Ri carta ri xutzꞌibꞌaj ri apóstol San Pablo chica ri hermanos ri icꞌo Colosas
Ri apóstol Pablo xutak va carta va chica ri hermanos ri icꞌo pa tanamet Colosas, antok jajaꞌ xa pa cárcel cꞌo-ve. Jajaꞌ nrajoꞌ chi ijejeꞌ tiquicꞌuaj jun cꞌaslien choj y sak ruma xa jun chic quibꞌanun riqꞌuin ri Cristo Jesús. Y ri Cristo jareꞌ ri cꞌo paroꞌ nojiel ri kax ri ncaꞌtzꞌiet y ri man ncaꞌtzꞌiet ta. Rumareꞌ man rucꞌamun ta chic chi cꞌa niquinimaj quitzij ri vinak ri xa man ketzij ta chi ruchꞌabꞌal ri Dios ri niquitzijuoj.
Ri capítulo 1:1-14, ri Pablo ncaꞌruꞌon saludar ri aj-Colosas ri quiniman ri Jesucristo. Nuꞌej jeꞌ chica chi jajaꞌ nuꞌon orar pa qui-cuenta, chi can ta niꞌka pa quiveꞌ (can ta niquiꞌan entender) ri chica nrajoꞌ ri Dios chi niquiꞌan, chi quireꞌ niquicꞌuaj jun cꞌaslien otz.
Ri capítulo 1:15–2:7 nuꞌej chirij ri Cristo, chirij ri rucamic ri Cristo, y chirij ri xuꞌon ri Cristo chi xcꞌujieꞌ ri paz riqꞌuin ri Dios. Y nuꞌej ri chica otz chi niquiꞌan chupan ri quicꞌaslien, ruma ijejeꞌ xa jun chic quibꞌanun riqꞌuin ri Jesús.
Ri capítulo 2:8-23, ri Pablo cof nchꞌoꞌ chiquij ri vinak ri nicajoꞌ niquiꞌan chi ri hermanos niquinimaj tradiciones chupan ri quicꞌaslien. Nuꞌej jeꞌ chica chi xa jun niꞌa ránima chirij ri tradiciones, pa ruqꞌuisbꞌal ntiel chi man jun rucꞌatzil choch ri Dios. Ri Pablo nrajoꞌ chi ri hermanos tiquibꞌanaꞌ cuenta-quiꞌ y chi icꞌo listos chi quireꞌ ri Satanás man nicovin ta chiquij.
Ri capítulo 3:1-17 nuꞌej chica chi can ja ri kax ri cꞌo chila chicaj tiquibꞌanaꞌ pensar y man ja ta ri kax ri icꞌo choch-ulief. Nuꞌej jeꞌ chica chi man niquiꞌan ta chic ri itziel tak kax ri niquirayij ri xquiꞌan ojier can, y nuꞌej chica ri nicꞌatzin chi niquiꞌan chi niquicꞌut chi ketzij niquinimaj ri Dios.
Ri capítulo 3:18–4:6 nuꞌej ri chica otz chi niquiꞌan pa cachuoch ri quiniman chic ri Dios. Nuꞌej chi tiquitijaꞌ quikꞌij chi niquiꞌan orar richin chi cof ncaꞌcꞌujieꞌ pa quicꞌaslien ri ruyoꞌn ri Dios chica. Y nuꞌej jeꞌ chi otz caꞌchꞌoꞌ chica ri cꞌa majaꞌ quiniman ri Dios, y tiquicꞌutuꞌ cꞌa riqꞌuin ri quicꞌaslien chi quiniman ri Ajaf Jesús y cꞌo rucꞌaxuon cha ri quicꞌaslien.
Y ri capítulo 4:7-18, ri Pablo nuqꞌuis ri carta riqꞌuin saludos chica ri quiniman ri Jesucristo.
1
Ri saludo
1 Inreꞌ Pablo, in ru-apóstol ri Jesucristo ruma quireꞌ nrajoꞌ ri Dios. Can junan ojcꞌo riqꞌuin ri hermano Timoteo, 2 antok nakatak-el va carta va chiva ixreꞌ santos hermanos ri ixcꞌo pa tanamet Colosas, ri iyoꞌn ivánima riqꞌuin ri Cristo. Ja ta ri favor y ri paz ri nuyaꞌ ri Katataꞌ Dios y ri Ajaf Jesucristo ticꞌujieꞌ riqꞌuin ivánima.
