1 Can tabij c'a chique ri kach'alal chi tiquinimaj quitzij ri k'atoy tak tzij.*Ro. 13:1; 1 Ti. 2:2. Can tiquibana' c'a ri nibix chique, y riq'uin ronojel cánima tiquibana' ronojel ruvech utzilej samaj. 2 Y tabij chuka' chique chi man tiquibij itzel chirij jun chic vinek,†Ex. 20:16. y chi man tiquiben oyoval.‡Ef. 4:31. Xa utz tiquibana' quiq'uin conojel, y riq'uin ronojel ch'uch'ujil.

3 Roma tok rubanon can,§Ef. 5:8. roj chuka' oj nacanek riq'uin ri kach'obonic. Man xojniman ta tzij. Yalan oj sachinek ri chiri'. Man xojtiquir ta xkak'il-ki' chuvech ri mac. Xa can xkaben ronojel ri itzel ri xkarayij, y xbe kánima riq'uin ri quicoten richin re ruvach'ulef. Yalan itzel ri kac'aslen xkac'uaj. Itzel xekatz'et ri ch'aka' chic roma ri utz c'o quiq'uin. Chikachibil ki' xketzelaj-ki', y roma ri man utz ta ri kac'aslen, ri vinek xojquetzelaj chuka'. 4 Pero tok ri Dios ri Kacolonel xuc'ut ri rutzil chikavech,*Ef. 2:7. xketamaj c'a chi ronojel vinek yerajo'. 5 Rija' xojrucol c'a pe chupan ri kamac. Man roma ta yalan choj ri kac'aslen kac'uan†Ro. 3:20; Ga. 2:16. tok xojrucol-pe. Man que ta ri'. Xa can roma xujoyovaj kavech, y roma xuch'ajch'ojirisaj ri kac'aslen. Jun c'ac'a' c'aslen xuya' chike. Ri Lok'olej Espíritu‡Jn. 3:3, 5. xoc pa tak kánima. Y riq'uin ri' xjalatej ri kac'aslen. 6 Ri Dios xuya' ri Lok'olej Espíritu chike,§Jl. 2:28. roma ri Kacolonel Jesucristo. Y ri Lok'olej Espíritu q'uiy utzil*Jn. 1:16. nuben chike: 7 Y riq'uin ri' man jun kamac yojc'ulun chuvech ri Dios,†Ro. 3:24. y ri' xa can roma ri rutzil ri Dios. Y chuka' xtikichinaj ri utzilej c'aslen ri man xtiq'uis ta.‡Ro. 8:17; Tit. 1:2. Y roj koyoben ri c'aslen ri'.

8 Ronojel re' can kitzij vi,§1 Ti. 1:15; Tit. 1:9. can utz vi, y can nic'atzin-vi chire ri quic'aslen conojel vinek. Roma c'a ri' ninvajo' chi man tatanaba' quitijoxic ri quiniman chic ri Dios chire ronojel re', richin queri' can tiquitija' quik'ij niquiben ri utz. 9 Pero ri tzij ri xa man jun quejkalen, achi'el ri tzij ri yeban chiquij ri quibi' ri vinek ri xec'oje' ojer can,*1 Ti. 1:4. man que'avac'axaj. Y chuka' ri oyoval ri yequiben ri vinek ri xa man junan ta quich'obonic chirij ri nubij ri ley richin ri Moisés, man chuka' que'avac'axaj, roma ronojel ri tzij ri que tak ri' xa man jun utz nuq'uen-pe chave.†2 Ti. 2:23.

10 Y vi c'o jun ri nuya' jun tijonic ri man kitzij ta, y romari' ri kach'alal niquichop niquich'er-el-qui', tapixabaj c'a ri nibanon queri' y tabij chire chi man tuben queri'. Y vi abin chic chire jun bey y man yarunimaj ta, tabij chic jun bey chire. Y vi can man niniman ta c'a, man chic taq'uen ruvech.‡Mt. 18:17; 2 Co. 13:2; 2 Ti. 3:5; 2 Jn. 10. 11 Roma ri nibanon queri', can nik'alajin-vi§1 Ti. 5:24. chi xa sachinek riq'uin ri ruch'obonic, itzel ruc'aslen ruc'uan, y ruyon rija' nroyoj ruc'ayeval pa ruvi'.

12 Y yin xtintek-el ri kach'alal Artemas aviq'uin o ri kach'alal Tíquico.*Hch. 20:4; 2 Ti. 4:12. Y tok xtapon aviq'uin jun chique rije', tatija' ak'ij yabe pa tinamit Nicópolis. Roma nuch'obon chi yibec'oje' chiri' ri tiempo richin tef. 13 Y ri kach'alal Zenas ri etamanel richin ri ley y ri kach'alal Apolos,†Hch. 18:24. taya' c'a ronojel ri nic'atzin chique richin ri quibey, richin queri' man ta jun ri nicajo'. 14 Y ri kach'alal tiquetamaj c'a niquiben ri utz. Quequito' c'a conojel ri c'o nic'atzin chique,‡Ef. 4:28. richin chi nivachin ta§Fil. 1:11; Col. 1:10. jebel ri quic'aslen.

15 Conojel c'a ri kach'alal ri ec'o viq'uin niquitek-el rutzil-avech. Y taya' c'a chuka' rutzil-quivech ri junan kavech quiq'uin roma kaniman ri Jesucristo. Ri rutzil ri Dios xtic'oje' ta c'a iviq'uin chi'ivonojel. Que ta c'a ri'.