Ri rucaꞌn carta ri xutzꞌibꞌaj ri apóstol San Pablo cha ri Timoteo
Jareꞌ ri rucaꞌn carta ri xutak ri apóstol Pablo cha ri Timoteo. Ri Pablo nuꞌej cha chi man tumalij rucꞌuꞌx chupan ri sufrimiento ri nukꞌasaj chupan ri rucꞌaslien. Nuꞌej cꞌa cha chi tutijaꞌ rukꞌij chi nuꞌon ri nrajoꞌ ri Dios y quireꞌ jajaꞌ ntuoc jun utzulaj rusamajiel ri Dios. Y nuyaꞌ jeꞌ tiox bꞌaꞌ cha ri Dios ruma ri Timoteo can jaꞌal ruchajin rucꞌaslien, can jun utzulaj samajiel y cukul rucꞌuꞌx riqꞌuin ri Dios.
Ri capítulo 1:1–2:13 nuꞌej cha ri Timoteo chi tucukubꞌaꞌ rucꞌuꞌx siempre y man tuxiꞌij-riꞌ choch ri sufrimiento ri xcaꞌpa pa rucꞌaslien, xa jaꞌal tuchojmij-riꞌ chi ntuoc jun utzulaj ru-soldado ri Jesucristo.
Ri capítulo 2:14–4:5 nuꞌej cha ri Timoteo chi man tuju-riꞌ chupan tzij ri xa man jun quikalien, ruma xa xtuꞌon quireꞌ, xa cꞌo ayoval ri xtucꞌam-pa. Y nuꞌej jeꞌ cha chi tubꞌanaꞌ cuenta-riꞌ y tubꞌanaꞌ ri incheꞌl raxan-pa antok cꞌa coꞌl.
Y ri capítulo 4:6-22, ri Pablo nuꞌej cha ri Timoteo nojiel ri chica xtiꞌan cha ruma ri rusamaj ri Dios, nibꞌisuon jubꞌaꞌ ruma niꞌan juzgar cuma ri autoridades, pero niquicuot jeꞌ ruma rataꞌn chi xa cierca chic cꞌo-ve chi nirutzꞌataꞌ roch ri Dios.
1
Ri saludo
1 Inreꞌ Pablo, in ru-apóstol ri Jesucristo ruma quireꞌ nrajoꞌ ri Dios chi nitzijuoj chica ri vinak chi ri Dios nuyaꞌ ri cꞌaslien ri ranun prometer chica ri vinak ri niquiyaꞌ cánima riqꞌuin ri Cristo Jesús. 2 Nitzꞌibꞌaj-el va carta va chava atreꞌ Timoteo,✡ Hch. 16:1. ri can at incheꞌl nucꞌajuol y altíra ncanvajoꞌ. Ja ta ri favor, ri misericordia y ri paz ri nuyaꞌ ri Katataꞌ Dios y ri Kajaf Jesucristo ticꞌujieꞌ riqꞌuin avánima.
Tatzijuoj ri Cristo chiquivach ri vinak
3 Inreꞌ Pablo niyaꞌ tiox bꞌaꞌ cha ri Dios, cha ri Dios ri niꞌan rusamaj riqꞌuin jun sak vánima, incheꞌl xquiꞌan ri vateꞌt-numamaꞌ. Y can ncanataj cꞌa chuva y rumareꞌ pakꞌij chi chakꞌaꞌ niꞌan orar pan a-cuenta. 4 Y niꞌej jeꞌ chava atreꞌ Timoteo chi atcꞌo riqꞌuin vánima ruma xinavokꞌiej antok xiniel-pa aviqꞌuin. Y nivajoꞌ nquinalka chic jun bꞌay aviqꞌuin chi quireꞌ niquicuot chic jun bꞌay ri vánima. 5 Y nalka jeꞌ panoꞌ chi ketzij acukubꞌan acꞌuꞌx riqꞌuin ri Dios, incheꞌl ri xquiꞌan ri avateꞌt Loida y ri atieꞌ Eunice.✡ Hch. 16:1. Ijejeꞌ ri xquicukubꞌaꞌ quicꞌuꞌx riqꞌuin ri Dios naꞌay chavach atreꞌ. Y inreꞌ vataꞌn chi atreꞌ jeꞌ ketzij acukubꞌan acꞌuꞌx riqꞌuin ri Dios.