Ri Pablo nucꞌutuj cha ri Dios chi tuyaꞌ noꞌj espiritual chica ri hermanos ri icꞌo Colosas
3 Siempre nakaꞌan orar pan i-cuenta ixreꞌ, y nakayaꞌ tiox bꞌaꞌ cha ri Dios ri Rutataꞌ ri Kajaf Jesucristo, 4 ruma xkaxaj chi cukul icꞌuꞌx riqꞌuin ri Cristo Jesús y can nquiꞌvajoꞌ quinojiel ri santos hermanos, 5 ruma ivoyoꞌien ri ruyacuon ri Dios chiva chicaj. Y reꞌ xinaꞌiej chi cꞌo, antok xivaxaj ri evangelio, ri can ketzij. 6 Y antok xivaxaj y can ketzij xiꞌka pan iveꞌ (xiꞌan entender) ri ru-favor ri Dios, can ix qꞌuiy ri xinimaj. Y ri evangelio bꞌanak nojiel tanamet choch-ulief. Can iqꞌuiy ri vinak ri xquinimaj y niqꞌuiy ri quicꞌaslien, incheꞌl ixreꞌ. 7 Y riqꞌuin ri hermano Epafras✡Col. 4:12; Flm. 23. xivatamaj ri ruchꞌabꞌal ri Dios. Ojreꞌ altíra nakajoꞌ jajaꞌ y junan nakaꞌan ri samaj, jajaꞌ otz nisamaj pa rusamaj ri Cristo chireꞌ chicajol. 8 Y antok jajaꞌ xalka kiqꞌuin, xalruꞌej chika chi ixreꞌ can altíra ntivajo-iviꞌ, ruma cꞌo ri Espíritu Santo iviqꞌuin.
9 Rumareꞌ, xa-jan antok xkaxaj reꞌ, ojreꞌ man oj-tanal ta chi nakaꞌan orar pan i-cuenta. Nakacꞌutuj cha ri Dios chi tuꞌon chiva chi xtivatamaj otz ri nrajoꞌ jajaꞌ, y chi tuyaꞌ jeꞌ nojiel noꞌj espiritual chiva y chi xtiꞌka pan iveꞌ (xtiꞌan entender) nojiel kax espiritual. 10 Quireꞌ nakacꞌutuj cha ri Dios, ruma nakajoꞌ chi ixreꞌ ntivucꞌuaj jun cꞌaslien incheꞌl ri cꞌaslien ri nicꞌatzin niquicꞌuaj ri quiniman chic ri Ajaf Jesucristo. Chi ixreꞌ siempre ntivucꞌuaj ta jun cꞌaslien ri nika choch jajaꞌ. Can ta más y más ntiꞌan ri otz, y ntivatamaj ta más chirij ri Dios. 11 Nakajoꞌ cꞌa chi ri Dios nuyaꞌ qꞌuiy i-poder, ruma jajaꞌ cꞌo rukꞌij y can nem ri ru-poder. Y ri poder ri xtuyaꞌ, can xticꞌatzin chiva chi nicꞌujieꞌ i-paciencia y chi nticochꞌ nojiel. 12 Y nquixquicuot ntiyaꞌ tiox bꞌaꞌ cha ri Katataꞌ Dios, ruma rubꞌanun chika konojiel chi nuyaꞌ ka-herencia chila chicaj, junan quiqꞌuin ri nicꞌaj chic santos hermanos. 13 Ri Katataꞌ Dios ya xojrucol pa rukꞌaꞌ ri rajaval ri kꞌakuꞌn✡Ri tzij “rajaval ri kꞌakuꞌn” quireꞌ niꞌeꞌx cha ri Satanás. y xojruyaꞌ pa rukꞌaꞌ ri Rucꞌajuol ri altíra nrajoꞌ. 14 Ri Rucꞌajuol ri Dios xcon kuma ojreꞌ y xꞌin ruquiqꞌuiel, y rumareꞌ ya xojcolotaj y xꞌan perdonar ri ka-pecados.✡Ef. 1:7.
Ruma ri rucamic ri Cristo, xuꞌon chi xcꞌujieꞌ ri paz riqꞌuin ri Dios
15 Ri Dios man kꞌalaj ta nitzꞌiet, pero nikꞌalajin ruma ri Rucꞌajuol. Ri Rucꞌajuol cꞌo naꞌay y más nem chiquivach quinojiel ri kax ri cꞌo. 16 Ruma jajaꞌ xbꞌano nojiel ri cꞌo chila chicaj y ri icꞌo choch-ulief. Ri ncaꞌtzꞌatataj y ri man ncaꞌtzꞌatataj ta, mesque ángeles, o gobiernos ri icꞌo chicaj, o nem quikꞌij ri icꞌo chicaj, o cꞌo poder pa quikꞌaꞌ ri icꞌo chicaj; can quinojiel ruma jajaꞌ icꞌo, y nojiel ri xaꞌruꞌon, can richin chi niquiyaꞌ rukꞌij jajaꞌ. 17 Ri Cristo can cꞌo-ve naꞌay choch nojiel ri kax, y jajaꞌ cꞌuayuon quichin. 18 Jajaꞌ ri jolomaj ri cꞌo pa kaveꞌ ojreꞌ ri kaniman, ri oj ru-iglesia y oj-acunak ru-cuerpo.✡Ef. 1:22-23. Jajaꞌ ri niyoꞌn kacꞌaslien, jajaꞌ ri xcꞌastaj-pa naꞌay chiquicajol ri quiminakiꞌ. Rumareꞌ jajaꞌ más cꞌo rukꞌij chiquivach nojiel ri icꞌo. 19 Can ja-ve reꞌ xrajoꞌ ri Dios, chi ri Rucꞌajuol i-junan riqꞌuin jajaꞌ. Ri Rucꞌajuol, can Dios jeꞌ. 20 Y antok ri Rucꞌajuol xꞌin ri ruquiqꞌuiel, ri Dios xuꞌon chica quinojiel ri icꞌo choch-ulief y ri icꞌo chicaj, chi ncaꞌjiel chic pa riqꞌuin jajaꞌ mismo ruma xuꞌon chi xcꞌujieꞌ ri paz chiquicajol ruma ri Rucꞌajuol xcon choch cruz.✡Ef. 2:16.
