12
Ma shinbu paa piñiba
1 Kai'sha selusha Diosyaa tsanguekaantsuve tyainuu jumu ke' keewaañu katawawa: ma shinbu pajtanuren ne jali panan tsaju, tsenmin ya' neepachiya kepe pajtanu teetaju', ya' mishushaa ma mishmunderu 12 makara chuu pukaawa. 2 Juntsa shinbu na puuwa. Tsaju' yachi nakanu ura jañu kityatu jelekendintsuwa. 3 Tsenmala bene kai'sha Diosyaa tsanguekaantsuve tyainuu jumu ke' keewara kamain mafaawa: tsenñu aa paa piñi ungalalaa, mandishpai mishu puu, naa kachu bain paitya ma puuya faawa. Tsenmin mishumee kaa mishmunderu main main pukaawa. 4 Tsejtu ya' nepelechi kai'sha chumu makaralanu pen pela vele' keekiñunguiñuya, manbaate makaraya tsaa dekasha' ere' tusha dekepukiwa.
Tsangue' dyatu juntsa paa piñi, nakanundiyantsumu shinbu' ajuubi ji' uidiwa, na pajtenmalan juntsa nanu ka' finu. 5 Juntsa shinbu unbeena kawa. Tsenñu juntsa kaana, bene kumuinchi chachillachi bale ruku tiya' tsuta kapasha jeru puu cha'li taa washna' mandanguiikenu tsuve. Tsaaren juntsa shinbu' kaananu kaketu, Diosa' chuchudinu ajuusha deta'wa. 6 Tsenñu juntsa shinbu nepiya' ji' tsaa tiba den chutyuin tenasha jiiwa, matyu yachi, Dios yumaa mi'ke' tananu tenasha. Tsenñu junu 1.260 malu inbera panda kuntsunu dejuwa juntsa shinbunu.
7 Tsenñu aa bale jumu anjee Miguel ya' anjeelaba paa piñinu selusha devinguiwa. Tsenñu paa piñi bain ya' anjeelaba bulu devingueturen 8 pullai'tu, kai'sha chunanuu jutyu tiyaiwa. 9 Juntsaitaa paa piñi, yumaa tinbu chumu piñi, matyu Dyabulu mumu puu, tsandityu' bain Satanás tiitinu jumu, matyu kumuinchi chachillanu anbukuinda keranguekaamu paa piñi, selusha chumuren tsaa kelarai', ya' anjeelaba bulu tusha keviiwa.
10 Tsenñu selusha main daran palaachi entsandi pañu meewayu:
Livee inu jumu yumaa jave;
Dios tyee kiikenu tya'ba juntsanguenu keewaave.
Tsenmin Dios rei ju' naajunuuñuba juntsa bain keewaave,
tsenmin yachi Mi'ke' Kayamu' mandanguenu malu bain yumaa jave,
matyu laaba bulu keranguemu naatalalanu firu' pa',
tsa deeve ti' Diosa' ajuusha malumere,
naa kepe bain, naa mandala bain tsa tsandintsumu ruku,
junga kelara' vee mujtu keviiñu' mitya.
11 Diosnu keenguemu lala' naatalala Dyabulunu depuive;
matyu Llupu Kaa Uveja tuta',
ya' asa shajaakaañu' mityaa depuive.
Tsenmin naa jela pubaatyu Diosa' mitya pas nendu', naa depeyaba i':
Uwain ura palaave,
ti' mijakaamuwa de' mitya bain, juntsan mityaa depuive.
12 Tsa' mitya kumuinchi selusha chumula sundyadei,
tsaaren ñulla tusha chumula bain,
naa lamaasha pumula bain taaju puinu detsuve,
matyu Dyabulu yachi yumaa aa malu tsutyuñuba mija' mitya,
ñulla' junga tsamantsa ajara vijave, tiwa.
13 Paa piñi, nei'ba tusha kevi'ba mijamin, unbeena kamu shinbunu ajaatya' surekiwa. 14 Tsenñu juntsa shinbunu pai aa jullayu ja'chi juu dekuwa, juntsa paa piñi kalen putyuinsha, tiba den chutyuinsha, yanu pen añu medya' mitya panda kuwa kentsunu dejuñu junga, ya' chuinsha jekachi jisa detyatu. 15 Tsenmalan juntsa paa piñi ya' fi'pakisha, kacha ken tsangue' pi pure' kelaake' pijula tirekiwa, juntsa shinbunu pi bu'ware' llutenu. 16 Tsenñuren juntsa shinbunu la'katu tu leechinguike', paa piñi bu'waañu pinu dekushkakaakiwa. 17 Tsenñu paa piñi tsamantsai ajaaviwa juntsa shinbunu. Tsejtu juntsa shinbunu kayu vera sera' jimu chachillanu, matyu Dios naakidei tiñuba tsanguemulanu, tsandityu'ba Jesús naake mijakare' puiñu bain, tsanguen chumulanu vinguinu jiwa. 18 Tsejtu paa piñi lamaa pi keesha ji' uidiwa.