6 Rumareꞌ niꞌej chava chi tayaꞌ avuchukꞌaꞌ, man tichup-ka chi naꞌan ri samaj ri rusipan ri Dios chava, ri xyoꞌx chava antok inreꞌ xinyaꞌ nukꞌaꞌ pan aveꞌ. 7 Y ri Espíritu ri ruyoꞌn ri Dios chika ojreꞌ ri kaniman chic jajaꞌ, man richin ta chi nakaxiꞌij-kiꞌ. Xa nuyaꞌ poder chika, y nuꞌon chika chi ncaꞌkajoꞌ quinojiel ri vinak y nuꞌon chika chi nkojtiquir nakakꞌil-kiꞌ chi man nakaꞌan ta pecar-kiꞌ.
8 Man caqꞌuix chi natzijuoj ri ruchꞌabꞌal ri Kajaf. Ni man caqꞌuix jeꞌ naꞌej chi avataꞌn noch inreꞌ, mesque incꞌo pa cárcel ruma ri Kajaf. Y man tacꞌakuoj acꞌuꞌx atreꞌ chupan ri sufrimiento ruma natzijuoj ri evangelio. Xa tacachꞌoꞌ nojiel riqꞌuin ri poder ri yoꞌn chava ruma ri Dios. 9 Ri Dios xojrucol chupan ri ka-pecados, y xojrayuoj chi nakucꞌuaj jun sak cꞌaslien. Y nojiel ri xuꞌon man ruma ta chi cꞌo otz i-kabꞌanun, xa ruma ri ru-favor, y ruma jeꞌ quireꞌ ranun-pa pensar chikij ojier can tiempo antok majaꞌ cꞌo ri roch-ulief. Ri Dios can ranun-pa pensar chi nutak-pa ri Jesucristo chi nuꞌon ri favor chika chi nkojrucol. 10 Y vacame xalka ri Jesucristo ri nicalo kichin. Jajaꞌ xralasaj ri ru-poder ri camic. Jajaꞌ xucꞌut chakavach ri evangelio, y riqꞌuin reꞌ xucꞌut chakavach ri cꞌaslien ri man niqꞌuis ta.
11 Ri Dios xiruchaꞌ inreꞌ chi nitzijuoj ri ruchꞌabꞌal, y chi xinuoc apóstol y maestro quichin ri vinak ri man israelitas ta.✡ 1Ti. 2:7. 12 Rumareꞌ niꞌan sufrir vacame. Pero man nquiqꞌuix ta; ruma inreꞌ vataꞌn ri chica nuniman y vataꞌn jeꞌ chi jajaꞌ cꞌo ru-poder chi nquiruchajij y nujachuon-viꞌ pa rukꞌaꞌ cꞌa xtalka-na ri kꞌij antok xtipa chic jajaꞌ.
13 Inreꞌ niꞌej chava Timoteo chi incheꞌl ri utzulaj tak kax ri nucꞌutun chavach, jareꞌ tacꞌutuꞌ atreꞌ. Can tikꞌalajin cꞌa chi acukubꞌan acꞌuꞌx riqꞌuin ri Jesucristo, y siempre caꞌvajoꞌ quinojiel ruma joꞌc jun abꞌanun riqꞌuin ri Jesucristo. 14 Tabꞌanaꞌ cuenta ri samaj ri yoꞌn chava ruma ri Dios. Y ri Espíritu Santo ri cꞌo riqꞌuin kánima xtitoꞌn avichin.
15 Atreꞌ avataꞌn chi quinojiel ri hermanos ri icꞌo pa tak tanamet ri icꞌo Asia in-quiyoꞌn chic can, incheꞌl ri Figelo y ri Hermógenes. 16 Ri Ajaf tujoyovaj quivach ri icꞌo pa rachuoch ri hermano Onesíforo, ruma qꞌuiy mul xuyaꞌ ruchukꞌaꞌ vánima. Jajaꞌ man xqꞌuix ta xinalrutzꞌataꞌ vaveꞌ pa cárcel. 17 Ruma antok xalka vaveꞌ pa tanamet Roma, can xirucanuj y cꞌarunaj xiril. 18 Y atreꞌ avataꞌn otz chi jajaꞌ altíra xojrutoꞌ antok xojcꞌujieꞌ aviqꞌuin pa tanamet Efeso. Ri Ajaf tujoyovaj roch chupan ri kꞌij antok xtipa chic jun bꞌay.