21 Y rubꞌanun-pa, ixreꞌ nem icajol riqꞌuin ri Dios ruma ri itziel tak inoꞌj y ri itziel tak kax ri xaꞌiꞌan. Ruma nojiel ri xaꞌiꞌan, xicꞌut chi ix ru-enemigos ri Dios. Pero vacame ixreꞌ xixjiel chic pa riqꞌuin ri Dios, 22 ruma ri samaj ri xuꞌon ri Rucꞌajuol ri Dios antok xpa choch-ulief. Can xuoc vinak incheꞌl ojreꞌ y xcon choch cruz, chi quireꞌ ixreꞌ can sak icꞌaslien, manak chic i-pecado y man jun itziel kax nilitaj chivij antok xquixbꞌaka choch, 23 xa ketzij chi cof ixcꞌo chupan ri cukbꞌal cꞌuꞌx riqꞌuin ri Dios y man jun kax nisiluon ivichin. Nicꞌatzin chi riqꞌuin nojiel ivánima ntivoyoꞌiej-apa ri nuꞌej chupan ri evangelio. Ixreꞌ can ivaxan chic otz, y ja jeꞌ reꞌ ri ya xbꞌaka quiqꞌuin quinojiel ri vinak ri icꞌo choch-ulief. Y chi nitzijos, ri Dios xuꞌon chuva inreꞌ Pablo chi xinuoc rusamajiel.
Ri samaj ri xuyaꞌ ri Dios cha ri Pablo chi xꞌa quiqꞌuin ri man israelitas ta
24 Ivuma ixreꞌ inreꞌ niꞌan sufrir vacame. Pero man nquibꞌisuon ta, inreꞌ xa nquiquicuot. Ruma ri sufrimiento ri nikꞌasaj, can incheꞌl ri sufrimiento ri xukꞌasaj ri Cristo ruma ri iglesia, ri ru-cuerpo jajaꞌ. 25 Y inreꞌ xinuoc samajiel richin ri iglesia reꞌ, y ri samaj ri xuyaꞌ ri Dios chuva inreꞌ, can chicajol ixreꞌ ri man ix israelitas ta. Y jajaꞌ nrajoꞌ chi caval ri ruchꞌabꞌal nitzijuoj chiva. 26 Ri ruchꞌabꞌal ri Dios xa incheꞌl avan-pa chiquivach ri vinak ojier can tiempo. Xa cꞌa vacame xcꞌut chakavach ojreꞌ ri oj santos ralcꞌual. 27 Can chika ojreꞌ ri Dios xucꞌut ri cꞌo riqꞌuin ri incheꞌl jun nem bꞌayomal y cꞌo rukꞌij, y vacame ri Cristo cꞌo chic riqꞌuin ivánima ixreꞌ ri man ix israelitas ta y rumareꞌ ivoyoꞌien ri kꞌij chi xquixbꞌacꞌujieꞌ riqꞌuin jajaꞌ chupan ri utzulaj lugar ri cꞌo chicaj.
28 Ojreꞌ ja ri Cristo nakatzijuoj. Nakaꞌej chica quinojiel chi tiquiyaꞌ can ri pecado, y riqꞌuin nojiel utzulaj noꞌj ncaꞌkatijuoj quinojiel. Quireꞌ nakaꞌan ruma nakajoꞌ chi niqꞌuiy otz quicꞌaslien quinojiel ri niquinimaj ri Cristo Jesús. 29 Inreꞌ nitej nukꞌij chi niqꞌuiy quicꞌaslien quinojiel. Y chi niꞌan ri samaj reꞌ, nicusaj nojiel ri poder ri ruyoꞌn ri Cristo chuva y ri poder reꞌ can nem.