18
Babilonia millainu malu
1 Entsaa depuiñu, bene vee anjee kai'sha pajantsu katawayu, juntsa tiba pure' kiikenu tirawa. Tsenmin ya' pi'kelaren tusha tsaa danjurudiwa. 2 Tsejtu daran palaachi patu, entsandiwa:
¡Umaa aa pebulu Babilonia millaive, tsaa millaive!
Matyu dyabulula' chunu tena tiyaive,
naa Dioschi urajtu kuraa tiremu kumuinchi bu'chulla pantsunu ya bain tiyaive,
tsenmin Dioschi urajtu kuraa tiremu pishku yatape bain,
naa na'baasa Dioschi urajtu kuramu animaala' chuchunanu ya bain tiyaive.
3 Matyu yaa kumuinchi chachillanu firu' kemishti' tsaanchi deviñawaakeñungue',
naa nuka chumu reilanu bain, yaba detsaimishtive;
naa tu kuraa buli atis nemulanu bain,
firu' imishtindu taruku detireke' sunden dechujtikaañuve, tiwa.
4 Bene selusha kamain entsandiñu meejawa:
In chachillaya, aantsa pebulunu malu' miidei,
yaiba pareju ujcha dela', bulu taaju pullan jutyu.
5 Matyu yala' keñu ujcha,
Diosa' ajuubiren tapa'kajive,
tsenñu Dios yala' ujcha keetaditu taaju puiwaanu juve.
6 Juntsa shinbu chachillanu naakemuñuba ñui bain yanu tsa mandei,
matyu naake taaju puiwaakaamuñu bain
yanuya juntsaa tenen pai bijee mandei,
tsenmin veelanu naake kushkaamuñuba,
yanuya tsaandene kayu feete pai bijee mangushkaadei.
7 Yaa naa-i dajtyataa naa tinuba pensajtu firu firu kemuwaañu bain,
yanu bain taaju ke' kityawaranchi juntsangue taaju ma-iware' llakindyakaadei,
matyu yaa, ya' tenbukashaya: “Ma reina ju' mityaa mandanguen chuyu”, tyave.
Tsenmin: “Biyuda jutyuyu, tsenmin naa-uwanuba llakinguen chun jutyuyu”, pensaa juve.
8 Tsa' mitya juntsa shinbunu ma malunun entsai taaju depuinu tsuve:
peyanu malu jamin,
llakinguenu malu jamin,
panda yamuj malu bain jamin inu tsuve,
tsenmin tsai' ñichi jupeinu tsuve,
matyu tichiba dera Dios,
Bale Rukuren tsangue kuipa pu' kavitu keñu' mitya.
9 Tsenmala kumuinchi tusha chumu reila, matyu yaba tsa tsaimula, naa ti kendu'ba pensangui'mujchi ke' yaba sunden pulla pullaimu reila, juntsa shinbu ñichi jupentsuñu ya' ñivijcha luntsu dekata' ware' ya' mitya llakinguenu detsuve. 10 Tsejtu tsaa taaju puindu' kityantsu jeetya' baasha uina' kata-eetu, entsa entsandinu dejuve:
¡Mika taaju i' puintsuve!
¡Mika taaju i' puintsuve!
¡Tsamantsa aa pebulu Babilonia,
ti kendya'ba kiikemu pebulu!
Matyu: Ñunu taaju puiwarenuya jayun mikañuve, tiitinu detsuve, tiwa.
11 Tu kuraa buli atis nemula bain ya' mitya ware' llakinguenu detsuve, matyu muba yala' buli ma-ati' kanu dejui'ñu: 12 naa uru bain, lushi kenu jeru bain, bale shupuka bain, perla bain, naa ura linu jali juu bain, naa seda jali juu bain, juntsa jali naa yamurara juu bain, naa ungalala bain; kumuinchi vee vee aindyu chi juu bain, elefante aa tejku usnamuchi keñu juu bain, chi balenchi jumuchi tiba keñu juu bain, brunsechi keñu juu bain, jeruchi keñu juu bain, marmul shupukachi keñu juu bain; 13 kanela juu bain, ti pindyupi juula bain, ju'ke' aindyunguikaantsumi juula bain, mira bain, aindyu chi pillu bain, binu bain, ulibu muli bain, pan kenu llujpe kayu ura bain, trigu bain; buli tanemu animaa juula bain, uveja juula bain, kawallu juula bain, kawalluchi juyamu karuu juula bain, naa veelachi manda-i' taawasha kemu chachilla bain, tsenmin vingue' bensa-i' kayamu chachillanu bain ma-ati' kanu dejui'ñu ware' llakinguenu detsuve. 14 Tsejtu Babilonia pebulunu tsandinu dejuve:
¡Tsamantsa anbu puka,
ñu' tsamantsa anbu' tya' fifikenu puka,
ñu umaa tanatyuve;
tsenmin kumuinchi ñu' tsamantsa nara nara kenu jumu bain,
naa balen juula bain mangatan jutyuve! tiitinu detsuve.
