Yusuja Quisarati MATEO 1
JIDAQUE QUISARATI MATEORA HUENECUAREQUE
MATEO
Riyaque quirica ri Mateora huenecuareque. Jesúsja empequetu jucuare. Jesúsja mepema jarijutu Roma juque enaruquija ishu chipiru baca puji jucuare.
Riyaque quirica ri israelita cuanaja ishu huenetanacuareque. Mateora tuna bahue amerecara acuare Jesús MESIAS, YUSUJA EMEPEQUE. Berutu Yusu equeque quisarati cuejaqui cuanara icueneta cueja acuare eje tupu Mesías junabuqueque. Tura tuna bahue amerecara acuare Jesús jadya ayaque tuna jadya huenecuareque.
Ejitaju tujatu acuare Jesús israelita cuanaja ECUARI DYAQUE ARIDAQUE. Tura tuna ejitaju acuare dutyara jujeri israelita cuanara Jesús bijidamaduracuareque. Mateoratu cuejacuare Jesús curusuju majucuareque, majutsu, chacha netitsuranucatsu, barepaju Yusuja yacuaju tsuracuareque.
Riyaque quiricajuri ehuene aniya:
Jesús cuinanacuareque (capítulo 1, 2)
Jesús utsatanacuareque (cap. 3)
Satanásra Jesús cajuchatishacara acuareque (cap. 4)
Jesúsra ecuita cuana emataju bahuityacuareque (cap. 5-7)
Yahua terehuie eje bucha judadibuqueque (cap. 24-25)
Jesús majucuareque (cap. 26-27)
Jesús emajuque chacha netitsuranucacuareque (cap. 28)
1
Jesucristoja baba cuana
(Lc 3.23-38)
Jesucristo jucuareque micuana cuejaya.
David eque ejuracanaque tu jucuare. David bacue Abraham equeque. Riya cuanaque ri Jesucristoja baba cuana jucuare cuanaque.
Abraham tu Isaacja etataque jucuare.
Isaac bacue Jacobja etataque.
Jacob tu Judája, tuatsehuequi cuanaja jadya etataque jucuare.
Judá tu Fares, Zara jadyaja etataque jucuare. (Tatseja ecuaquedya tu Tamar jucuare).
Fares tu Esromja etataque jucuare.
Esrom bacue Aramja etataque.
Aram tu Aminadabja etataque jucuare.
Aminadab bacue Naasónja etataque.
Naasón tu Salmónja etataque jucuare.
Salmón bacue Boozja etataque. (Boozja ecuaquetu Rahab jucuare).
Booz tu Obedja etataque jucuare. (Obedja ecuaque tu Rut jucuare).
Obed tu Isaíja etataque jucuare.
Isaí tu ecuari Davidja etataque jucuare.
David tu Salomónja etataque jucuare. (Salomónja ecuaque tu Betsabé jucuare,
Urías yanumeja ehuaneque jucuareque).
Salomón tu Roboamja etataque jucuare.
Roboam bacue Abiasja etataque.
Abiás tu Asaja etataque jucuare.
Asa bacue Josafatja etataque.
Josafat tu Joramja etataque jucuare.
Joram bacue Uziasja etataque.
Uzías tu Jotamja etataque jucuare.
Jotam bacue Acazja etataque.
Acaz tu Ezequiasja etataque jucuare.
10 Ezequías bacue Manasésja etataque jucuare.
Manasés bacue Amónja etataque.
Amón tu Josiasja etataque jucuare.
11 Josías bacue Jeconiasja, tuatsehuequi cuanaja etataque jucuare.
(Babiloniaju tuna erisi dujutanacuare, jetiama umae tunaja ata cuana tsehue).
12 Jeconías tu Salatielja etataque jucuare.
Salatiel bacue Zorobabelja etataque.
13 Zorobabel tu Abiudja etataque jucuare.
Abiud bacue Eliaquimja etataque jucuare.
Eliaquim tu Azorja etataque jucuare.
14 Azor bacue Sadocja etataque.
Sadoc tu Aquimja etataque jucuare.
Aquim bacue Eliudja etataque.
15 Eliud tu Eleazarja etataque jucuare.
Eleazar bacue Matánja etataque jucuare.
Matán tu Jacobja etataque jucuare.
16 Jacob bacue Joséja etataque.
José tu María tsehue caquemiticuare.
Riyaque epunadya tu Jesúsja ecuaque jucuare.
Riyaque Jesúsdya tuque ecuana “Mesías” bacani
jadya aya, “Yusuja Emepeque” jadique.
17 Riya cuanaqueri Mesiásja ebaba cuanaque jucuare. Abraham equeque David tu anicuare peadya tunca pushi earacana ebaba cuanaque. David equeque ecuanaja baba cuana Babiloniaju dujutanacuare patya tujatu anicuare peadya tunca pushi earacana nucadya. Tuna dujutanacuare patya equeque tuque cuinanacuare eque tuna anicuare peadya tunca pushi earacana nucadya.
Jesús cuinanacuareque
(Lc 2.1-7)
18 Cuatsabiji micuana aya Jesucristo eje bucha cuinanae cuita jucuareque. Tuja ecuaque Mariatu José tsehue caquemiti ishuque jucuare. Tatse caquemitima jariju, Joséja jipema jariju cuitadyatu carecani isaqui jucuare Yusuja Espirituja casa eque. 19 Josétu Yusuja cacuatsashati eque anicara juhua. Jadya tibudya tujatu carecani isaqui baatsu, jacacara acuare. Jadya ama bucha tuja tuatsehue canerecabati aniya tibu, tujatu etehua tyau acara acuare quirica tatse cajacati ishuque, dutyaja yacuaju bahue ameretsu tuque ebisuturau tibu. 20 Tumeque inime tupuqui ayaque tahuitsutu barepa juque Yusu tsahuaquira isaracuare tahuiju:
—José, miquemi David eque ejuracanaque. Arepa María carecani isaqui ama bucha, jabama tu ni ejeque ecuitaja buchique. Tuja ebacua ecarecaniju badeyaque tu Yusuja Espíritu equeque. Bisuume tuque micue etareju duju ishu. 21 Deca nana piji tujatu cuinanaya. JESUS tuja ebacani paju. (Riyaque ebacani tu “INAJACAMEREQUIQUE” jadique). Jadya bacanietu juya, tuque tuja cuanaque inajacamerequi jubuque tibu, tunaja jucha cuana apupashaqui jubuque tibu, —jadyatu barepa juque Yusu tsahuaquira José acuare tahuiju.
22-23 Berutu quisarati cuejaqui eque Yusura cuejacuare eje bucha judadiyaque:
“Epuna deca jipemaquetu carecani isaqui jubuque.
Cuinanabuque tujatu ebacua.
EMANUEL bacanitu jubuque” (‘YUSU ECUANA TSEHUE’ jadique),
jadyatu Yusura quisarati acuare beru.
Jesucristo cuinanahuajutu tura quisarati iyahua eque jucuare.
24 Tahuiyaque cabatietitsutu José barepa juque Yusu tsahuaquira cuejahua equedya jucuare. Caquemiticuaredya ecatse María tsehue. 25 Tumetu arepa caquemitihua ama bucha Joséra jabahuishacuare ama tuja ebacua cuinanaya tupu. Ebacua nana cuinanahuajutu Joséra JESUS bacanidya acuare.