6
1 Tsaju' lala Dioschi taawasha kemu deetu, Diosya mika aa ura jutu ñullanu naake ura' kenu tyañuba ñulla tsaikutin jutyuuya jutyudei tindetsuyu. 2 Matyu Diosya ya' kiikanu entsandive:
Iya tsanguendyanu uwanu ñunu meeyu,
tsenmin livee inu malunu ñunu la'kayu, *Isaías 49.8 ti' pillave.
Tsenñu challaa juntsa tsanguenuu maluve. ¡Umaa livee inuu maluve!
3 Lalaya munuba firu' ikaakenuuya kindetyuyu, tsenmalaa lala' taawasha naa muchi bain firu' juuñuu katawai'nutsu. 4 Tsa jutyu', lala ti kike' bain Dioschi taawasha kiikemu juuya keewaandetsuyu, naa dyai'mujchi tiba tsa tsanguentsunu junchi bain, naa taaju kikenuu faañu bain, naa tiba tajtu juju' bain, naa tituba indu naaken tsandentsu bain, 5 naa debandandu bain, naa peesu vi-i' bain, naa jutikaandu bain, naa taaju' taawasha kendu bain, naa kasujtu dechayandu bain, naa mandinbupu tiba fajtuu puindu bain, 6 tsenmin lala deechu' chunchi bain Dioschi taawasha kiikemu juu keewarendetsuyu, naa tiba anbuda jutyu minchi bain, naa tiba induba keeminchaañuu junchi bain, naa aa ura junchi bain, naa Espíritu Santo lalanu puñu' mitya bain, naa lala munu bain uwain estya' keewarendu bain, 7 naa lala' kuinda anbuda jutyun mitya bain, naa lalanu chumu Diosa' pudee' mitya bain Dioschi taawasha kiikemu juuya keewaawaa dekiyu. Tsejtu lalaya tiba ura' kiikenchee balela' la'kamu deeyu, naa vinguijiiñu-i' bain, naa lalanu dekijañu vinguikakeñungue' bain. 8 Mandinbupu lalanu balengure' pamu deju' bain, mandinbupu kentsure' pamu deeve; mandinbupu lala' mitya ura' pati' bain, mandinbupu firu' pamu deeve. Tsenmin naa lalaya anbukuinda juuya patyu deeñu bain, anbukuinda kes nemulanu naake firu' kemu deju'ba lalanu tsanguemu deeve. 9 Naa veelaya lalanu bale ruku juu kuretyu deeñu bain, mantsalaya uwain bale ruku juu kuremu deeve; †Naa veelaya lalanu bale ruku juu kuretyu deeñu bain, mantsalaya uwain bale ruku juu kuremu deeve tityumujchi, Lalanu ura' kera deju' bain, kerajtu chacheeba dejuñu ken tsanguemu deeve ti' aseetanguikara bain junu juve. naa peyaañuu deju' bain, peyai'mujchin dechuyu; naa lalanu taaju de-iware' puite' bain, tutendetyuve; 10 naa llaki kuraa deju' bain, naa-uwanuba sunden dechuyu; naa pure chachi kuraa deju' bain, veelanuya tarukuuñuu tiwaandetsuyu; naa tiba tajtuuñuu deju' bain, tiba detaañuuren tsa deeyu.
11 Corintosha keranguen chumu naatalala, lalaya ñullanu naati panuu juñuba tsandi depayu, tsejtu ñullanu naa-i estyanuu juñuba tsa dekiyu. 12 Lalaya ñullanu naa-i estyanuu juñuba juntsai estyandetsu bain, ñullaa lalanu juntsai estyaindetyuve. 13 Tsa' mitya ñui bain tsa deesa tenñu, apala ya' kaillanu naatimu deeñuba tsandipa' u'tandinu tenve, ñui bain i ñullanu naa-i estyamuñu bain juntsa deesa tenñu.
Lalaa Diosa' pupunanu yajuuñu deeyu.
14 Keranguityulabaya veta' veta' tiba kiiken chumu tiyanu kityudei; ñullaya yaiba ma pensaa dejutyuve. ¿Nejtaa manbarejuu junu dejun tiba ura jumu, urajtu jumuba? Tsenmin, ¿nejtaa danjuruu jumu, yapijuruu jumuba buudinuu jun? 15 Tsenmin, ¿nejtaa Cristo, Dyabuluba buudinuu jun? ¿Naa keenguemu chachi bain, nejtaa keranguityu chachiba manbarejuu dejun? 16 Lalaa Diosa' pupunanu ya juuñu deeñu, Dios lalanaa chushu juntsaa, chi dyuslanuya keeminchaanu dejuyu, Diosren entsandimuñu' mitya:
Iya yaiba chu',
yala' kejtsapala nenu tsuyu.
Iya yala' Dios junu tsuyu,
tsenmala yalaa in chachi junu detsuve, ‡Éxodo 37.27; Levítico 26.12 timuwaave.
17 Tsenmin Bale Ruku entsa bain entsandive:
Juntsa chachilla' kejtsapalaya malu' miji' baka' jiidei;
Dioschi urajtu kurekaamu juulanuya jaiba ta'katyudei.§Isaías 52.11
Tsenmalaa iya ñullanu mika' inchi tirenu tsuyu.*Ezequiel 20.34
18 Tsejtu iya ñuichi Apa junu tsuyu,
tsenmala ñullaya in nala bain,
in na'mala bain junu detsuve, tive tiba kekaamu Bale Ruku, †2 Samuel 7.8, 14 ti' pillave.
*6:2 Isaías 49.8
†6:9 Naa veelaya lalanu bale ruku juu kuretyu deeñu bain, mantsalaya uwain bale ruku juu kuremu deeve tityumujchi, Lalanu ura' kera deju' bain, kerajtu chacheeba dejuñu ken tsanguemu deeve ti' aseetanguikara bain junu juve.
‡6:16 Éxodo 37.27; Levítico 26.12
§6:17 Isaías 52.11
*6:17 Ezequiel 20.34
†6:18 2 Samuel 7.8, 14