15 Buli atis nemula ya' mitya taruku tiyamula, ya taaju puindu' kityantsu keenatu, yai bain juntsai keemee tya' jeetya' baasha ke-eeditaa, ya' mitya ware' llakinguiikenu detsuve. 16 Tsejtu entsandinu detsuve:
¡Mika taaju i' puintsuve!
¡Mika taaju i' puintsuve juntsa tsamantsa aa pebulu!
Matyu ma shinbu, yamurara ungalalaba puja'tee
ura linu jali panakeñuuwaave,
tsenmin uruchi bain, perlachi bain, bale shupukachi bain
pannanguikeñuuwaave tennaren,
17 wajtunuren ya' tsamantsa balen jumula,
matyu tyeeba ju' de-in tsa deive, tiitinu detsuve.
Tsenñu kumuinchi baaku deechu kes nemula bain, naa baakutala vi' nemula bain, lamaasha baakunu taawasha kes nemula bain, tsenmin kumuinchi lamaasha ne' bui atis nemula bain baasha udi' ke-eenataa; 18 juntsa aa pebulu jupe' ñivijcha laakentsu katatu: ¿Nukaa vee pebulu juntsa keraa chumuwaañanga? tiidetiwa. 19 Tsejtu ware' llakinbeyaju', yala' mishbui'sha tu llujpe ka' tsutsudekaatu, entsa detiwa:
¡Mika taaju i' puintsuve!
¡Mika taaju i' puintsuve juntsa tsamantsa aa pebulu!
Juntsa pebuluya kumuinchi baaku ta chachillanu,
tsamantsa taruku tiwaamuwaave
¡tsaaren ura wajtunuren tsaa millaive! tiidetiwa.
20 Tsa' mitya, selusha chumula,
entsa aa pebulu millaiñu' mitya sundyadei.
Tsenmin ñulla Diosa' chachi jumula bain,
naa Jesús' mitya kuinda kenu lara' eramula bain,
tsenmin Diosa' mitya pamula bain sundyadei,
matyu ñullanu firu kemuwa deeñu' mityaa,
Dios juntsaikaave juntsa pebulunu,
ñulla' mitya kavitu ketu.
21 Tsenñu pude ma anjee, ilintsumi mulinu keraa aa shupuka ka' lamaasha keputu, entsandiwa:
Babilonia, tsamantsa aa pebulu,
ñu bain entsai' jei kevinu tsuve,
tsenmala naa-uwanuba ñunu mangatan dejutyuve.
22 Tsenmin umaa naa-uwanuba pakare' beesanguemula ñu' miñutala,
naa ne arpa juu bain,
naa pujkuna juu bain,
tyujtyu juu bain mameejan jutyuve;
naa ti taawasha kemu juula bain
umaa ñunu taawasha manguikentsu katawan dejutyuve,
naa mulinuchi ne ilikendetsu fidya bain mameejan jutyuve.
23 Naa ñillu juu bain umaa ñunu malluken jutyuve,
naa matsunu fandangu ke' waratindetsu bain mameejan jutyuve,
matyu ñunu buli atis neneimula
entsa tusha chumuutala tsamantsa taruku detiyave,
tsenmin miruku ken tsangue'
ñu bain tu kuraa chumu chachillanu anbukuinda keranguikaave.
Tsa' mityaa tsa-i' puinu juve, tiwa.
24 Uwain juntsa pebulunaa Dioschin juu jumu chachilla' asa shajaanave, matyu Diosa' mitya pamula' asa bain, naa kumuinchi entsa tusha tutanchi pemula' asa bain deshajaanave.