Ri naꞌay carta ri xutzꞌibꞌaj ri apóstol San Juan
Va carta va xtzꞌibꞌas ruma ri apóstol Juan. Va carta va nuꞌej antok jun vinak cꞌo amor pa ránima, jareꞌ ri nicꞌutu ri rucꞌaslien chi runiman ri Dios. Ruma ri Dios altíra nuꞌon amar. Y antok jun vinak ncaꞌrajoꞌ ri rachꞌalal, nikꞌalajin chi ketzij runiman ri Dios y rataꞌn jeꞌ jaꞌal chica ri Dios.
Ri capítulo 1:1-10 nuꞌej chica ri quiniman chic ri Dios chi nicꞌatzin chi niquicꞌuaj jun sak cꞌaslien ri nuyaꞌ luz, ruma ri Dios can Luz. Y nicꞌatzin jeꞌ chi niquicꞌutuj perdón cha ri Dios, y xa quireꞌ niquiꞌan, ri Dios can xtuꞌon sak cha ri quicꞌaslien.
Ri capítulo 2:1–4:6 nuꞌej chi ri quiniman chic ri Dios nicꞌatzin chi nicajo-quiꞌ, can incheꞌl ncaꞌjoꞌx ruma ri Dios. Nuꞌej jeꞌ chi tiquibꞌanaꞌ cuenta-quiꞌ choch ri ncaꞌcꞌut ri xa man ketzij ta chi ruchꞌabꞌal ri Dios, ruma icꞌo vinak ri niquiꞌej chi ri Cristo man ja ta reꞌ ri ruꞌeꞌn-pa ri Dios chi ncaꞌrucol ri vinak chupan ri qui-pecados. Rumareꞌ nuꞌej chi quinojiel ri niquicukubꞌaꞌ quicꞌuꞌx riqꞌuin ri Dios, can ja ri ruchꞌabꞌal ri Dios ri tiquinimaj siempre. Y nuꞌej jeꞌ xa cꞌo jun nalka quiqꞌuin y nuꞌej chi can rusamajiel ri Dios, naꞌay nicꞌatzin chi niquiꞌan pensar chirij ri chica nucꞌut, ruma man quinojiel ta i-rusamajiel ri Dios.
Ri capítulo 4:7–5:12 nuꞌej chi ri Dios can ncaꞌrajoꞌ cꞌa quinojiel ri vinak y rumareꞌ, jun ri runiman chic ri Dios, man nuxiꞌij ta riꞌ choch ri sufrimiento ri xtipa paroꞌ ri roch-ulief. Y xa man nuxiꞌij ta riꞌ, can nichꞌacuon cꞌa ruma runiman chic ri Cristo. Y nuꞌej jeꞌ chi ri Ajaf Jesucristo can xtipa chic, ruma cꞌo señal chi nipa.
Y ri capítulo 5:13-21 nuꞌej ri chica rucꞌatzil chi xtzꞌibꞌas va libro va, nuꞌej chirij ri oración, y nuꞌej chirij nicꞌaj kax ri cataꞌn ri quiniman ri Dios.
1
Ja ri Jesucristo ri niyoꞌn cꞌaslien
1 Nitzꞌibꞌaj chiva chirij ri Cristo ri can cꞌo-ve antok cꞌa majaꞌ cꞌo ri roch-ulief.✡Jn. 1:1. Can xkaxaj ri ruchꞌabꞌal. Can xkatzꞌat riqꞌuin ri kanakꞌavach. Y can xkatzꞌom cha kakꞌaꞌ. Jajaꞌ ri Chꞌabꞌal ri niyoꞌn cꞌaslien. 2 Ri niyoꞌn cꞌaslien can xalka, y xkatzꞌat.✡Jn. 1:14. Y rumareꞌ nakatzijuoj chiva ri xkatzꞌat. Nakatzijuoj chiva ri cꞌaslien ri man niqꞌuis ta ri cꞌo riqꞌuin ri Katataꞌ Dios, y xalka chikacajol. 3 Ojreꞌ nakatzijuoj chiva ri xkatzꞌat y ri xkaxaj, chi quireꞌ ixreꞌ y ojreꞌ junan kavach nakaꞌan, y can ketzij chi joꞌc jun kabꞌanun riqꞌuin ri Katataꞌ Dios y riqꞌuin ri Jesucristo ri Rucꞌajuol. 4 Y nakatzꞌibꞌaj cꞌa nojiel reꞌ chiva ruma nakajoꞌ chi can ta jaꞌal niquicuot ivánima.
Ri Dios jareꞌ ri Luz
5 Y vacame cꞌa, nakatzijuoj chiva ri xuꞌej can ri Jesucristo chika, chi ri Dios jareꞌ ri Luz, y man jun kꞌakuꞌn cꞌo riqꞌuin. 6 Y xa nakaꞌej chi joꞌc jun kabꞌanun riqꞌuin ri Dios, y ri kacꞌaslien xa cꞌa pa kꞌakuꞌn cꞌo-ve, man ketzij ta ri nakaꞌej, ruma man nakaꞌan ta ri ketzij. 7 Ri Dios can cꞌo-ve pa sakil, y xa ojreꞌ nkuꞌin chupan ri sakil, joꞌc jun kabꞌanun quiqꞌuin quinojiel ri quiniman chic ri Jesucristo ri Rucꞌajuol ri Dios. Y ri ruquiqꞌuiel ri Jesucristo nralasaj nojiel ri ka-pecado.
8 Y xa nakaꞌej chi man jun ka-pecado, kayuon ojreꞌ nakaꞌan-ka engañar-kiꞌ. Y ri ketzij xa manak kiqꞌuin. 9 Y xa nakaꞌej ri ka-pecados cha ri Dios, ri Dios can choj y manak xtucꞌax ri rutzij, can ja xtuꞌon perdonar ri ka-pecados y xtuchꞌaj ri kánima y xtiralasaj-el nojiel ri itziel tak kax ri icꞌo kiqꞌuin. 10 Pero xa nakaꞌej chi man jun pecado kabꞌanun, nakaꞌan chi ri Dios man ketzij ta ri nuꞌej. Y xa quireꞌ nakaꞌej, ri ruchꞌabꞌal ri Dios man cꞌo ta riqꞌuin kánima.