Ri carta ri xtz'ibes chique ri kach'alal Hebreos
1
Ri Dios ja ri Ralc'ual xucusaj chi xuk'alajij ri rutzij
1 Chupa ri ojer can tiempo, q'uiy mej (paj) xch'o'n ri Dios chique ri kati't-kamama'; y cuando xch'o'n chique xerucusaj achi'a' ri xek'alajin ri rutzij, y chuka' can q'uiy formas xucusaj chi xu'on chique ri achi'a' ri' chi xquik'alajij ri rutzij, 2 y cami chupa ri ruq'uisbel tiempo chi ri rech-ulef, ri Dios can ja' ri Ralc'ual ri xucusaj chi nuk'alajij ri rutzij chakawech. Ri Dios pa ruk'a' ri Ralc'ual xuya-wi ronojel, y chuka' pa ruk'a' raja' xuya-wi chi xu'on ri rech-ulef y ronojel ri jec'o. 3 Riq'uin ri Ralc'ual nitz'etetaj chi ri Dios can c'o-wi ruk'ij. Ri Ralc'ual can junan-wi riq'uin raja'. Y ja ri Ralc'ual chuka' ri uc'uayon richi ronojel ri jec'o; y can riq'uin ri ruchuk'a' ri rutzij rutz'amon-wi ronojel, roma ri rutzij can c'o-wi ruchuk'a'. Raja' xcom chi quiri' xulesaj ri kamac, y xc'astaj chiquicojol ri caminaki'. Y cuando rubanon yan ronojel ri', xbech'oquie' chicaj pa ru-derecha ri nimalaj Dios.
4 Ri Ralc'ual ri Dios can c'o más ruk'ij chiquiwech ri ángeles. Y roma ri samaj ri xu'on raja', ri Dios can nim ruk'ij xu'on che. Romari' raja' can más-wi c'o ruk'ij chiquiwech ri ángeles.
Ri Ralc'ual ri Dios can c'o-wi más ruk'ij chiquiwech ri ángeles
5 Quiri' naka'ij, roma keta'n chi ri Dios man jun mej (bey) ru'in ta che jun ángel:
Ja ret jat Walc'ual.
Y romari' cami ninya' ac'aslen.*Sal 2:7
Y chuka' man jun mej (bey) ru'in ta chirij jun ángel:
Raja' can xtoc walc'ual
y ren xquinoc Rutata'.*2 S 7:14; 1 Cr 17:13
6 Y cuando ri Dios xutak-pe ri Ralc'ual chech-ulef, can xk'alajin chi can c'o ruk'ij, roma ri Dios xu'ij chique conojel ri ru-ángeles:
Tiya' ruk'ij ri Walc'ual.*Dt 32:43
7 Y chiquij ri ángeles xe nu'ij:
Ri nu-ángeles ch'anin niqui'en ri nusamaj,
roma nin-en chique chi can je anche'l quiek'ik' y je anche'l ruxak-k'ak'.*Sal 104:4
8 Pero che ri Ralc'ual, roma yalan ruk'ij, nu'ij che:
Dios, ret can richi ronojel tiempo na'an gobernar,
y can pa ruchojmil-wi na'an gobernar.
9 Can yalan najo' ri utz, y can man nika ta chawech ronojel ri itzel tak ex ri yebanataj.
Y romari' ren ri a-Dios can nubanon chawe chi ret can más jaquicot que ri ch'aka chic awaxbil.*Sal 45:6-7
10 Y chuka' ri Dios xu'ij che ri Ralc'ual:
Ajaf, ret xa'an ri rech-ulef pa ruticribel,
y xa'an chuka' ri rocaj.
11 Ri rech-ulef y ri rocaj can xquieq'uis-wi, pero ret manak xcaq'uis.
Ri rech-ulef y ri rocaj can xquierijix, anche'l nu'on ri tziak.
12 Can xquiejalataj-wi, anche'l ni'an che ri tziak ri man utz ta chic.
Ri rocaj can xtabus anche'l jun tziak ri man nic'atzin ta chic.
Pero ret can manak-wi xcajalataj, y chuka' manak xtiq'uis ri ac'aslen.*Sal 102:25-27
Quiri' xu'ij ri Dios.
13 Y ri Dios man jun mej (bey) xu'ij che jun ángel:
Cach'oquie-pe pa nu-derecha
y xquienya' chuxe' awakan ri itzel yetz'eto awichi.*Sal 110:1
14 Man jun mej (bey) xu'ij quiri' che jun ángel, roma ri ángeles xe je rusamajel ri Dios. Y ja reje' yerutak ri Dios chi yequito' ri je-cha'on chi yecolotaj.