1 É ne ko ni âpipati*12.1 Âpipati—A bwopiine ani pie, a niihenye me a bwo temehinaado na e ne tenye, beme nye penem me Padué, me pamwoiu ni acéihi (talent, aptitude, capacité). te a *Jenen Iitihi, wogewé lépwo bééng, ke nimung me geé temehi ni naado naa.

2 12.2 Habakuk 2.18−19É bwolihi, ke mwo te time geé uce téele temehi Padué. Be lé pwo me geé piâ ité ne ni apulie, ke geé tee âcehi ni *déme duéé na tice mulie kolé†12.2 Tice mulie kolé—Grek: Huuhu jélé.. Ke pwocoon dewé me geé nelé.

3 12.3 1 Ioane 4.2−3É mu ko anaa, na nimung me é patemehi tewé a naado na céiu: Hemepie pwo paceli e cihe mu ko a Jene Padué, pwocoon me *piapwo Iésu. Ke te tice paceli jan me e pii pie: «Wo Iésu, ke Padaame!», heme time uce é mu ko a Jenen Iitihi.

4 12.4 Roma 12.6Muko pétaapwo pwo ni âpipati na ne, kehe te céiu a Jenen Iitihi na e ne. 5 Muko pétaapwo pwo ni bwo pipwoeabwé ko ni penem, kehe te céiu Padaame na nye penem den. 6 Muko pétaapwo pwo ni penem, kehe te céiu Padué na e pwo ni penem ne konye ati. 7 Ke e muko pétaapwo ne ni âpipati a Jenen Iitihi beme wâé ne konye ati:

12 12.12 1 Korénit 10.17Be piwien ne ko a éé apulie, be te céiu, kehe hiwon ni béé duaan mu kon, beme lé pwo ace éé apulie. Hemepie junihe hiwon jélé, kehe icehi ana lé tai mu ha a éé apulie na te céiu. Ke te piwien mwo ne mwo ko Kériso. 13 12.13 Galat 3.28Be wogenye mwo, ke tai puukenye ko a Jenen Iitihi, beme céiu genye ne ha a één, heme ni *Juif ai nina time uce ni Juif, ai ni *apenem tice ja kon, ai heme ni apulie na time uce ni apenem tice ja kon; kehe genye tai ûdu mu ko a tabe na céiu na a Jenen Iitihi, beme céiu genye me weeng.

14 Be a éé apulie, ke time uce ace céiu duaan mu kon, kehe hiwon ni piduaan. 15 Hemepie pa a apulie, ke me e pii pie: «Woéo, ke time uce pa i apulie, ke é mu ko anaa, ke pwohewiin heme time é uce mu ha a éé apulie», kehe e teko mu ha a éé apulie. 16 Hemepie e pii na a pwojééne pie: «Woéo, ke time uce pa naamii apulie, ke é mu ko anaa, ke pwohewiin heme time é uce mu ha a éé apulie», kehe e teko mu ha a éé apulie! 17 Hemepie ati a éé apulie, ke me tai a naamii apulie, ke genye o woté ace bwo téne nen? Hemepie ati a éé apulie, ke me tai a pwojééne, ke genye o woté ace bwo téne ne ni ûdenaado?

18 Kehe e te muko ne ni piduaan ne ha a éé apulie wo Padué, ke te é ne ha ana te nimen kon. 19 Hemepie te ju a céiu duaan mu ko a één, ke time uce a éé apulie na hején.

20 Be hiwon ni piduaan, ke te céiu a één. 21 A naamii, ke pwocoon me e pii te a i apulie pie: «Time uce pwonaado ne kom!» Ai a puni pa apulie, ke pwocoon me e pii te ni a apulie pie: «Time uce pwonaado ne kowé!»

22 Kehe icehi ana nihe pwonaado ne ko ni piduaan ne ha a éé apulie na nye niimihi pie tice niihelé. 23 Ke genye te nihe pipwocile ni duaan na nye niimihi pie time uce ju pwonaado ne kon. Ke genye te junihe pipwopweehi ne ko nina time genye uce alihi. 24 Ke time genye uce wonaa ko a bwo pipwopweehi ne ko ni duaan ne ha a éénye na jan me nye alihi. Kehe e te pwo a éé apulie wo Padué me wonaa, 25 beme te tice aceli pineitééhi ne ha a éé apulie. Tai ni piduaan ne ha a éé apulie, ke lé muko pétaapwo picilelé. 26 Hemepie cunu ace céiu duaan mu ko a éé apulie, ke tai ati ni duaan ne ko a éé apulie, ke lé tai mu he ni picani me weeng. Hemepie ace céiu duaa apulie, ke me piwâéeng, ke tai ni piduaan, ke lé tai pipwodéén me weeng.

27 12.27 Roma 12.5Wogewé, ke a éé Kériso, ke muko pétaapwo wogewé, ke ni piduaan ne ha a één. 28 12.28 Éféso 4.11−12Ke wo Padué, ke e ne, pele ni acéihi me:

Ke é bo habwii tewé mwo a pwaaden na junihe wâé.