a ri rubix ri Moisés ri rusamajel ri Dios y ri rubix ri Jesucristo ri achi'el Alaj Carne'l. Y ri bix que c'a re' ri niquibij:
Ajaf Dios, rat can jac'a ri nima'k tak banobel ri man jun bey e tz'eton ri ye'aben,§ Ex. 15:1.
y can c'o-vi ronojel uchuk'a' ri pan ak'a'.
Can kitzij y choj ri abey,* Dt. 32:4; Os. 14:9.
y ja rat ri Rey quichin conojel ri lok'olej tak avalc'ual.
4 Can man jun c'a ri man ta xtuxibij-ri' chavech,† Ex. 15:14.
y man ta chuka' xtuya' ak'ij-ac'ojlen, rat Ajaf.
Y xaxe c'a rat ri lok'olej.
Y romari' ronojel ruvach'ulef xtipe chuya'ic ak'ij,
roma ri xquitz'et chi xk'alajin yan ri ak'atoj-tzij.
Queri' niquibij ri bix ri'.
5 Y tok e nutz'eton chic ka ronojel re', xintz'et chi ri chicaj xjakatej‡ Ap. 11:19. ri jay ri acuchi nuk'alajirisaj-vi-ri' ri Dios.§ Nm. 1:50. 6 Y chiri' xebe'el-vi-pe ri vuku' ángeles ri jachon jujun ruc'ayeval ri pa quik'a'. Y ri quitziak ri e quicusalon, jac'a ri tziek ri nibix lino* Ex. 28:6; Ez. 44:17. chire, jun tziek ri sek-sek y can niyic'lun c'a chuka'. Y ri chuva-quic'u'x ic'ovinek c'a chuka' jun ximbel ri riq'uin k'anapuek banon-vi. 7 Y can jac'ari' tok jun chique ri e caji' ri janíla q'uiy runak' tak quivech,† Ap. 4:6. xuyala' c'a el jujun lek pa quik'a' chiquijujunal ri vuku' ángeles, lek ri e banon riq'uin k'anapuek, y chupan ri' e benek-vi ronojel ri rubanic ri ruc'ayeval ri nuya' ri Dios ri can jantape' c'o. 8 Ri rachoch c'a ri Dios ri chicaj xnoj‡ Ex. 40:34; 1 R. 8:10; 2 Cr. 5:14. c'a pe riq'uin jun achi'el sib,§ Is. 6:4. ri retal ri ruk'ij-ruc'ojlen y ri ruchuk'a'* 2 Ts. 1:9. ri Dios. Y can man jun c'a ri nitiquir ta noc-apo ri chiri' pa rachoch. Xa can xe c'a tok c'achojinek chic can ruya'ic ri vuku' ruc'ayeval coma ri ángeles, can c'ari' c'a tok utz niban-apo oquen.